Словянскда Россиянинг ракета ҳужумидан 8 киши ҳалок бўлди, 21 киши яраланди
Украина шарқидаги Словянск шаҳрида Россия ракета ҳуэумидан камида саккиз киши ҳалок бўлди, 21 киши яраланди, дея маълум қилди расмийлар.
Фавқулодда хизматлар бузилган турар-жой биносида вайроналарни тозалаш ва омон қолганларни қидириш ишларини давом эттирмоқда.
Полициянинг маълум қилишича, ҳужумдан кейин беш қаватли бинонинг икки юқори қавати қулаб тушган ва майдон рўпарасида ёнғин чиққан.
Расмийларга кўра, Россиянинг С-300 ракеталари бешта кўп қаватли уй ва бешта хусусий бино ва бошқа объектларга зарар етказган. Камида етти киши вайроналар остида қолган.
Словянск жабҳа чизиғига яқин шаҳар, Россия уни ойлардан бери босиб олишга уринади.
Украина президенти Владимир Зеленский Словянскдаги ҳужумни Россиянинг “навбатдаги теракт”и деб атади.
“Ҳозирда Донецк вилоятининг Словянск шаҳрида қутқарув ишлари давом этмоқда. Яна бир теракт. С-300 ракеталари турар-жойлар, оддий фуқаролар биноларига зарба берди”, - деди Зеленский.
Россия: Военкоматга ўт қўйган йигит 8 йилга қамалди
Россиянинг Иваново вилояти Шуя шаҳрида яшовчи Дмитрий Лямин ҳарбий комиссариат биноси деразасига “Молотов коктейли” ирғитгани учун террорчиликка оид модда бўйича саккиз йиллик қамоқ жазосига ҳукм қилинди. Бу ҳақда ФСБ матбуот хизматига ҳавола берган ҳолда IvanovoNEWS нашри хабар қилмоқда.
Кучишлатар идорага кўра, 19 март куни Лямин “ҳокимият органлари фаолиятини беқарорлаштириш мақсадида Иваново вилоятининг Шуя шаҳри, Палехск ва Шуя туманлари ҳарбий комиссарлиги деразасига қўлбола портловчи мослама ташлаш орқали бинога ўт қўйган. Ёнғин ўз вақтида ўчирилган”.
Суд Ляминга нисбатан мажбурий психиатрия муолажасини ҳам тайинлади.
Украина уруши бошланганидан буён Россияда ўнлаб военкомат ва бошқа давлат муассасалари биноларига ўт қўйишга уринишлар бўлган. Бу каби ҳаракатлар президент Путин томонидан қисман ҳарбий сафарбарлик эълон қилинганидан кейин кучайган.
Бахмут - фронт чизиғининг "энг қийин нуқтаси"
Британия разведкаси маълумотларига кўра, Россия охирги икки кун ичида Бахмутда артиллерия ҳужумларини кучайтирган ва Украина қўшинлари шаҳарнинг баъзи ҳудудларидан чекинишга мажбур бўлган.
Украина ҳарбий мулозимлари ҳам Бахмут фронт чизиғининг «энг қийин нуқтаси» бўлиб қолаётганини таъкидламоқда.
“Душман Бахмут ҳудудида ҳар куни 40- 50 марталаб ҳужум қилмоқда. Ўзидаги бор барча қуроллардан фойдаланиб 500 дан ортиқ марта ўқ узади. Улар рус ҳарбий-сиёсий раҳбарияти шахсий таркибидаги сезиларли йўқотишларга парво ҳам қилмаяпти. Охирги икки ҳафта ичида душман Бахмутда деярли 4500 пиёда аскари ва Вагнер ёлланма жангчиларидан айрилди. Улар ҳалок бўлган ёки яраланган”, деди Украина Бош штаби тезкор бошқармаси бошлиғи ўринбосари Олексий Громов.
Громов, Россия Украина ҳудудига ҳужумларни кучайтириш имконини берадиган Х-50 типидаги стратегик қанотли ракеталарни ишлаб чиқаришни режалаштираётганини ҳам таъкидлади.
Озодлик уруш шароитида томонлар маълумотларини мустақил текшириш имконига эга эмас.
Беш ўзбекистонлик АҚШ санкциясига тушди
АҚШнинг Россияга қарши жорий қилган янги санкциясига Ўзбекистон ватандоши бўлган беш нафар шахс ҳам киритилган.
АҚШ Молия вазирлигига кўра, бу беш киши асли ўзбекистонлик олигарх Алишер Усмоновга яқин қариндош бўлган шахслардир.
Булар - Алишер Усмоновнинг икки синглиси яъни Гулбаҳор Исмаилова ва Саодат Нарзиева ҳамда жияни Насиба Нарзиева ва унинг эри Шоҳрух Носирхўжаевлар. Шунингдек, санкцияга Усмоновнинг Кипрдаги Almenor Holdings компанияси директори Гулноз Кочарова ҳам киритилган. Уларнинг айримлари Ўзбекистон ватандошлари бўлиш билан биргаликда яна бир неча мамлакат паспортига эга. Жумладан, Гулноз Кочарованинг Россия ва Кипр ватандошлиги ҳам бор.
АҚШ ва Британиянинг янги санкциялар рўйхатига олигарх Усмоновнинг жами олтита ширкати ва шу ширкатларга қарашли компаниялари ҳам киритилган.
Британия ҳукумати сайтида эълон қилинган шарҳда таъкидланишича, мазкур ширкатлар “Россия ҳукуматидан фойда олишга ёки уни қўллаб-қувватлашга алоқадор”, шунингдек, Россия ҳукумати учун стратегик аҳамиятга эга бўлган қазиб олиш ва рақамли технологиялар соҳасида фаолият юритади.
Санкциялар рўйхатида Ўзбекистондаги “Оҳангаронцемент” заводи ҳам бор. Боиси “Оҳангаронцемент”ни 98,6 фоиз улушини 2022 йил бошида Усмоновнинг USM холдинги томонидан таъсис этилган Akkermann Cement CA сотиб олган.
Санкцияга тушган корхоналар, жумладан, Akkermann Cement CA билан барча операциялар 11 июлгача тўхтатилиши лозим.
АҚШ Молия вазирлигига кўра, олигарх Усмоновнинг синглиси Гулбаҳор Исмаилова The Sister Trust компаниясини Кипр ватандоши Деметриос Сергидес раҳномалигида бошқаради. Вазирлик, Сергидес- Алишер Усмоновнинг молиявий маслаҳатчиси эканини таъкидлаган. Гулбаҳор Исмоилова Европа Иттифоқи, Швейцария ва Буюк Британия санкциялари рўйхатига ҳам киритилган.
Уруш бошланганидан бери Алишер Усмонов АҚШ, Европа Иттифоқи ва Буюк Британиянинг санкция рўйхатига бир неча бор киритилган.
Financial Times ёзишича, Ўзбекистон ҳукумати ЕИдан миллиардер Усмоновнинг санкцияларини олиб ташлашни сўраган.