“Россия ТВда Украина ва Ғарбга адоватнинг чеки йўқ”
Собиқ Латвия ташқи ишлар вазири Марис Риекстиниш қарийб олти йил Латвиянинг Россиядаги элчиси бўлиб ишлаган.
У мамлакатга 2017 йилда келган ва Украинада уруш бошланганидан сўнг Россия билан Латвия дипломатик муносабатлар даражасини пасайтириши ортидан 2023 йил январда у ерни тарк этган.
Собиқ дипломат Россия давлат каналларида кенг кўламли пропагандага илк бор дуч келганида карахт аҳволга тушганини айтади:
“Украинага ва, умуман Ғарб мамлакатларига нисбатан адоватнинг чеки йўқ эди. Улар шунақа сўз ва ибораларни қўллашардики... Мен ҳайратга тушдим! Кунларнинг бирида россиялик ҳамкасблар ва Россия жамияти вакиллари билан учрашганимда улардан сўрадим: “Бу нимаси? Шу аҳволда қандай яшаб бўлади?” Чунки онгли равишда халққа адоват уруғини сочишлари мен учун мутлақо тушунарсиз ҳол эди! Биласизми, нима деб жавоб беришди? “Нима қиласан кўриб? Бу кўрсатувлар нормал одамлар учун эмас”. Сўзма-сўз бўлмаса ҳам, ҳарқалай жавоб мазмуни шунақа эди. Россиянинг кенг кўламли агрессив пропагандаси ҳар соатда, ҳар куни муттасил одамларнинг қулоғига қўяверди, қўяверди. Оқибатини бугун кўриб турибмиз: Россия жамиятидаги жуда кўпчилик Кремлнинг босқинчилик сиёсатини қўлламоқда”.
“Бу замбаракларнинг “мерседеси”
Бир неча ойдирки, украин ҳарбийлари фронтнинг энг қайноқ участкаларида британияликлар енгил артиллериясидан фойдаланишмоқда.
Ироқ урушида яхши ном қозонган замбаракларнинг модернизация қилинган янги “авлоди” эндиликда Бахмут остонасида ўт пуркаяпти.
Украин ҳарбийлари улардан жуда ҳам хурсанд: камшовқин, тезотар, у ёқдан бу ёққа кўчириш ҳам қулай, дейишади.
Энг асосийси – тўплар ўта аниқ уради: шу боис ҳам, айни тоифадаги эски совет қуроллари билан таққослаганда снарядни беш баравар кам сарфлайди.
“Бу замбаракларнинг “мерседеси”. Ниҳоятда аниқ уради. Совет тўплари билан солиштирганда, ер билан осмончалик фарқ бор. Эски тўпларга нишонни йўқ қилиш учун 20-30 та снаряд керак бўлса, бунга 5-7 донаси кифоя. Актив-реактив снардлар ҳисобига 19 километргача масофага қўлимиз етяпти. Советлардан қолган Д30 тўплари эса энг узоғи 15 километрга отади”, дейди украин аскари.
Буюк Британия Киевга L119 тўпларини етказиб бериши ҳақида ўтган йилнинг май ойида маълум қилган эди. Кузда украин аскарлари Германияда ушбу қуроллардан фойдаланиш бўйича тайёргарликдан ўтишди.
Тўплар Украина шарқига бир неча ой муқаддам етиб келди. Улардан бири Бахмут яқинида жанг қилаётган 80-десант-штурм бригадаси ихтиёрига берилган.
Артиллериячи Александр Украинага душман бостириб киришидан олдин ҳам жанг қилишга улгурган. Уруш бошланган пайтда у хизматдан бўшаб, хусусий мактабда ишлаётган эди.
Шу тариқа Александр иккинчи марта фронтга йўл олади. “Россия билан катта уруш бўлишига ҳеч қачон шубҳа қилмаганман, шунинг учун хотиржам эдим”, дейди у.
Аскарлар Бахмут остонасида душманнинг яна қанча кучи қолганини билмасликларини айтадилар:
“Ҳозир штурмларни давом эттиришяпти, биз буни “гўшт билан штурм қилиш” деймиз. Тузукроқ техникалари қолмаган. Уларнинг тактикаси бундай: 10 кишилик гуруҳни ҳужумга ташлашади, кўпини йўқ қиламиз, гуруҳдан бир-икки киши жон сақлаб қолади ва бир неча соатдан сўнги янги гуруҳ жўнатилади. Яна бир нечтаси омон қолади ва шу зайлда қадам-бақадам олдинга силжишмоқда”.
Александр уруш чўзилишидан ва охир-оқибат музлатилган можарога айланишидан хавотирда:
“Умидни йўқотмаслик ва ҳамиша маъно-мантиқ излаш жуда муҳим. Энг оғири ҳам шу бўлса керак, – дейди у. – Бекорга қон тўкмаётганимизни, кураш куч ва ресурс талаб қилишини унутмайлик. Акс ҳолда уруш жуда узоқ давом этади. Бу уруш бир йил олдин бошланмади, балки 300 йилдан бери бўляпти. Орқага йўл йўқ, фақат олға интилишимиз лозим”.
S-300 зенит-ракета тизимларидан зарбалар
Ўтган сутка мобайнида Россия ҳарбийлари Запорожье, Комишувах ҳамда Снигуривка шаҳарларига S-300 зенит-ракета тизимларидан 25 марта зарба берган ва 42 марта ҳаводан ҳужум қилган.
Бу ҳақда Украина Қуролли кучлари бош штаби ўзининг кундалик ҳисоботида маълум қилди. Украина томонига кўра, аскарлар кун давомида рус қўшинларининг 60 дан ортиқ ҳужумини қайтарди. Аммо, катта йўқотишларга қарамай, қарши тараф Донецкнинг Лиман, Бахмут, Авдивка ва Маринка шаҳар ва қишлоқларига ҳужум қилишда давом этмоқда.
Бахмут ва Авдивка бир неча ойлардан бери шиддатли жанглар маркази бўлиб қолмоқда. Россия Мудофаа вазирлиги «Вагнер» ёлланма гуруҳи жангчилари Бахмутдаги яна иккита ҳудудни эгаллаб олганини даъво қилди.
Россия мудофаа вазири Сергей Шойгу Владимир Путинга Тинч океан флоти томонидан ўтказилаётган ҳарбий-денгиз машғулотлари ҳақида ҳисобот берди:
“Мудофаа кучларимиз биз учун устувор аҳамиятга эга. Биринчи навбатда, бу Донбас минтақасидаги халқимизни ва янги ҳудудларимизни ҳимоя қилиш билан боғлиқ масала. Ҳеч ким бизга Тинч океанидаги флотни ривожлантиришни тўхташ кераклигини айтмаган. Бошқа флотлар билан ҳам шу каби машғулотлар олиб бориш керак. Флотимизнинг баъзи таркибий қисмларидан ҳар қандай турдаги можароларда фойдаланиш мумкин. Буни эътиборга олишингизни сўрайман”.
Путин тезкор текширувлар Россиянинг Тинч океанидаги флоти юқори шайликка эгалигини кўрсатгани ҳамда Украина Россия учун устувор аҳамиятга эгалигини айтди. Ҳарбий машғулотлар Хитой мудофаа вазири Ли Шанфу Москвага ташрифи чоғида ўтказилмоқда.
Путин: Хитой билан ҳарбий ҳамкорликни муҳокама қилдик
17 апрель куни Россия президенти Владимир Путин Москвада Хитой мудофаа вазири Ли Шанфуни қабул қилди.
«Ҳурматли жаноб вазир, сизни кўрганимдан жуда хурсандман. Сиз Россияга буюк дўстимиз, менинг дўстим, Хитой Халқ Республикаси раиси, Си Цзинпиннинг ташрифидан сўнг келдингиз. Ташриф жуда самарали бўлганини яна бир бор таъкидламоқчиман. Биз мамлакатларимиз ўртасидаги ҳарбий ҳамкорликни ҳам муҳокама қилдик», деди Владимир Путин.
Пекин расмийлари ўтган ҳафта Лининг Москвага бориши ва мудофаа расмийлари билан учрашишини билдирган эди. Бироқ ўшанда Путин билан учрашув ҳақида маълум қилинмаган. Хитой раҳбари Си Цзинпин ўтган ой Москвада Путин билан учрашганди.
Москва Украинага уруш бошлаганидан бери Россия ва Хитой иқтисодий, сиёсий ва ҳарбий алоқаларини янада мустаҳкамлашга киришди. Киев расмийлари Россия Украинада фойдаланаётган қуролларда Хитойга тегишли таркибий қисмлар топилаётганини маълум қилган. Хитой эса Россияга ҳарбий ёрдам бераётганини бир неча бор рад этган.