Bloomberg: Пригожиннинг хусусий ҳарбий ширкати Украинадан кетиши мумкин
Бу орада, “Вагнер” ХҲШ асосчиси Евгений Пригожин ўз ёлланма аскарларининг Украина урушидаги иштирокини тўхтатиб, эътиборини яна Африкага қаратиши мумкин. Бу ҳақда, ўз манбаларига таянган ҳолда Bloomberg хабар бермоқда.
Агентлик суҳбатдошларига кўра, Россия юқори мартабали ҳарбийлари ва сиёсатчилари Пригожин тимсолида тобора кучайиб бораётган хатарни кўришмоқда. ХҲШ асосчиси ҳозирда Украина жанггоҳларида ўқ-дори етишмовчилигига дуч келган, қолаверса унга Россия қамоқхоналарида маҳкумларни ёллаш тақиқлаб қўйилгани сабабли “Вагнер” сафлари сийраклашиб қолгани ҳақида ҳам маълумотлар бор.
Bloomberg манбалари Бахмут қамали чўзилиб кетгани манзарасида ҳарбий бошлиқлар “Вагнер” ХҲШнинг жанговар самарадорлигига доир ўз шубҳаларини президент Владимир Путинга етказишганини айтишмоқда.
Словакия Украинага тўртта МиГ-29 берди
Словакия Украинага ваъда қилган самолётлардан дастлабки тўртта МиГ-29 ни етказиб берди, қолган самолётлар ҳам яқин ҳафталарда юборилади. Бу ҳақида Словакия Мудофаа вазирлиги хабар берди.
НАТО аъзоси Словакия ўтган ҳафта Украинага самолётлар етказиб беришини эълон қилган эди. Словакия умумий ҳисобда Украинага совет даврида ишлаб чиқарилган 13 та қирувчи самолётлар беришга ваъда берган.
Европа Иттифоқи етакчилари эса, Украинага кўпроқ қурол етказиш масаласини БМТ бош котиби Антониу Гутерриш билан муҳокама қилди.
Музокарада глобал озиқ-овқат хавфсизлиги, Россияга қарши санкциялар, шунингдек, Киевга кўпроқ артиллерия снарядларини етказиб бериш масалалари тилга олинди.
Европа Иттифоқи ижрочи директори, Еврокомиссия президенти Урсула фон дер Ляен Россиянинг жорий санкцияларни четлашга уриниши янги санкцияларга сабаб бўлишини урғулади:
"Украинада содир бўлаётган воқеалар, болаларнинг депортация қилиниши тарихимизнинг энг қоронғу, даҳшатли саҳифалари сифатида муҳрланади. Бу уруш жинояти. Биз бугун 16 200 нафар бола депортация қилинганидан хабардормиз. Ҳозиргача фақат 300 нафар бола ортга қайтган. Бу жиноий ҳаракатлар тўлалигича Халқаро жиноят суднинг ҳибсга олиш ордерларини чиқаришига асос бўлади”.
АҚШ Россия қишлоқ хўжалиги маҳсулотлари экспортига ҳеч қандай чекловлар йўқлигини билдирган ҳолда, Москванинг дон келишувини узайтиришдан олдин Ғарб санкцияларини юмшатиш талабини инобатга олмади.
Европа Иттифоқи ичида Москва иттифоқчиси Беларусга қарши таклиф қилинган янги санкциялар бўйича якдиллик бўлмади. Литва Европа орқали ўғитлар транзитига рухсат берувчи имтиёзларга қарши чиқди, бу эса Африкада озиқ-овқат хавфсизлигини таъминлашни қийинлаштириши мумкин.
Европа Иттифоқи етакчилари ташқи ишлар вазирлари келгуси йил давомида Украинага бир миллион дона артиллерия снарядларини юборишга келишиб олди.
АҚШ президенти Жо Байден Канадага икки кунлик ташриф билан борди
Байден Канада бош вазири Жастин Трюдо билан миграция, Украинага ёрдам, хавфсизлик ва энергия масалаларини муҳокама қилиши кутилмоқда.
Жо Байден ва АҚШ биринчи хоними Жилл Байден Райдо коттежида Трюдо ва унинг рафиқаси билан учрашди. Рейтерсга кўра, учрашув арафасида АҚШ ва Канада мигрантларнинг қуруқлик чегараси орқали ноқонуний кириб келишини тўхтатиш борасида келишувга эришган.
Бундан сал аввал, АҚШ давлат котиби Энтони Блинкен, Конгресс аъзоларига Украинага ажратилиши маъқулланган миллиардлаб долларлик ёрдам жорий йилнинг катта қисмига етишини айтди. Конгресс ўтган йилнинг декабрь ойида Украинага 45 миллиард долларлик фавқулодда ёрдам пакети тўғрисидаги қонун лойиҳасини қабул қилган эди.
Блинкен Вакиллар палатасига давлат ҳаражатлари тўғрисида ҳисобот бераркан, қачон қўшимча маблағга эҳтиёж бўлишига аниқлик киритмади, бироқ ажратилган ёрдам «йилнинг асосий қисмига етади» деди.
Ҳисоб палатаси йиғилишида АҚШ давлат департаментининг 2024 йилга мўлжалланган буджет лойиҳаси кўриб чиқилди. Мазкур буджет лойиҳасида ҳаражатлар жорий йилга нисбатан 11 фоизга кўп.
Қозоғистонда иккиламчи санкцияга қарши чора режаланмоқда
Қозоғистон 1 апрелдан мамлакатга учинчи мамлакатга реэкспорт қилиш учун келтириладиган товарларни онлайн тартибида кузатиш тизимини ишга туширади. Бу ҳақда юқори мартабали мулозимларга таянган ҳолда Financial Times хабар қилмоқда.
“Биз иккиламчи санкциялар билан боғлиқ барча хавф-хатарни тушунамиз, шу боис ҳам барча ҳамкорлар билан ўзаро савдо алоқаларимизни диққат билан кузатяпмиз”, деган нашр суҳбатдошларидан бири. Унинг айтишича, Қозоғистон реэкспортдан бўлажак хавфларни камайтириш устида мунтазам иш олиб бормоқда.
Financial Times ҳавола берган Қозоғистон Миллий статистика бюроси маълумотига кўра, 2022 йилда Қозоистондан Россияга товарлар экспорт қилиш 25 фоизга кўпайган.
АҚШ ва Евроиттифоқ Қозоғистонни санкцияларни четлаб ўтишда Россияга кўмаклашаётганликда гумон қилмоқда. Қозоғистон ҳукумати Россияга Ғарб санкцияларига чап беришда ёрдамлашмаслигини бир неча марта таъкидлаган. Аввалроқ Bloomberg агентлиги юқори мартабали европалик дипломатга таянган ҳолда, Россия ҳарбий саноат учун жуда зарур айрим товарлар, хусусан, микрочипларни чет элдан Қозоғистон орқали келтираётгани ҳақида ёзган.
АҚШ давлат котиби Энтони Блинкен март ойи бошларида Қозоғистонга келганида санкциялар Россияга қўшни мамлакатларга қандай таъсир этаётганини Қўшма Штатлар “диққат билан” кузатаётганини айтаркан, қозоқ ширкатларини Россия бизнеси билан ҳар қандай алоқалардан воз кечишга чақирган эди. Қозоғистон ТИВ раҳбари эса бунга жавобан икки мамлакат ўртасидаги савдо жараёнларини бошқариш ниҳоятда қийинлигини таъкидлаган.
Евростат қайдларига кўра, санкциялар жорий этилганидан сўнг, 2022 йилнинг март–ноябрь даврида Европадан Россияга экспорт 2021 йилнинг шу даврига қиёсан 47 фоизга камайиб, 36.3 миллиард еврони ташкил этган. Бироқ, айни чоғда Европа товарларининг Россияга қўшни бўлмиш Беларусь, Арманистон, Қозоғистон, Грузия, Ўзбекистон ва Қирғизистонга экспорти худди шу даврда 48 фоизга ўсиб, пул қийматида 20,3 млрд еврони ташкил қилган.