Жонини хавфга қўяётган ҳарбий шифокорлар
Бу – Бахмут фронтининг жанубий қаноти. Александр ва Данил - ҳарбий шифокорлар. Улар ҳаётини хавф остига қўйиб, навбатчиликка кетяпти.
“Йўлда тез-тез хатарга дуч келамиз. Бир куни эвакуацияга чиққандик, бизни тепадан дрон орқали кузатишибди. Тўхтаб, ярадорларни бошқа машинага олишимиз билан 2-3 дақиқада тикка устимизга снарядлар учиб келди”, дейди Украина ҚК 28-бригадаси батальонининг тиббиёт пункти бошлиғи Александр.
Ўша дрон ҳужумида шифокорлар машинасидан айрилган, аммо ўзлари тирик қолган. Улар ўқ ёмғири остида ишлашга ўрганиб қолишган. Унча-мунча хавфни писанд ҳам қилишмайди.
Улар ишлаётган ҳудуд фронт чизиғига жуда яқин, шу сабабли бу ерда доим ҳарбий тиббиётчилардан навбатчи туриши лозим. Чунки кимдир ярадор бўлади – уни зудликда эвакуация қилиш керак.
Машина тиббий ёрдам машинаси бўлса-да, кузовдаги барча хоч тасвирлари ниқобловчи тўр билан яширилган. Ҳарбий медиклар айтишича, қизил хоч тасвири Россия ҳарбийлари учун нишон каби бўлиб, кўришлари билан ўт очишар экан.
Путин Украинадаги можарода АҚШни айблади
5 апрель куни Владимир Путин Кремлда 17та давлатнинг янги элчиларини қабул қилди. Ушбу маросимда Путин АҚШнинг янги элчиси Лин Трейсига АҚШнинг 2014 йилда Украинадаги инқилобни қўллаб-қувватлагани ортидан Россия ва Украина ўртасида ҳозирги можаро келиб чиққанини иддао қилди:
“Ҳурматли элчи хоним, биламан, сиз бунга қўшилмаслигингиз мумкин, аммо Қўшма Штатлар «рангли инқилоб»ларни ишга солиб келмоқда. 2014 йилда Киевдаги давлат тўнтаришини қўллаб-қувватлагани бунга яққол мисол. Бу эса якунда бугунги Украина инқирозига олиб келди".
Украинада 2014 йилдаги давлат тўнтаришида руспараст президент ағдарилганидан кейин Россия бунга жавобан Қрим ярим оролини Украинадан тортиб олди ва Украина шарқидаги айирмачиларни қўллаб-қувватлай бошлади.
Путин Россия ҳар бир давлат билан конструктив ҳамкорлик қилишга очиқлигини, дунёдаги мураккаб вазиятга қарамай, ўзини изоляция қилмаслигини урғулади.
Россия ва Ғарб ўртасидаги шундоғам совуқ муносабатлар Украинада уруш бошланганидан кейин янада кескинлашди.
Россия ўз хавфсизлигига таҳдид солаётган Ғарб ҳаракатларини тўхтатиш учун Украинага киришга мажбур бўлганини айтиб келади.
НАТО Россия-Хитой қўшма баёнотига муносабат билдирди
НАТО бош котиби Йенс Столтенберг Россиянинг Беларусда тактик ядро қуролини жойлаштираётгани ҳақида Россия-Хитой қўшма баёнотига муносабат билдирди:
«Россия Хитой билан шартнома имзолагандан сўнг дарҳол Беларусда тактик ядро қуролларини жойлаштириши тўғрисида гапирди. Бу эса Хитой билан ўз чегараларидан ташқарида ядро қуролларини тарқатмаслик тўғрисидаги шартнома шунчаки қуруқ гап эканлигини кўрсатади. НАТО иттифоқчилари буни диққат билан кузатмоқда».
Дмитрий Песков журналистларга Россия НАТО томон эмас, аксинча НАТО Россия томон кенгайиб бораётганини ва шунинг учун ҳам Москва ўз хавфсизлигини ҳимоя қилиш учун чоралар кўриши лозимлигини таъкидлади.
Айни пайтда Хитойнинг ЕИдаги элчиси Пекин Қрим ва Донбасснинг Россияга қўшиб олинганини тан олмаслигини таъкидлади.
Владимир Путиннинг ўтган йил февралида Хитойга қилган сафари чоғида Москва ва Пекин ўртасидаги “дўстлик чек-чегарасиз”лиги ҳақида берилган баёнот, элчи Цунга кўра, нотўғри талқин этилмоқда.
Цунга кўра, Хитой Россиянинг қўшни мамлакатга бостириб киришини қоралаган эмас, чунки Москванинг НАТОга қарши мудофаа урушига оид баёнотини тўғри тушунган. Элчининг айтишича. Пекин Украинадаги урушнинг ҳақиқий сабаблари ғарблик лидерлар айтаётганидан кўра мураккаброқ, деб ҳисоблайди.
Лукашенко: Биз қўлимиздан келганини қиламиз!
Россиянинг энг яқин сиёсий ҳамкори ҳисобланган Белорус президенти Александр Лукашенко икки кунлик ташриф билан Москвага келди ва Владимир Путин билан учрашди.
«Бизни синишимизни кутганларга айтмоқчиман, биз йиқилмадик. Ҳа, бу осон бўлмайди, лекин қачондир осон бўлганми? Биз бардош берамиз ва қўлимиздан келганини қиламиз», деди Белорус президенти Александр Лукашенко.
Ўтган ҳафта Кремль матбуот котиби Дмитрий Песков икки етакчи Лукашенконинг Украинада зудлик билан ўт очишни тўхтатиш ҳақидаги чақириғини муҳокама қилишини маълум қилган эди.
Лукашенко 2022 йил февралида Беларус ҳудудидан Украинадаги «махсус ҳарбий операцияси» да фойдаланишга рухсат берди.