Польша ҳудудига "Россия ракеталари" тушди
Сешанба куни Польшанинг Украина билан чегара яқинида иккита ракета портлаган. Дастлабки маълумотга кўра, икки киши ҳалок бўлган. Бу ҳақда Польша радиоси ва Associated press агентлиги хабар берди.
Агентлик АҚШ разведкасининг исми ошкор этилмаган юқори мартабали мулозимларига таяниб хабар беришича, ракеталар Полша ҳудудига учган ва улар Россияга тегишли.
Польшанинг “Radio ZET”радиостанцияси хабарига кўра, ракеталар Пшеводов қишлоғида портлаган.
Портлашлар ортидан Польша ҳукумати хавфсизлик ва мудофаа қўмитасининг фавқулодда йиғилишини ўтказмоқда, деб ёзади “Gazeta Wyborcza”. Баъзи польшалик журналистлар бу рус ракеталари эканлигини даъво қилмоқда. Бироқ, улар Украина ҳаво мудофаасининг С-300 ракеталари бўлиши ҳам мумкин.
Ҳодиса ҳақидаги маълумотни Латвия мудофаа вазири Артис Пабрикс ҳам тасдиқлади.
"Польшалик қуролли биродарларга ҳамдардлик билдираман. Россиянинг жиноий режими ракеталарни учирмоқда, улар нафақат Украина фуқароларига, балки Полшадаги НАТО ҳудудига ҳам келиб тушди", - деб ёзди Пабрикс Twitter саҳифасида.
Пшеводов қишлоғи Украинанинг Львов вилояти билан чегарасидан беш километр узоқликда жойлашган.
Россия сешанба куни Украина шаҳарларини яна ҳужумга тутди. Уларнинг асосий мақсади - энергетика инфратузилмаси объектларини яксон қилиш. Украина президенти девони маълумотларига кўра, энергия таъминоти тизимига ракета ҳужумларидан сўнг Украинада 7 миллионга яқин хонадон электрсиз қолган.
Киев ва Киев вилоятида портлаш овозлари эшитилмоқда
“Украинска правда” хабарига кўра, сешанба куни Киевда портлаш овози эшитилган.
Тармоқларда ракета зарбасидан кейин Киев узра тутун кўтарилаётгани акс этган видеолар эълон қилинди.
Киев ҳокими Виталий Кличко шаҳарнинг Печерский туманида иккита турар-жой биносига зарба берилганини айтди.
"Киевда ҳаво ҳужумидан мудофаа тизимлари бир нечта ракеталарни уриб туширди. Печерский туманида иккита турар-жой биносида тиббиётчилар ва қутқарувчилар ишламоқда. Батафсил маълумот кейинроқ", деб ёзади Кличко. Телеграм каналида.
Аввалроқ бутун Украинада ҳаво огоҳлантириши эълон қилинган эди.
Ҳаво ҳужумидан мудофаа тизими Украинанинг Чернигов ва Суми вилоятларида ҳам ишлагани хабар қилинмоқда.
FIFA раҳбари Россия ва Украинани оташкесимга чақирди
FIFA президенти Жанни Инфантино Россия ва Украинани Қатарда бўлиб ўтадиган футбол бўйича жаҳон чемпионати вақтида бир ойлик оташкесимга чақирди.
Инфантино Индонезияда йиғилган Катта йигирматалик саммити етакчиларига Жаҳон чемпионати тинчлик ва бирдамлик учун “ўзига хос платформа” бўлишини айтди, чунки тадбирни телевизор орқали 5 миллиардга яқин одам томоша қилади.
"Шундай экан, менинг барчангиздан илтимосим - Жаҳон чемпионати давомида бир ой давомида вақтинчалик сулҳ режимида қолиш", деди у Индонезиянинг Бали оролида G20 етакчилари билан тушлик пайтида.
Зеленский G20 етакчиларига мурожаат қилди
Украина президенти Владимир Зеленский Индонезиядаги "Катта йигирматалик" саммитига йиғилган саноати ривожланган давлатлар раҳбарларига видеомурожаат билан чиқиш қилиб, Россия томонидан Украинада олиб борилаётган урушни тўхтатишга чақирди.
"Ишончим комилки, ҳозир Россиянинг бузғунчи урушини тўхтатиш керак ва тўхтатилиши мумкин бўлган вақт. Бу минглаб одамларнинг ҳаётини сақлаб қолади", - деди Зеленский ўзининг видеомурожаатида.
У АҚШ президенти Жо Байден ва Хитой раҳбари Си Цзинпин каби етакчиларга мурожаат қилди, лекин бу мурожаати Россияга тегишли эмаслигини очиқ айтди.
Шунингдек, Зеленский уруш “адолатли тарзда, БМТ Низоми ва халқаро ҳуқуқ асосида” якунланиши кераклигини айтди.
У Запорижье АЭСда радиация хавфсизлигини тиклаш ва Россия энергия ташувчилари учун нарх чегарасини жорий этишга чақирди.
Зеленский урушни тугатиш учун Россия ўз қўшинларини олиб чиқиб кетиши, Украинага й\етказилган зарар учун товон тўлаши ва унинг ҳудудий яхлитлигини тасдиқлаши кераклигини яна бир бор таъкидлади.
Президент, шунингдек, “урушдан кейинги хавфсизлик архитектурасининг асосий элементини мустаҳкамлаш” ва Россия тажовузкорлиги такрорланишининг олдини олиш бўйича халқаро конференция ўтказишга чақирди. Украина президенти, шунингдек, барча украиналик ҳарбий асирлар озод қилиниши кераклигини айтди.
Унинг асосий илтимосларидан бири Украина ғалласи бўйича июль ойида БМТ ва Россия ўртасида тузилган битимни узайтириш эди. Бу Россия ҳарбий кемалари томонидан Украина портларида тўсиб қўйилган озиқ-овқат маҳсулотларини экспорт қилиш имкониятини тақдим этди. Бирлашган Миллатлар Ташкилотининг билдиришича, келишув бошланганидан буён 10 миллион тонна Украина дони ва бошқа қишлоқ хўжалиги маҳсулотлари муваффақиятли экспорт қилинган ва бу глобал озиқ-овқат инқирозининг олдини олишга ёрдам берган. Шартнома муддати 19 ноябрда тугайди. Зеленский, уруш қачон тугашидан қатъи назар, келишув номаълум муддатга узайтирилиши кераклигини айтди. "Озиқ-овқатга бўлган ҳуқуқ дунёдаги ҳар бир инсоннинг асосий ҳуқуқидир", деди у шартномани Николаев вилоятидаги бошқа портларга ҳам кенгайтиришни таклиф қилди.