Блинкен 8 сентябрь куни у Киев яқинидаги Ирпинга борди
Украина тезкор қарши ҳужумлар билан шарқ ва жанубдаги ҳудудларини қайтариб олганини маълум қиларкан, АҚШ Давлат котиби Энтони Блинкен Украинага кейинги ёрдам пакетини муҳокама қилиш учун Киевга боди.
“Бу биноларга бир қаранг - барчаси фуқаролар турар жойлари. Бир қарашда бу бефарқлик оқибатидек кўринади. Энг ёмон ҳолатда эса бу қасддан қилинган хунрезлик”, деди Блинкен.
Бу Блинкеннинг Россиянинг февраль ойидаги босқинидан кейин Украина пойтахтига иккинчи ташрифи.
Блинкен, Украина Ташқи ишлар вазири Дмитрий Кулеба билан учрашди ҳамда болалар касалхонасига ташриф буюрди ва у ерда Россия бомбардимонларидан яраланган болаларни бориб кўрди.
АҚШ Давлат котиби, келажакда Россия тажовузи хавфи остида бўлган 18 давлатга ва Украинага 2,2 миллиард доллар ҳарбий ёрдам ҳақида эълон қилди.
Тахминан 1 миллиард доллар Украинага ажратилади. Қўшма Штатлар, шунингдек, Украинага қўшимча 675 миллион долларлик қурол-яроғ ажратилишини ҳам ваъда қилган.
“Ўнлаб аҳоли пунктларини озод қилинди”
Украина президенти Владимир Зеленский видеомурожаатида Киев кучлари сентябрь ойидан бери “ўнлаб аҳоли пунктларини озод қилгани” ва шарқ ва жанубда 1000 квадрат километр ҳудудни қайтариб олганини айтди.
"Мудофаа операциялари давомида қаҳрамонларимиз ўнлаб аҳоли пунктларини озод қилди. Бу ҳаракат бугун ҳам давом этмоқда ва яхши натижалар бор. Умуман олганда, 1 сентябрдан буён 1000 квадрат километрдан ортиқ ҳудудимизни озод қилдик. Бунда иштирок этган барчага раҳмат. Яна кўтарилган Украина байроғи учун армияга, разведкачиларга, махсус зобитларга раҳмат айтаман”.
Аввалроқ украиналик Украина армияси генерали рус қўшинларидан 117 квадрат километр ҳудуд қайтариб олингани ва Украина армияси Россия фронт чизиғидан 77 километр олдинга силжиганини маълум қилган.
Россия Харьков ҳудудида жанглар бўлганини тасдиқлади, бироқ йўқотишлар ҳақида ҳеч нима демади.
Украина бир неча ҳафтадан бери жанубда, Херсон яқинида катта қарши ҳужумлар ҳақида гапирмоқда. Ғарб ҳарбий таҳлилчиларининг фикрича, Россия жанубни мустаҳкамлашга шошилар экан, бошқа ҳудудларда ҳушёрликни йўқотаётган бўлиши мумкин.
Сўнгги ҳарбий ҳаракатлар:
Украина президенти Владимир Зеленский, армияси шимоли-шарқда устунликка эришганини айтмоқда.
Россия Мудофаа вазирлиги матбуот котиби Игор Конашенков эса, Украина қўшинлари сўнгги 24 соат ичида катта йўқотишларга учрагани боис, Николаевдан Кривой Роггача бўлган йўналишда ҳужум уюштира олмайди, деб баёнот берди.
Россия ҳарбий ҳаво кучлари, артиллерия ва ракета бўлинмалари ҳудуддаги Украина қўшинларига ҳужум қилишда давом этмоқда.
Россия томони даъвосича, Украина армияси 20 га яқин жанговар техникасини йўқотган. Россия армияси Украинанинг жанубий фронтдаги ўқ-дорилар омбори, Бук-М1 ракета тизимлари ва радарларини ҳам йўқ қилганини иддао қилмоқда.
“Россия Константиновка ҳудудида Украина ҳарбий-ҳаво кучларининг Су-25 қирувчи самолётини уриб туширди ва Херсон, Харьковда ҲАЙМАРС тизимидан учирилган 10 дан ортиқ ракетани тутиб олди”, дея таъкидлади Конашенков.
Украина Қуролли Кучлари Бош штаби эса, Украина қўшинлари ўтган кун ичида Донецк вилоятининг фронт чизиғидаги кўплаб жойларда Россия ҳужумларини қайтарганини даъво қилмоқда.
Харьков вилояти ҳарбий маъмурияти раҳбари Олег Синегубов маълум қилишича, тунда вилоят ўққа тутилиши натижасида 4 нафар тинч фуқаро нобуд бўлган, иккиси Харьковда, яна иккиси Изюм ва Чугуев туманларида бўлган.
Харьков шаҳри мэри Игорь Терехов ҳам шаҳар яна ўққа тутилганини билдирди. Унга кўра, Россия қўшинлари шаҳарнинг шимоли-шарқида жойлашган Киев туманидаги турар-жой даҳаларига зарба берган.
“Хайриятки, ҳеч ким жабр кўрмади, лекин бир нечта уй қисман вайрон бўлди. Ёнғин йўқ. Тахминимизча, ялпи ўт очиш тизимларидан ўққа тутишган”, деб ёзди у.
Украина Қуролли кучлари бош қўмондони Валерий Залужний ҳарбий разведка ҳисоботида Россия-Украина можароси келаси йилга қадар давом этиши мумкинлигини таъкидлаган.
Уруш шароитида томонлар бераётган ўзаро зид маълумотларни мустақил манбалардан тасдиқлаш имконсиз бўлиб қолмоқда.
Уруш бизнесини синдирган, аммо умидини синдирмаган фермер
Фермер Александр Кривошея урушга қадар Киев вилоятида катта хўжаликни юритарди. Россия ҳарбийлари бостириб келишгач, унинг фермасини эгаллаб олиб, ўша ердан Украина ҚК позицияларига ўт оча бошлашади.
Кунларнинг бирида Александр ферманинг аниқ координатларини Украина ҚКга юборади ва бу билан россияликлар турган позицияга зарбани тўғри йўналтиришга, душман техникаларини йўқ қилишга кўмаклашади.
Ўша отишмалардан ферма қаттиқ зарар кўрди: бир нечта снаряд ғалла омборига тушиб, батамом кулга айлантирди. Чорва молларидан анча-мунчаси нобуд бўлди. Аммо Александр ва оиласи тушкунликка тушмади: кредит олиб, хўжаликни тиклашга бел боғлади.
Александрнинг фермаси Козаривичи қишлоғида жойлашган. Дарвоза олдида сизни қўриқчи – Рекс лақабли ит қарши олади.
“Рекс урушдан эсон-омон чиқди. Бошига снаряд парчаси кириб кетишига сал қолувди, хайриятки, тирик қолди, бир оз контузия бўлди холос”, дейди Александр Кривошея.
Рексга масъулиятли вазифа топширилган: у бир отар қўйни боқиб келади. Уруш бошлангунича Александрнинг 170 бош қўйи бор эди. Ҳозир 30 тача қолган. Ферма ҳудудида снарядлардан қолган чуқурлар кўп, иморатларнинг бари вайрон бўлган.
“Ўттизтача қўйим ўлди, қолганини руслар еб кетди. Бир ой таъминотсиз қолиб, шу билан жон сақлашди. Омборларим шифтгача тўлган эди. Деворга қаранг, қаергача ёниб борганини кўрасиз. Анави ерда трактор турарди, снаряд тегиб бир уюм темирга айланди”, дейди фермер.
Россия қўшинлари Киев яқинидан чекингач, эр-хотин хўжаликни тиклашга киришди: таниш фермерлардан қарзга уруғлик олиб, ғалла экишди. Биринчи ҳосилни йиғиб олишга ҳам улгуришган. Айтишича, руслар кетганидан сўнг далада қолган мина ва снаряд парчалари кўп бошоғриқ бўлган.
Қарзга ботган бўлишса-да, ишлари ўнгланиб кетишига ишонишади. Айни чоғда Александр уруш тугамаганини, Россия армияси яна Киевга ҳужум қилиши мумкинлигини ўйлаб баъзан алағда бўлаётганини айтади.
“Қўрқамиз. Ҳар куни эрталаб кўзимни очиб, ҳаммаси яна қайтадан бошланмасайди, деган фикр хаёлимдан кечади. Ахир, уруш тугагани йўқ-ку?” дейди фермер.
Форум