Херсон 3 кун ўққа тутилди
24, 25 ва 26 декабрь куни декабрь кунлари Россия армияси Херсон вилоятини тинимсиз ўққа тутди.
Украина томонига кўра, биргина 24 декабрь куни ҳаво ҳужумлари сони 71 тага етган ва асосан, аҳоли гавжум нуқталарга қилинган.
Бу ҳужумларда 16 киши ўлган, 68 киши жароҳатланган. Ракеталарнинг аксари шаҳар марказига ташланди. Украина томонига кўра, ҳужумларда Рождество байрамига бозор қилишга чиққан тинч аҳоли қурбон бўлган.
Озодлик уруш шароитида томонлар бераётган бу маълумотларни тезкор текшириш имконига эга эмас.
Вилоят кенгаши раҳбари Александр Самойленко, кетма-кет ҳужумлар аввалдан режаланган ҳолда айнан гавжум объектларга қаратилганди, деб Россия томонини айблади:
«Шанба куни - биласизми, менда шундай тасаввур борки, бу ҳақиқатан ҳам русларнинг эрмаги бўлиб қолди - шаҳар ва қишлоқларни ўққа тутмоқда. Шанба куни 16 киши ўлди, 68 киши жароҳатланди. Бу бутун Херсон вилояти бўйлаб… Мен тушунмайман, жума оқшом шаҳар марказидаги полклиникани нега ўққа тутилди, фақат шу бинони вайрон қилиш учундир. Шанба оқшомида, яна Рождество байрами арафасида марказий бозорни ўққа тутишдан мақсад - бу жой одамларни тортиб туради… Жума, шанба, якшанба кунлари - бу бозор кунлари, одамлар фақат харид учун эмас. Бир-бири билан гаплашиш учун ҳам бозорга йиғилади. Шу боис, меничма ҳаммаси аввалдан аниқ режаланган херсонликлар, украинлар ва инсониятга қарши геноцид».
Украин-белорус чегарасида ҳарбийлар машқ учун йиғилди
Беларус билан чегарага яқин ҳудудда Украина Қуролли Кучлари Миллий гвардияси ҳарбий машғулотлар ўтказди.
Украина Қуролли кучлари матбуот хизмати эълон қилган видеода ҳарбий хизматчиларнинг тактик ҳаво-десант ҳужуми олдини олишни машқ қилаётгани акс этган.
Сўнгги ҳафталарда Беларус ва Россия билан ҳарбийлари, бу ерга яқин чегараолди ҳудудида ҳарбий машғулотлар ўтказмоқда.
Украина расмийлари, Россия Беларус ҳудуди орқали Украинага янги ҳужумга ўтишга тайёрланяпти, деб хавотир қилмоқда.
Зеленский: Москва 2022 йилнинг сўнгги кунларида ҳам Украинани “зулмат ва қийинчиликда” қолдириш ниятида
Киевда Янги йилга ўтар тунда ҳам комендант соати бекор қилинмайди, шу кунда комендантлик соати тунги соат 23.00 дан тонгги соат 05.00 гача давом этмоқда.
Айни пайтда, пойтахтдаги София майдонида 19 декабрь куни мамлакатнинг бош арчаси – “Енгилмаслик арчаси” ўрнатилди.
Якшанба оқшомида украиналикларни Рождество байрами билан табриклаган президент Владимир Зеленский байрам кунлари одамларни ҳаво тревогасига оид хабарларга диққатли бўлишга ҳамда энг яқин жойдаги бомбапаноҳ қаердалигини олдиндан аниқлаб қўйишга чақирди.
Владимир Зеленский, Москва 2022 йилнинг қолган кунларида ҳам Украинани “зулмат ва қийинчиликда” қолдириш ниятида, деди:
"Йил тугашига саноқли кунлар қолди. Душманимиз қолган кунларни ҳам биз учун зулмат ва қийинчилкда ўтишини хоҳлайди. Россия ўтаётган йилда жуда кўп нарсани йўқотди. Лекин Kремль ўз йўқотишларини ёлғон пропаганда билан яширишга ҳаракат қилмоқда. Улар бизнинг энэргетика инфратузилмамизга зарбалар бериб вайрон қилмоқда. Бироқ шунга аминманки, зулмат босқинчиларни ер тишлатишимизга тўсқинлик қилмайди. Шу билан бирга биз ҳар қандай воқеалар ривожига тайёр бўлишимиз керак”.
Худди шу куннинг ўзида Владимир Путин Украинадаги урушда иштирок этаётган барча томонлар билан музокаралар олиб боришга тайёр эканини билдирди. Бироқ Путинга кўра, Киев ва унинг ғарбдаги иттифоқдошлари музокаралардан бош тортган.
Кремл барча мақсадларига эришмагунча курашамиз демоқда, Киев эса охирги рус аскарини чиқариб юбормагунча тўхтамаслигини айтади.
Россиянинг октябрь ойидан бери давом этаётган тинимсиз ракета ва дрон ҳужумлари Украина энергия тизимига катта зарар етказди, йирик шаҳарларни сув ва иссиқлик таъминотисиз қолдирди.
Россия армияси Донецк вилоятида ҳужумларини кучайтирмоқда
Бу ҳақда вилоят ҳарбий маъмурияти Павел Криленконинг маълум қилишича, Угледар, Курахова ва унга туташ ҳудудларда отишмалар кучайган.
Рус армиясининг босқинни кучайтираётганига оид бу хабарларни Украина ҳарбийлари ҳам тасдиқламоқда. Украин томонига кўра, бундай ҳужумларни ҳар кун қайтармоқдалар ва бунда рус аскарлари кўп нобуд бўлмоқда.
Уруш шароитида томонлар бераётган бу маълумотларни тезкор шаклда мустақил манбалардан тасдиқлаш имкони йўқ.
Настоящее Время телеканали журналисти Борис Сачалко Угледарда бўлиб, рус армияси ҳужумларига гувоҳ бўлди. Унинг хабар қилишича, украин аскарлари Россия армияси ҳужумини Американинг йирик калибрли "Браунинг" ва совет давридан қолган Дегтярев пулемётлари билан қайтармоқда.
Угледара – ҳозир Донбасс минтақасининг энг оловли нуқталаридан бири бўлиб қолмоқда.
“Бу катта калибрли қурол, тез отар, узодан нишонга олади, 2 км.гачча масофадаги нишонни уради. Охирги марта, улар 26 киши эди. Ёмғир, туман. Биз бу 26 кишини "Браунинг" қуроли билан йиқитдик. "Браунинг"да ярадор қолмайди, унинг калибри шунақа катта”, дейди “Маэстро" лақабли командир.
Бу украин аскарлари жойини аниқлаш учун эса, Россия армияси дронларни қўллаётгани айтилмоқда.
Бу дронлар нафақат аскарлар жойини аниқлайди, баъзан ўша нуқталарга миналар ташлайди. Шу боис, дронлар фронтда пайдо бўлиши билан украин аскарлари яширинади.
"7 ўлимдан омон чиқасан, лекин вақти келса биридан қочолмайсан”, дейди командир ҳазиломуз.
Аммо, ҳар гал бу уруш бирма-бир сафдошларини олиб кетаётганини кўрганда ғуссага тушади:
"Бир сафдошимиз яраланди, яна бири - 300--чисини олиб кетишди. Ва буларнинг ҳаммасини кўз ўнгимда содир бўлади. Азоб. Яқин ва қадрдон кишилар учун юрагинг ачишади”.