Зеленский: Украина учун курашнинг ҳал қилувчи босқичида турибмиз
Бахмут яқинидаги Украина Қуролли кучларининг снарядлари тугаяпти, дейди фронтдаги жангчилар. Ва айни пайтда Евгений Пригожин ўзининг "Вагнер" ёлланма жангчилари қамал хавфи остида қолганини айтиб чиқди.
Урушни ўрганиш институти хулосасига кўра, Россия қўшинларининг Бахмут йўналишидаги ҳужумлари камайган, аммо фронтнинг бошқа йўналишида вазият кескинлашмоқда.
Хусусан, рус қўшинлари Угледар ва Авдиивка атрофида ҳужум шиддатини оширмоқда, Авдиивка ярим қамалга олингани, шаҳар тўлиқ қамалга олиниши хавфи мавжуд.
Аҳоли шаҳардан эвакуация қилинмоқда.
Бир кун аввал Украина Қуролли кучлари Бош қўмондони Валерий Залужний Бахмут йўналишидаги вазият энг қийин бўлиб қолаётгани, бироқ украиналик ҳарбийларнинг “мардонавор саъй-ҳаракатлари” туфайли “вазиятни барқарорлаштириш”нинг уддасидан чиқилганини айтди.
Украина президенти Владимир Зеленский шу ҳафта Бахмут яқинидаги ҳарбийларга ташриф буюрганди.
Украина президенти Владимир Зеленский: "Биз халқимизнинг турли авлодлари ҳаётининг мазмунига айланган, асрлардан бери давом этиб келаётган Украина учун курашнинг ҳал қилувчи босқичида турибмиз", деди.
Бу ҳақда президент Зеленский Киевдаги Миллий гвадия институтида офицерларга диплом топшириш маросимида таъкидлади.
Халқаро Қизил Хоч қўмитаси: Бахмут атрофида 10 мингга яқин аҳоли танг аҳволда қолган
Халқаро Қизил Хоч қўмитаси қамалда қолган Бахмут шаҳри ва унинг атрофида 10 мингга яқин украиналик тинч аҳоли, кўпчилиги кексалар ва ногиронлар даҳшатли шароитларда кун кечираётгани ҳақда маълум қилди.
Россия кучлари Иккинчи жаҳон урушидан буёнги Европадаги энг қонли пиёда жангида шаҳарни бир неча ойдан бери эгаллашга уриниб келмоқда.
Бир неча минглаб одам шаҳарнинг ўзида қолгани тахмин қилинмоқда, деди сўнгги кунларда уларга ёрдам бериб келаётган Халқаро Қизил Хоч қўмитаси раҳбарларидан бири Умар Хон.
"Одамлар жуда оғир шароитларда яшаб, деярли бутун кунни ер ости бошпаналарда ўтказишган мажбур", дейди Умар Хон Днепрдан видео алоқа орқали Женевадаги матбуот брифингида.
Хон ўзи гувоҳ бўлган вайронагарчилик кўламидан ҳайратда қолганини айтади.
“Ҳарбий отишмада уйлар вайрон бўлди, кўп қаватли уйлар ўпириб ётибди. . . ва баъзи одамлар ҳали ҳам бошпаналарда яшаб, бу шиддатли жанговар ҳаракатлардан омон қолишга ҳаракат қилмоқда”, дейди Умар Хон.
UNHRC Украинанинг босиб олинган ҳудудларида ҳарбий жиноятлар ҳақида ҳисобот эълон қилди
Бирлашган Миллатлар Ташкилотининг Инсон ҳуқуқлари бўйича идораси Россиянинг Украинага бостириб кириши оқибатида минглаб тинч аҳоли ақл бовар қилмас вахшийликларга юз тутгани ҳақда билдирди.
БМТнинг Инсон ҳуқуқлари мониторинги миссияси раҳбари Матилда Богнернинг ҳисоботига кўра, 2023 йил 31 январ ҳолатига кўра, Украинада жинсий зўравонлик қурбонлари сони 133 нафарга етган.
Богнернинг сўзларига кўра, жинсий зўравонлик қурбонлари орасида 85 эркак, 45 аёл ва уч қиз бор.
Аниқланган 109 зўравонлик ҳолатлари "эҳтимол, ҳарбийлар, ҳуқуқни муҳофаза қилиш органлари ва Россия Федерацияси жазони ўташ муассасалари ходимлари томонидан содир этилган", деди Мониторинг миссияси раҳбари.
Ҳисоботга кўра, 2022 йил, 1 августдан 2023 йил, 31 январгача камида 5987 нафар тинч аҳоли ҳалок бўлган ёки яраланган. Бу рақам қотилликларнинг жуда оз қисми бўлиши мумкин, чунки ҳисоботга БМТ мутахассислари текшира олган ҳолатларгина кирган.
Украина назоратидаги ҳудудларда тинч аҳоли орасида қурбонлар сони Россия назоратидаги ҳудудларга қараганда камида тўрт баравар кўп. Мутахассислар босиб олинган ҳудудларда жинсий зўрлаш холатларини ҳам ҳужжатлаштирган.
БМТ Инсон ҳуқуқлари идораси ҳужжатлаштирган жинсий зўравонлик билан боғлиқ 133та ҳолатнинг аксарияти Россия томонидан босиб олинган ҳудудларда, жумладан, "филтрлаш" деб аталадиган жараёнларда" содир бўлган".
Ҳисоботда 214 нафар украиналикнинг Россия томонидан босиб олинган ҳудудларда ғойиб бўлгани ёки “ўзбошимчалик билан ҳибсга олиниши” ва Украина ҳукумати назорати остидаги ҳудудларда 91 та шундай ҳолат ҳужжатлаштирилган.
Ҳисоботда шунингдек, Россия кучлари томонидан болаларга нисбатан ҳам қийноқ қўлланилгани, баъзилари босиб олинган ҳудудларда ғойиб бўлгани айтилади.
БМТ Инсон ҳуқуқлари идораси Украинанинг босиб олинган ҳудудларида камида беш нафар ўсмир боланинг ўғирлаб кетилганини ҳужжатлаштирган, идораси мутахассислари уларнинг ҳаммаси қийноққа солинганидан “жиддий хавотирда”.
Россия минглаб украиналик болаларни Россияга олиб келганини яширмаган.Улар бу амални можаро зонасида етим ва ташлаб кетилган болаларни ҳимоя қилишга қаратилган инсонпарварлик кампанияси сифатида тақдим этмоқда.
Шунингдек ҳисоботда, украин ҳарбийлари қўлида рус асирлари ва рус ҳарбийлари қўлида украин асирлари судсиз қатл этилгани холатлари тилга олинади.
Россия, Днепропетровскнинг Кривой Рог шаҳрига яна Эрон дронларини ташлади
Россия қўшинлари сўнгги 24 соат ичида Бахмут ва унинг атрофидаги ҳудудларга 79 марта ҳужум қилган.
Украина армиясининг қуруқликдаги қўшинлар қўмондони генерал Александр Сирский руслар Бахмутдаги ҳужумларга зўр бериб, ҳолдан тоя бошлади, украин қўшинлари тез орада бундан фойдаланади”, деб таъкидламоқда.
Россия аксар ҳужумларини ҳануз Бахмут шаҳрига қаратган, шунингдек Запорожье ва Херсон вилоятларининг бир қисмида ҳам жанглар давом этаётгани хабар қилинмоқда.
Уруш шаротида томонлар бераётган бу маълумотларни мустақил манбалардан тезкор тасдиқлаш имконсиз бўлиб қолмоқда.
Украина президенти Владимир Зеленский Европани қурол етказиб беришни кўпайтириш ҳамда тезлаштиришга, шу билан бир қаторда Россияга қарши қўшимча санкциялар жорий этишга чақирди.
Зеленскийнинг фикрича, акс ҳолда уруш йилларга чўзилиши мумкин:
«Санкцияларни кенгайтириш керак. Бу бўйича қарорларни кечиктириб бўлмайди. Санкцияларни озиқ-овқат хавфсизлигини баҳона қилиб сусайтирмаслик керак. Кучли санкциялар - бу хавфсизлик дегани, санкцияларни сусайтириш эса янги инқирозга олиб келади. Агар ҳамкорлигимизда кечикиш ёки тўхталишлар бўлмаса ҳамда саъй-ҳаракатларимизни фақат Украина ғалабасига йўналтирсак, шу йил ғалаба қозонамиз. Вақт зиқ. Нафақат ойлар ва ҳафталар, балки бир кун ҳам аҳамиятли. Биргаликда қанча тезроқ ҳаракат қилсак, шунча кўп ҳаётни сақлаб қоламиз».
Зеленский шунингдек, Европа Иттифоқини Украинага аъзолик бериш жараёнини тезлаштиришга чақириб, Украинага ҳарбий ёрдамни ошириш талабини яна бир бор эслатиб ўтди.
«Агар Европа иккиланса, ёвузлик яна куч тўплаб, узоқ йиллик урушга тайёрланиши мумкин. Бунга йўл қўймаслик сизнинг қўлингизда», деди Владимир Зеленский.