АҚШ Украинага разведкачи-ҳужумчи дронларни беради
АҚШнинг Politico нашрига кўра, Владимир Зеленский, Жо Байдендан Украинага Gray Eagle ва Reaper дронларини етказиб беришни илтимос қилиши мумкин.
Бу разведкачи-ҳужумкор дронлар бўлиб, осмонда разведка олиб бориши билан бирга, нишонларга ракеталар билан зарбалар бериши, шунингдек душманнинг алоқа воситалари ишлашига халал бериши мумкин.
Gray Eagle ва Reaper кичикроқ учоқ катталигидаги дронлар бўлиб, қанотлари узунлиги 17 дан 22 метргача бўлади. Модификацияси ва олган юкига қараб улар ҳавода 10 соатгача бўлиши мумкин, муайян шарт-шароитда эса бир суткадан ортиқ парвоз қила олади.
Politico журналистларига кўра, Зеленский АҚШ президентидан сўраши мумкин бўлган яна бир қурол бу ATACMS ракеталаридир.
“Агар ATACMS ракеталарини беришса, биз душманнинг фронтдан анча ичкаридаги – уч юз километр радиусда жойлашган кучларини, омборлари ва қўмондонлик пунктларини йўқ қила оламиз. Энг аввало ракета ва дрон учириладиган нуқталарга зарба беришимиз керак. Бу ракеталар урушда бир қадар мувозанат яратади. Мен кўпроқ ҳаво ҳужумидан мудофаамиздаги ўзгаришларни қайд этган бўлардим. Бизга берилаётган Patriot қанотли ракеталардан ташқари баллистик ракеталарни ҳам уриб тушира олади, бизда ҳозир мавжуд қуроллар бунақа имкониятга эга эмас. Бироқ, шунга қарамай, мазкур қуроллар урушда туб бурилиш ясайди, деб айтмаган бўлардим”. Эксперт исмли линкдаги видеода.
Путин: Россия “махсус амалиёти”ни тўлиқ бажаради
Президент Владимир Путин эса, Россия ўзи ўтказаётган махсус ҳарбий амалиёт олдига қўйилган барча вазифаларни бажариши ва қуролли кучларни мустаҳкамлашда давом этишини, билдирди.
Путин шунингдек, “Сармат” қитъалараро баллистик ракетаси тез орада жойлаштирилишини ҳам урғулади.
“НАТО давлатлари Россия билан курашда бор ҳарбий имкониятидан фаол фойдаланяпти. Россия ўз арсеналини замонавий қуроллар билан кенгайтириши зарур”, деди Владимир Путин.
Россия президенти стратегик ядровий кучларининг замонавий қуролланиш кўрсаткичи 91 фоиздан ошганини таъкидлаш билан бирга Россия суверенитети кафолати бўлган ядровий триаданинг жанговар тайёргарлигини сақлаб туриш ва яхшилашни буюрди.
Россия мудофаа вазири Сергей Шойгу Россия қуролли кучлари сонини 1,5 миллион ҳарбий хизматчига етказишни таклиф қилди.
Шойгу шунингдек, 27 давлат Украинага 97 миллиард долларлик қурол-яроғ етказиб берганини билдирди.
“Роскосмос” собиқ раҳбари Рогозин Донбассда яраланди
“Роскосмос”нинг собиқ раҳбари, ҳозир Донбассда бўлиб турган ва Украинага қарши урушда иштирок этаётган Дмитрий Рогозин, 21 декабрь куни оқшом, Донецк шаҳри ўққа тутилиши натижасида жароҳатланиб, касалхонага ётқизилди.
Бу ҳақда Рогозиннинг ёрдамчисига ҳавола берган ҳолда ТАСС агентлиги хабар қилди.
“Донецк чеккасидаги меҳмонхона ўққа тутилди. Дмитрий Рогозин бошлиқ ҳарбий маслаҳатчилар сўнгги ойларда ўша ерда яшаб турган эди. Дмитрий Олегович яғринидан яраланди. Ҳозир касалхонада. Ҳаётига ҳеч нима таҳдид солаётгани йўқ”, деган у.
Рогозиннинг ўзи ҳам кейинроқ телеграм-каналида воқеа “тор доирада ва тинч вазиятда ўтказилаётган иш бўйича учрашув” чоғида рўй берганини маълум қилди.
“Биз сўнгги ойларда шу ерда яшаб турган эдик, 8 йил давомида душман бу ерни бир марта ҳам ўққа тутмаганди. Кимдир хабар қилган шекилли, соат 19.45 ларда аниқ нишонга урадиган бир неча снарядлар учиб келди. 120 ва 155 мм калибрли снарядлар.
Қаердан отилганини ва ким отганини тергов аниқлайди. Мен яраландим, ўнг курагимдан тепароққа 3х4 ўлчамли темир парчаси кириб қолди. Жарроҳлар амалиёт қилиб олиб ташлашади. Менга яқин бир неча киши ҳам жароҳатланган”, деб ёзди Рогозин.
Россия Мудофаа вазирлиги: Тинч аҳоли ўлими ҳақида маълумот йўқ
Россия Мудофаа вазирлиги, ҳарбий амалиёт бошланганидан бери ҳалок бўлган Украина тинч аҳолисига доир маълумотлар йўқлигини билдирди.
Вазирлик Россия армияси ҳақида фейк хабарлар тарқатишда айбланаётган журналист Андрей Новашовнинг ҳимоячиси адвокат Марина Янкинанинг сўровига шундай жавоб берган.
21 декабрь куни суд мажлисида Новашовнинг ҳимоячиси ишни прокуратурага қайтаришни талаб қилган эди. Адвокат Янкина ўз ҳимоясидаги журналист Новашов Россия армиясининг Мариуполга ҳужумлари тинч аҳоли, жумладан болалар ўлимига олиб келгани ҳақидаги хабарини “қасддан ёлғон маълумот тарқатиш” деб топганига эътибор қаратди, деб ёзади Сибирь.Реалии.
Ҳимоячи фикрига кўра, Новашовнинг “ВКонтакте” тармоғидаги хабарларини “қасддан ёлғон маълумот тарқатиш” деб ҳисоблаш мумкин эмас, чунки ушбу маълумотларга раддия бериб бўлмайди, чунки Россия томони Украинадаги ҳарбий ҳаракатлар чоғида қанча тинч аҳоли қурбон бўлгани хусусида расмий ахборот берган эмас.
“Менга Путин ёки Мудофаа вазирлиги нуқтаи назарига зид ахборотни тарқатиш, деган моддани қўйишлари мумкин холос Аммо Жиноят кодексида бунақа модда йўқ”, деган журналист Андрей Новашов.