БМТ: уруш бошидан буён Украинада 8 мингдан ортиқ тинч аҳоли нобуд бўлди
БМТнинг Инсон ҳуқуқлари бўйича олий комиссари бошқармаси Россия босқини бошланганидан буён Украина тинч аҳолисидан 8 319 киши ўлганини ва 13 892 киши яраланганини қайд этди, дейилади ташкилотнинг ҳафталик ҳисоботида.
“Бошқарма ҳақиқий рақамлар сезиларли даражада катта деб ҳисоблайди, чунки қизғин жанг ҳаракатлари бўлаётган айрим ҳудудлардан маълумот кеч етиб келмоқда, баъзи маълумотлар эса ҳозирча тасдиқлангани йўқ. Чунончи, Мариуполь (Донецк вилояти), Лисичанск, Попасной ва Северодонецк (Луганск вилояти)да тинч аҳоли орасида қурбонлар жуда кўплиги ҳақида хабарлар бор”, дея урғуланади ҳисоботда.
Март ойи бошидан бери Россия зарбаларидан Украинанинг 113 фуқароси ҳалок бўлиб, 356 киши жароҳат олгани қайд этилди.
Россия Халқаро суд ҳақамларини судламоқчи
Россия Тергов қўмитаси Халқаро жиноят суди (ХЖС) прокурори Карим Аҳмад Хон ҳамда судьялар Томоко Аканэ, Розарио Сальваторе Айтали ва Серхио Херардо Угальде Годинесга қарши жиноят иши қўзғатди. Аввалроқ улар Россия президенти Владимир Путин ва болалар омбудсмени Мария Львова-Беловани ҳибсга олиш учун ордер берган эдилар. Халқаро жиноят суди Путин ва Львова-Беловани ҳарбий жиноятларни содир этганликда – Украинанинг ишғол этилган ҳудудидан болалар дохил аҳолини мажбуран кўчирганлик ва куч билан депортация қилганликда гумонламоқда.
Россия Тергов қўмитаси қарашига кўра, Путин ва Львова-Белованинг жиноий таъқиб қилиниши “жиноий жавобгарликка тортиш учун асос йўқлиги сабабли ноқонунийдир”.
Қўмита хабарномасида қайд этилишича, Карим Аҳмад Хон айбсиз шахс, яъни Путинни жиноий жавобгарликка тортмоқчи бўлган ва уни оғир ёки ўта оғир жиноят содир этганликда ноқонуний айблаган. Иддаога кўра, суд “халқаро алоқаларни мураккаблаштириш мақсадида халқаро муҳофазада бўлган хорижий давлат вакилига ҳужум ҳозирлиги кўрилган”.
Тергов қўмитасининг билдиришича, давлат раҳбарлари хорижий давлатлар юрисдикциясига нисбатан мутлақ дахлсизлик”ка эга. .Амалда эса гап ҳарбий жиноятлар тергови ва улар учун жиноий таъқиб ҳақида борса, Халқаро жиноят суди давлат раҳбарлари дахлсизлигини тан олишмайди.
Путин душанба куни Си Цзинпинни Кремлда илиқ кутиб олди
Си Цзинпиннинг уч кунлик ташрифи Ғарб етакчиларига Украинадаги жанглар туфайли Москвани яккалаб қўйиш ҳаракатлари муваффақиятсизликка учрагани ҳақида кучли мужда беради.
Бу Си Цзинпиннинг шу ой бошида қайта сайланганидан кейинги биринчи ва Кремл раҳбари Украина билан боғлиқ уруш жиноятларида айбланиб, халқаро ҳибсга олиш тўғрисидаги Ҳаага суди қароридан кейин бир неча кун ўтиб қилинган хорижга сафаридир. Бу ташриф Путинга сиёсий далда бергани айтилмоқда.
Қримда яна портлашдар содир бўлди
Аннексия қилинган Қримнинг Жанкой шаҳрида 20 март оқшомида бир нечта кучли портлашлар содир бўлди. Маҳаллий телеграм-каналлар хабарига кўра, портлашлар ҳарбий аэродром ҳудудида бўлган, шаҳарга украин дронлари ҳужум қилгани тахмин қилинмоқда.
Ўз навбатида Украина Мудофаа вазирлигининг Разведка бош бошқармаси Жанкойда Россиянинг темир йўл орқали жўнатишга ҳозирланаётган “Калибр” қанотли ракеталари йўқ қилинганини билдирди.
“Сирли “пақиллаш”лар Россиянинг демилитаризация жараёнини давом эттириб, Украинага тегишли Қрим яриморолининг озод этилишига замин яратмоқда”, дейилади украин разведкаси хабарномасида.
Россия Қримга раҳбар қилиб тайинлаган Сергей Аксёнов эса Жанкой ҳудудида Ҳаво мудофаа тизими ишга тушгани, уриб туширилган нишонларнинг бўлаклари турар жой ва дўконга шикаст етказиб, бир киши яраланганини маълум қилди.
Шифокорлар маълумотига кўра, 33 ёшли турғун ўртача жароҳат билан касалхонага ётқизилган.
Айни чоғда ASTRA телеграм-канали аниқлик киритишича, портлашлар Жанкой локомотив депосига, вокзал қўриқлаш хизмати биносига, товар-маҳсулот ва ёқилғи омборларига шикаст етказган. Станцияга ҳужум натижасида локомотив депосининг электр таъминотида узилишлар бўлмоқда.