Россия Запорожье ва Николаевдаги турар-жой биноларини ўққа тутиши оқибатида икки ўсмир ҳалок бўлди
16 апрелга ўтар кечаси Россия ҳарбийлари Украинанинг Запорожье ва Николаев вилоятларига зарбалар йўллади.
Ҳужумлар оқибатида Николаев вилоятида 2005 йилда туғилган икки ўсмир ҳалок бўлган. Бу ҳақда вилоят раҳбари Виталий Ким маълум қилди.
Мулозимга кўра, зарба С-300 зенит-ракета тизимидан йўлланган. Турар-жойлар, ўқув муассасаси ва хусусий корхона бинолари шикастлангани айтилмоқда.
“Бугун тунда бўлган ҳужум натижасида Снигирёвка шаҳрида икки ўқув муассасаси, касалхона, маданият уйи ва турар жойлар зарар кўрди. Дастлабки маълумотга кўра, ҳеч ким жабрланмаган”, деб ёзди Виталий Ким.
Николаев вилояти прокуратураси хабарномасига кўра, уруш қонунлари ва одатларини бузган ҳолда қасддан одам ўлдириш факти (Украина ЖКнинг 438-моддаси 2-қисми) бўйича дастлабки тергов бошланган.
“Тергов маълумотига кўра, 2023 йил 16 апрель куни соат 02.10 да Россия армияси Николаев вилоятининг Снигирёвка шаҳрига ракеталар билан ҳужум қилган. Душман снарядлари турар жой бинолари ва фуқаролик инфратузилмаси объектларига теккан. Ҳужум натижасида 17 ёшли йигит ва 18 яшар қиз ўлган”, дейилади хабарномада.
Запорожье вилоятининг Камишеваха кентида эса Россия зарбалари черковга шикаст етказди.
“Улар учун муқаддас ҳеч нима йўқ, ҳатто Пасха кечасида ҳам ҳеч нарса уларни нобакорликдан тўса олмайди. Душман яна кенг кўламли ҳужум уюштирди. Камишевахада маҳаллий черков зарар кўрди, хайриятки, ҳужум ибодат вақтида бўлмаган”, дейилади маъмурият телеграм-каналидаги хабарда.
Денис Шмигал: қарши ҳужум "яқин келажакда" бошланади
"Қарши ҳужум режаларимизга ҳеч нарса таъсир қилмайди ёки ўзгартирмайди. Мақсадимиз ғалаба, бизнинг мақсадимиз - 1991 йил чегаралари доирасидаги Украина ҳудудларини озод қилиш. Биз қарши ҳужум яқин келажакда амалга ошишига ишончимиз комил. Қўшма Штатлар бизни мутлақо қўллаб-қувватлайди. . . . Бизнинг ишончли стратегик ҳамкорларимиздан ҳеч қандай сир йўқ”, — деди Украина бош вазири.
Аввалроқ Шмигал Украинанинг қарши ҳужуми ёзгача қолдириши мумкинлигини айтганди.
Украина Россия босқинига қарши давом этаётган ҳарбий курашда АҚШ ва бошқа ҳамкорлар билан ишлашни яна ҳам кучайтиради, деди Украина бош вазири Денис Шмигал журналистларга.
Журналистлар Украина бош вазирини АҚШ разведка маълумотларининг сиздирилиши билан боғлиқ саволларга тутишар экан Шмигал, Россиянинг ҳеч қандай дезинформацияси Украинанинг ўз мамлакати учун олиб бораётган жангига халақит бермаслигини айтди.
Айримларига "ўта махфий" тамғаси урилган сиздирилган материаллар Украинадаги урушнинг батафсил тасвирини кўришга имкон беради. Уларнинг ичида Украинанинг баҳорга белгиланган қарши ҳужум тайёргарлигига оид батафсил махфий маълумотлар ҳам бор.
Албания жосусликда гумонланиб қўлга олинган россиялик блогерни Россияга экстрадия қилиш сўровини рад этди
34 ёшли Светлана Тимофеева бошқа бир рус ва украиналик билан 2022 йил август ойида пойтахт Тирандан 80 км узоқликда жойлашган эски ҳарбий завод ҳудудига кирганликда айбланиб ҳибсга олинган.
Тимофеева Албания прокуратурасининг жосуслик айбловларини рад этиб, собиқ ҳарбий базага киришдан ягона истаги Совуқ уруш давридаги ташландиқ биноларни суратга олиш бўлганини ва ҳеч қандай бошқа нияти бўлмаганини айтди.
У Москвада худди шундай айбловларга дучор бўлган ва ўтган ой Тимофеева Россияга экстрадиция қилинишдан холос бўлиш учун бошпана сўраганди.
“Суд Россия фуқароси Светлана Тимофеевани Албания Республикасидан Россия Федерациясига экстрадиция қилиш тўғрисида Россия расмийларининг сўровини қабул қилмасликка қарор қилди”, — деди судя Элис Дине қарорни эълон қилар экан.
Суд қарори Албания Адлия вазирлигининг уни экстрадиция қилиш ҳақидаги аввалги қарорини бекор қилди.
Албания, аксарият Европа давлатлари қатори, Украинага бостириб киргани учун Россияга қарши санкциялар киритишда Европа Иттифоқига қўшилди.
“Россия давлати ҳеч қандай асосий инсон ҳуқуқларини кафолатламайдиган давлатдир. . . Светлана Тимофеевани экстрадиция қилиш сўралган иш уйдирма иш эди”, деди унинг адвокати Фатмир Луши қарорни олқишлар экан.
Лана Сатор номи билан танилган Тимофеева Инстаграмдаги саҳифасида 250 000 дан ортиқ обуначига эга бўлиб, у ерда йиллар давомида ташландиқ бинолар, жумладан, унутилган, эски ва занглаган ҳарбий иншоотлар суратларини жойлаштирган.
Финляндия Россия билан чегарасида девор қуришни бошлади
Финляндия Украинадаги уруш манзарасида хавфсизликни таъминлаш мақсадида НАТО ҳарбий алянсига қўшилганидан икки ҳафта ўтмай, Россия билан чегарасида деворнинг биринчи қисмини қуришни бошлади.
НАТОга аъзо бўлганидан сўнг шарқий қўшниси қасос олишидан қўрқиб, ҳукумат ўтган йили чегарада тўсиқ девор қуришини эълон қилган.
Финляндия 2021 йил қишида Полшада Европа Иттифоқининг шарқий чегарасида воқеалар такрорланишидан эҳтиёт бўлишни мақсад қилган, ўшанда блок Россиянинг ишончли иттифоқчиси бўлган қўшни Беларусни Яқин Шарқдан муҳожирларни олиб кириш, уларга визалар бериш ва инқирозни яратишда айблаган.
Пўлат тўрдан ясалган Финляндия девори 2026 йил охиригача ўз чегарасининг энг муҳим қисмларининг 200 километринда қад кўтариши керак.
Лойиҳа раҳбари Исмо Куркига кўра, панжара кузатув ускуналарига эга бўлади.
Умумий узунлиги 1300 км га чўзилган чегарадан ўтган йили Финляндияга 30 та ноқонуний кесиб ўтиш аниқланган, россиялик чегарачилар эса Финляндияга киришга 800 га яқин уринишларни тўхтатган, деди Финляндия чегара хизмати.
“Финляндия-Россия чегарасидаги вазият барқарор ва ҳозирда барқарор”, деди чегара қўриқлаш бригадаси генерали Яри Толппанен.
"Аммо бу бутунлай ўзгарган вазиятда Финляндия ишончлироқ ва мустақил чегара назоратига эга бўлиши керак. Финляндия эса Россия чегара назоратига камроқ боғлиқ бўлиши керак", - дея қўшимча қилди у.
Полша ва Болтиқбўйи давлатлари 2022 йил февралида Россия Украинага бостириб кириши ортидан шарқий чегараларида тўсиқлар ўрнатишга киришган.
Ҳозиргача Финляндия-Россия чегараси бу ҳудудни қамраб олган кенг ўрмонларда оддий чизиқ бўлиб келган, у фақат паст симли панжара билан белгиланган бўлиб, у қорамол ва бошқа уй ҳайвонларини тўхтатиш учун мўлжалланган.
Янги тўсиқ баландлиги 3 метр бўлиб, усти устара сим билан қопланган бўлиб, унинг қурилиши тахминан 380 миллион еврога тушади.