Путин: МДҲда хатарлар йилдан йилга кучайиб бормоқда
"Норасмий" деб таърифланадиган МДҲ давлатларининг йил якунидаги учрашувларига одатда Россия мезбонлик қилиб келади.
Санкт-Петербургда ўтган икки кунлик йиғилишга Ўзбекистон, Қозоғистон, Қирғизистон, Тожикистон, Туркманистон, Беларус, Озарбайжон ва Арманистон президентлари ташриф буюрган. Сиёсий етакчилар қарийб 7 соат мулоқот қилган.
Рус матбуотига кўра, Путин учрашувни “дўстона давра” деб атаб, “МДҲ маконида чинакам стратегик ҳамкорлик”ни давом эттириш ҳақида гапирган.
"МДҲ давлатлари ҳамкорлигининг яна бир асосий йўналиши Евроосиё минтақасида хавфсизлик ва барқарорликни сақлашдир. Афсуски, бу соҳада ташқаридан келаётган таҳдид ва хатарлар йилдан йилга кучайиб бормоқда. Шуни ҳам тан олишимиз керак, МДҲ давлатлари ўртасида келишмовчиликлар мавжуд. Лекин энг муҳими шундаки, биз доимо ҳамкорлик қилишга тайёрмиз. Баҳсли масалалар юзага келган тақдирда ҳам бир-биримизга дўстона ёрдам кўрсатиб, уларни биргаликда ҳал қилишга интиламиз”, деган Путин.
Путин саккиз президентга узук совға қилди
Россиянинг Украинага уруши давом этаётган бир пайтда Владимир Путин постсовет давлатларининг саккиз раҳбарини Санкт-Петербургга йиғди.
Путин меҳмонларга янги йил байрамига биттадан узук совға қилган.
Беларусь президенти Александр Лукашенкога яқин деб кўриладиган “Пул Первого” Телеграм канали Путиннинг узугини биринчилардан бўлиб Лукашенко бармоғига тақиб олгани ҳақида хабар қилди.
Меҳмонлар орасида бўлган Шавкат Мирзиёевнинг узукни таққан-тақмагани маълум эмас. Унинг матбуот хизмати ҳозирча жим.
Путин ҳамкасбларига нимага айнан узук бергани номаълум. Узук оқ ва сариқ тилла қоришмасидан тайёрлангани айтилмоқда.
Украина Россияни БМТга аъзоликдан чиқариш ташаббусини кўтарди
Санкт Петербургда Путин бошчилигида тўққиз президентнинг машварати давом этаётган бир пайтда Украина Россияни БМТга аъзоликдан чиқариш ташаббусини кўтарди.
Украина Ташқи ишлар вазирлиги бу борада баёнот эълон қилиб, БМТга аъзо мамлакатларни Россия Федерациясининг Бирлашган Миллатлар Ташкилоти ҳамда ташкилотнинг Хавфсизлик кенгаши таркибида бўлиши нақадар легитимлилиги тўғрисидаги масалани кўриб чиқишга чақирди.
Баёнотдаги иддаога кўра, халқаро ҳуқуқ нуқтаи назаридан Россиянинг БМТга аъзолик мақоми масаласи СССР тарқаб кетган 1991 йил декабридан буён тартибга солинмаганлигича қолмоқда.
Баёнотда исталган мамлакатнинг БМТга аъзоликка қабул қилиниши Хавфсизлик кенгаши тавсиясига кўра Бош Ассамблея томонидан амалга оширилиши, бироқ Россияга нисбатан бундай процедура бўлмагани айтилган.
Украиналик дипломатлар фикрича, БМТ низомига мувофиқ, мазкур халқаро ташкилотга фақат тинчликсевар мамлакатларгина аъзо бўла олади, Россия эса Украинага қарши тажовузкорона уруш олиб боряпти ва бошқа мамлакатларга нисбатан ҳам куч қўлланган, шунинг учун у БМТга аъзо бўлишга ҳақли эмас.
Россия ва бошқа мамлакатлар Украина ТИВнинг бу баёнотига ҳали муносабат билдирганларича йўқ. Аввалроқ АҚШ дохил Ғарб мамлакатлари Россияни БМТ Хавфсизлик кенгашидаги жойидан маҳрум қилишнинг юридик механизмлари йўқлигини бир неча бор билдирганлар.
Саратовда ҳарбий базага яна дронлар ҳужум қилди
Россия Мудофаа вазирлиги 26 декабрда Саратов вилоятидаги ҳарбий база устида Украина дронлари уриб туширилиши оқибатида уч нафар ҳарбий хизматчи ҳалок бўлди, деб баёнот берди.
“26 декабрь куни Москва вақти билан тахминан 01:35 да Украина дронлари Саратов вилоятидаги Энгелс ҳарбий авиабазасига яқинлашаётган вақтда уриб туширилди. Дрон бўлаклари қулаши натижасида авиабазада бўлган техник ходимларнинг уч нафари ўлган”, дейилади баёнотда.
Россия ОАВлари аввалроқ Россиядаги ҳарбий авиабазада портлашлар содир бўлганини хабар қилган эди. Бу жорий ойда базага иккинчи дрон ҳужуми бўлди. Россия иккала ҳужумда ҳам Украинани айблаган.
Саратов вилояти губернатори Роман Бусаргин ўзининг Телеграм каналида воқеа ҳақидаги маълумотлар ҳуқуқ-тартибот идоралари томонидан текширилаётганини ёзди. Бусаргин фуқаролик инфратузилмасига зарар етмаганини маълум қилди.
Саратов вилоятидаги авиабазага биринчи ҳужум шу йил 5 декабрь куни содир бўлганди.