“Зеленскийга қўнғироқ, деб токка улашди”. Херсондаги қийноқлар
Херсон шаҳри 8 ойдан зиёд Россия оккупацияси остида бўлди. Бугун оккупацияни хотирлаётганлар даҳшатли қийноқлардан гапирмоқда. Ҳикояларга кўра, шаҳар ишғол этилганидан сўнг аҳоли тинч намойишларга чиқиш билан Россия босқинига норозилик билдирган.
Россия ҳарбийлари уларни зўрлик билан, ҳатто ўқотар қуроллар қўллаб, бостирган. Кейинроқ намойишчилар бирин-кетин ғойиб бўла бошлаган.
“Маҳбусларни тик ҳолда деворга тақаб қўйишган ва қулоқларига, таносил аъзоларига сим улаб, ток юборишган. Ёнида битта аскар турган ва маҳбус оғриқдан ғужанак бўлиб қолганида дубинка билан уриб, “тек тур” дея буйруқ берган. Қийноқнинг бу усулини “Зеленскийга қўнғироқ” деб атаганлар. Ўтакетган “беодоб”лар, яъни фикридан воз кечмаган ва уларга хизмат қилишга рози бўлмаган ватанпарварлар эса “Байденга қўнғироқ” билан жазоланган. Бу “Зеленскийга қўнғироқ”нинг ўзи, фақат қийноқда сув ҳам қўлланган. Нега “қўнғироқ” деб аташган, биласизми? Чунки электр симининг бир учи эски ҳарбий дала телефон аппаратига уланган бўларди”, дейди Андрей Коваленко, Херсон вилояти прокуратураси бошлиғи.
Украина армияси шаҳарни озод этганидан кейин, Россия ҳарбийлари уларни қамаб қўйиб, қийноққа солгани, хусусан ухлатишмагани, ток билан азоблашгани ва оч қолдиришгани маълум бўлди. Бундай қийноқхоналардан тўртта бўлган.
“Бизни ҳаво айланмайдиган ертўлада сақлашган эди. У ерда 5 киши: уч йигит ва икки қиз бўлганмиз. Электр чироқ кечаю кундуз ёниқ турарди. Кимдир уни ўчиришга журъат қилса, эрталабгача боши узра стул кўтарган ҳолда тик туришга мажбур қилишарди. Чунки видеокамера бор эди. Камера “кўзи тушмайдиган” бир бурчакка 5 литрли баклажка қўйиб, ўшанга ҳожат қилишимизга тўғри келди. Бетон устида устимизга қоп ёпиб, ухлардик. 36 ёшимда буйракдан ажраб қолмайин, деб қўрқардим. Чунки касал бўлсанг даволашмасди, ўлиб кетганинг билан ишлари йўқ эди уларнинг”, дейди тутқунликда сақланган украиналик аёл.
Украина Россияда асирликда бўлган 130 аскарини қайтариб олди
Россияда асирликда бўлган 130 нафар ҳарбий Украинага қайтди. Бу ҳақда Украина президенти офиси раҳбари Андрей Ермак маълум қилди.
“Улуғ Пасха муносабати билан асирлар айирбошланди. Бизникилардан 130 киши қайтмоқда. Айирбошлаш бир неча кун давомида ва бир неча босқичда амалга оширилди. Ҳарбийлар, миллий гвардиячилар, денгизчилар, Давлат махсус транспорт хизмати ходимлари... Бахмут, Соледар, Запорожье ва Херсон йўналишларида асирга тушган оддий аскарлар ва сержантлар. Бизникилар уйларига қайтишмоқда”, деб ёзди Ермак.
У украинлар ҳаёти мамлакат учун энг қийматли нарса эканини урғулади.
“Қаҳрамонлар тирик бўлмоғи керак” – президент Владимир Зеленский доим шундай дейди, бизнинг жамоа – ҳарбий асирлар масалалари бўйича координация штаби эса унинг топшириқларини бажармоқда. Бизга: “Ҳамма одамларимизни қайтаринглар”, деб топшириқ берилган. Ва биз қайтаряпмиз”, дея қўшимча қилди Ермак.
Россия томони асир айирбошлаш бўйича изоҳ берганича йўқ.
Туркманистонлик Абу Юнус Украинани ҳимоя қилмоқда
«Мен ўзим Туркманистон фуқаросиман ва Шайх Мансур номидаги чечен кўнгиллилар батальонида Путиннинг диктаторлик режимига қарши жанг қиламан”.
Туркманистонлик Абу Юнус мерган, ўқчи ва миномётчи ҳам. У Украинани Россия босқинининг биринчи кунидан бошлаб ҳимоя қилади.
“Ўтган йилнинг 24 феврал куни Россия Украинага бостириб кирди. Мен эртаси куни ҳарбий комиссариатга бордим. Бу мамлакатни ташлаб қочишга менинг виждоним йўл бермади. Бу мамлакат менга ёқади, ажойиб мамлакат, одамлар менга жуда яхши муомала қилади. Улар мени қабул қилишди. Мен шунчаки бу мамлакатни ташлаб кетгим келмади. Боз устига мен мусулмонман. Мусулмон ҳамма вақт ҳақиқат ва мазлумлар томонида бўлиши керак. Россия – террор ва диктатурани тарғиб қилаётган мамлакат”, дейди у.
Абу Юнус 44 ёшда. У Туркманистоннинг Лебап вилоятидан. Украинага ўз юмушлари билан 2018 йилда келган. Киевга бир неча кунга келган эди, натижада беш йилга қолиб кетди.
“Тўғрисини айтганда мен бу ерга келганимда одамлари жуда ёқди. Уларнинг муомаласи, менга бўлган муносабати чиройли эди. Мен мусулмон ва улар исломни ҳурмат қиларкан. Мен субҳаналлоҳ дедим. Гўзал мамлакат, озодлик, ҳеч қандай қонунсизлик йўқ. Бу ерда полициячилар адолатсизлик қилмайди, ҳурмат билан гаплашади. Умуман олганда мен Европага тушиб қолдим”, дейди у.
Абу Юнус Россия армиясига қарши чеченлар билан елкама-елка бўлиб жанг қилмоқда.
“Бизнинг сафимизда қирғизлар бор, ўзбеклар бор, бошқа миллат вакиллари кўп. Лекин бошқа туркман кўрмадим", дейди Абу Юнус.
Шайх Мансур номидаги чечен кўнгиллилар батальони ҳозир Бахмут учун жанг қилмоқда. Бу сўнгги олти ойдаги энг қайноқ жабҳа.
“Украина ҳудудига бостириб кирган Путин оккупантларини ҳалок бўлди деб айтиш нотўғри, улар ўзганинг ерида тўнғиз қопмоқда. Даҳшат! Улар гала-гала бўлиб бостириб келиб аҳмоқона ўлим топяпти”, дейди туркман жангчиси.
Абу Юнус Ванер шикрати билан шартнома тузиб урушга келаётган Марказий осиёликларга ҳайрон қолаётганини айтади. Унинг сўзлариаг кўра, Ванер улардан тўп еми сифатида фойдаланмоқда:
“Бу ерга келиб ўлиб кетгандан кўра, ўша қамоқ муддатини икки баравар ўтирган афзал. Вагнерчилар бу ерда пачкалаб ўляпти, бу юз фоиз ҳақиқат! Биз уларни нишонга олганда кимсан, паспортингни кўрсат деб сўраб ўтирмаймиз. Сизларни тўп еми сифатида юборишмоқда. Мен оддий мисол келтираман. Улар украиналикларнинг миномёт ёки танки қаердан отаётганини билиш учун ўнта вагнерчини тўп еми сифатида ташлайди. Тушуняпсизми, сизларни ана шундай ем қилишмоқда”, дейди Абу Юнус.
Тукрманистонлик Абу Юнус марказий осиёликларни Украинага қарши урушда қатнашмасликка даъват қилади.
Украина аскарлари фронтдаги танаффусдан фойдаланиб машғулотларни давом эттирмоқда
Украин қўшинлари миномётдан нишонга олишни машқ қилмоқда.
Йўлда кетаётган украин бўлинмаларидан бирининг зирҳли машинаси бузилиб, тўхташга мажбур бўлди. Бироқ, зирҳли машина тезда таъмирланди ва ҳарбийлар йўлда давом этди. Миномётчилар бўлинмаси икки ҳафтага ҳордиқ олиш учун Бахмутдан қайтди.
Бўлинма командири Михайлонинг айтишича, танаффус вақтида унинг аскарлари тайёргарлик кўриб, маҳоратини оширган.
«Фронтда вазият бироз бошқача, сиз доимо атрофни кузатиб, хушёр туришингиз керак. Душман дронлари, артиллериясидан огоҳ бўлиб туриш керак. Фронтда кўпроқ эътиборли бўлиш лозим», дейди украин ҳарбийси Васил.
Миномётчилар гуруҳининг командири Михайло Украинанинг душманларга қарши ҳаракатларига тўхталди.
«Биз жуда яхши ҳаракат қиляпмиз. Душманга аниқ зарбалар бердик. Уларда йўқотишлар кўп, чекинишга мажбур бўлишяпти. Энди душман ҳавода бизнинг дронларимизни кўриб, қўрқа бошлади. Чунки артиллериядан зарба беришимизни билишади», дейди украин ҳарбийси Михайло.