Путин “Патриот”ни Россиянинг S-300 тизимига қиёслаб, “бунчалик самаралимас” деди
Россия президенти Владимир Путин АҚШ Украинага етказиб бериши кутилаётган “Патриот” ҳаво ҳужумидан мудофаа тизимини эски қурол, деб атади:
"Патриотга келсак, бу анча эски тизим ва у Россиянинг S-300 тизими каби самарали эмас. Бизга қарши чиқаётганлар бу мудофаа қуроли эканини билади. Биз буни ҳисобга оламиз ва бунга қарши чора албатта топилади. Бу ҳеч қандай наф бермайди, шунчаки можарони узайтиради”.
Путин, Россия Украинадаги уруш тугаши ва барча қуролли низолар дипломатик музокаралар билан якунланишини хоҳлашини ҳам айтди.
“Бизнинг мақсадимиз ҳарбий можаронинг ғилдирагини айлантириш эмас, аксинча урушни тугатиш. Бунга интиламиз ва бундан кейин ҳам ҳаракат қиламиз. Бунинг бажарилиши қанча тез бўлса, шунча яхши”, деди Россия раҳбари.
Фронтдаги ҳарбийлар АҚШ ёрдамига умид қилмоқда
Донецк фронт чизиғида жанг қилаётган украиналик ҳарбийлар АҚШ янги ҳарбий ёрдамни эълон қилганидан хурсанд.
“Бу бизга ёрдам беради, деб ўйлайман. Бизда қанча кўп оғир қурол бўлса, уруш шунча тезроқ тугайди. Оғир техника ва артиллериянинг жанговар вазифаларни тўлақонли бажаришдаги аҳамияти юқори. Автомат ўзини ҳимоя қилиш учун керак. Артиллерия барибир муҳим аҳамиятга эга", дейди украин ҳарбийларидан бири.
АҚШ Сенати Украинага яна қарийб 50 миллиард долларлик ёрдамни маъқуллади
АҚШ Конгресси Сенати мамлакатнинг 1 триллион 700 миллиард долларлик 2023 йилги бюжет режасини маъқуллади.
Бу ҳаражатнинг 44 миллиард 900 миллион долларини Украинага ажратиш кўзда тутилган. Украинанинг АҚШдаги элчиси Оксана Маркарова, Вакиллар палатасида бу режа жума куни овозга қўйилади, сўнгра уни президент имзолайди.
Дипломатга кўра, Украинага ажратилган қарийб 50 миллиард долларлмк маблағнинг:
- 28,4 млрд. ҳарбий ёрдам бўлади. Жумладан, армияни техника, қурол-яроғ, ускуна, разведка ахбороти, шунингдек шу пайтгача Украинага берилган Амрерика ҳарбий омборини зарур таъминот билан тўлдиришга ажратилади.
- 13,37 млрд доллари эса иқтисодий ҳамда бюджетга ёрдам сифатида ҳукуматга берилади. Шу жумладан, бу сумма энергетик ёрдам ҳамда бу урушдан азият чеккан бошқа давлатларга ёрдам сифатида ажратилади.
- 4,92 млрд долларлик қисми эса Украинанинг гуманитар эҳтиёжлари, украиналик қочқинлар ва бошқа аҳолининг ҳимоясиз қатлами учун ажратилади.
Байден Украинага, 1 млрд 850 млн доллар турадиган “Патриот” номли ракетага қарши мудофаа тизимини ўз ичига олувчи ҳарбий ёрдам берилишини билдирди.
АҚШ томони кўрсатаётган бу ёрдамни, украиналик ҳукумат мулозимлари ва экспертлар, Кремл ҳамда Пекин учун жиддий сигнал, деб баҳоламоқда.
“Бу аслида бутун дунё мамлакатлари учун, Россия ҳарбий агрессиясига қарши курашаётган давлат эркин Америка диёри ва умуман Қўшма штатлар томонидан қўлланаётганини кўрсатувчи ишоратдир. Бу ишорат. Биринчидан бу Кремл учун, иккинчидан Пекин, учинчидан Европадаги ҳамкорларимиз учун ишоратдир. Кремл ва Пекин шуни аниқ тушуниб олиши керакки, бу ҳаракат - Қўшма Штатлар ва Ғарбдаги бошқа ҳамкорларимиз бу позициясидан чекиниш ниятида эмаслигини кўрсатади. Чунки, улар айни пайтда ўзини ва умуман олганда дунёдаги барқарорни қўлламоқда. Ғарбдаги ҳамкорларимиз учун эса, будан ҳамма бирга қарши туриши кераклиги ва Украинага умумий ғалабамиз учун ёрдам бериш кераклиги ҳақидаги жиддий ишоратдир. Яъни Украина масаласини энг юқори даражана кўташи лозим, энг юқори даража эса шубҳасиз Оқ Уй, Вашингтондир”, дейди Украина собиқ бош вазири Арсений Яценюк.
АҚШ Конгресси Зеленскийни тик оёқда олқишлади
Украина президенти Владимир Зеленскийнинг уруш бошланганидан кейин биринчи хорижий ташриф билан АҚШга борди.
У барча америкаликларни, Украинани реваншист Россияга қарши курашда ҳарбий ва молиявий томондан қўллаб-қувватлашни давом эттиришга чақираркан, Украина ғалабасидан бошқа cценарий эркин дунёга, шу жумладан АҚШ хавфсизлигига ҳам таҳдид солишидан огоҳлантирди.
Зеленский минглаб чақирим узоқликда, америкаликлар ҳеч қачон эшитмаган шаҳарларда олиб борилаётган уруш, АҚШга ҳам бевосита таъсир қилаётганини алоҳида қайд этди.
У шунингдек, Украинада глобал эркинлик ва демократия ҳамда Америка хавфсизлиги хавф остида эканини таъкидлаб, Россия билан урушни - АҚШ тарихидаги Мустақиллик урушига қиёслади:
“Украина мудофааси нафақат украин халқининг ҳаёти, эркинлиги ва хавфсизлиги учун керак, балки украиналиклар ва америкаликлар учун демократиянинг истиқболини белгилаб беради”.
Уруш "музлатиб қўйиладиган ёки кейинга қолдириладиган нарса эмас”. Океан урушдан ҳимоя қилади деб уни эътиборсиз қолдириб ҳам бўлмайди".
Зеленскийнинг Қўшма Штатларга сафари Конгресс, Украинага 45 миллиард долларга яқин қўшимча ҳарбий ёрдам ажратишни назарда тутувчи қонун лойиҳаси муҳокамага қўяётган пайтга тўғри келди.
Зеленский Оқ уйда АҚШ президенти Жо Байден ва АҚШ биринчи хоними Жилл Байден билан учрашди.
"Украин халқи номидан жаноб президент сизга, Конгрессга ва америкаликларга раҳмат айтмоқчиман", деди Зеленский.
Зеленский ташрифининг аввалида АҚШ давлат котиби Энтони Блинкен Қўшма Штатлар Украинага Патриот ҳаво ҳужумидан мудофаа тизимларини беришини маълум қилди.