Украина армияси августда Россиянинг Қримдаги ҳарбий объектларига зарба берганини тан олди
Кеча Украина Қуролли кучлари Бош қўмондони Валерий Залужний ҳамда Олий Рада Миллий хавфсизлик ва мудофаа қўмитаси раисининг биринчи ўринбосари генерал Михаил Забродскийнинг Россияга қарши ҳарбий кампания истиқболларига бағишланган мақоласи эълон қилинди. Унда Украина ҚКнинг муваффақиятли ҳаракатларига мисол сифатида “жанговар ҳаракатлар вақтинча босиб олинган Қрим мухтор республикаси ҳудудига жисмонан кўчирилгани” тилга олинган. Бунда “душманнинг Қримдаги авиабазалари, энг аввало – Саки аэродромига қатор муваффақиятли ракета зарбалари назарда тутилмоқда”.
Саки авиабазасига ҳужум 9 август куни амалга оширилган ва Россиянинг 7 тадан 11 тагача ҳарбий учоқлари яксон бўлишига олиб келган эди. Украина ушбу воқеа учун масъулиятни ҳануз бўйнига олмай келаётган эди. Аннексия қилинган Қримдаги ҳарбий объектларда ундан кейин ҳам қатор портлашлар содир бўлди.
Латвия шенген визаси олган россияликлар учун ўз эшикларини ёпди
Бу ҳақда твиттерда мамлакат ТИВ раҳбари Эдгардс Ринкевичс маълум қилди.
“Латвия ҳукумати шенген визасига эга Россия фуқароларининг Латвияга киришини чеклаш тўғрисида қарор қабул қилди”, деб ёзди у.
Аввалроқ Латвия расмийлари мазкур қарор биринчи галда Болтиқ мамлакатлари ва Финляндиядан Европанинг бошқа давлатларига ўтиш учун транзит сифатида фойдаланувчи россиялик туристларга қарши қаратилганини билдиришган эди.
Бир неча кун олдин Эстония шундай қарор қабул қилган. Шунингдек, Литва билан Польша ҳам россияликларни ўз ҳудудига киритишни тўхтатди – бундан қариндошлариникига меҳмонга бораётганлар ва гуманитар виза эгаларигина мустасно.
Ушбу мамлакатлар Европа иттифоқига аъзо барча давлатларни россияликларга қарши шундай чеклов жорий этишга чақирган эди, аммо ЕИ таркибидаги бошқа мамлакатлар бунга кўнмади.
Натижада Еврокомиссия фақат ўртача чоралар кўришга розилик берди ва 6 сентябрда Россия билан виза режимини соддалаштиришга доир битимнинг амал қилишини бутунлай тўхтатди.
Бу виза нархи ошганини ва уни расмийлаштириш муддати сезиларли даражада узайганини англатади, сайёҳлик мақсадида виза бериш-бермаслик масаласини эса Европа давлатларининг Россиядаги консулликлари ҳал қилади.
Зеленский: Қироличанинг вафоти бутун дунё учун оғир йўқотиш
Украина президенти Владимир Зеленский 8 сентябрь куни қиролича Елизавета ll вафоти муносабати билан дунё етакчилари қаторида Британия қироллик оиласига ҳамдардлик билдирди.
Буюк Британиянинг энг узоқ ҳукмронлик қилган монархи, давлат арбоби ва етмиш йил давомида жаҳон саҳнасида юксак мавқега эга бўлган қиролича Елизавета ll, 8 сентябрь куни 96 ёшида Шотландиядаги қасрида вафот этди.
"Қиролича Елизавета II нинг вафотини эшитиб, чуқур қайғуга тушдим. Бу бутун Европа, бутун дунё учун оғир йўқотиш. Украина халқи номидан қироллик оиласига, Буюк Британия ва ҳамдўстлик мамлакатларига ҳамдардлик билдираман. Сиз учун ибодат қиламиз", деди Зеленский.
Қиролича Елизавета ва унинг вафоти ортидан тахтга ўтирган янги қирол Карл, бу урушда Украинани қувватлашини билдирган:
"Ҳурматли жаноблар ва Жамоалар палатаси аъзолари, қиролича зоти олиялари ҳукуматининг устувор йўналиши иқтисодиётни ривожлантириш ва мустаҳкамлаш ҳамда оилаларнинг яшаш харажатларини енгиллаштириш бўлиб келган. Ҳозирги қийин дамларда қиролича зоти олиялари ҳукумати бутун дунё бўйлаб демократия ва эркинликни ҳимоя қилишда ва Украина халқини қўллаб-қувватлашда давом эттиради”.
Россия Харьков вилоятида нафақат жанг, балки ахборот майдонида ҳам ютқазмоқда
Украина эса яқин кунларда Купянскни озод этиши мумкин. Урушни ўрганиш институтининг (ISW) Украина қарши ҳужумига бағишланган навбатдаги кундалик исоботида шу ҳақда сўз боради.
Экспертларга кўра, Украина ҚКнинг Харьков – Изюм йўналишидаги ютуқлари Россия томони нафақат мудофаа борасида, балки ахборот маконида ҳам заифлашишига олиб келмоқда.
Бу воқеалар май ойида Северский Донец дарёсидан ўтишдаги муваффақиятсизлик сингари Россия қўмондонлигига нисбатан ишончга жиддий путур етказади.
Аввалроқ украин армияси 8 сентябрь куни Россиянинг Изюмдан шимолда жойлашган мудофаа позициялари томон 50 километр ичкарига кириб борганини эълон қилган эди. Бироқ Россия Мудофаа вазирлиги бу хусусда ҳеч қандай баёнот бермади, ҳатто инкор этгани ҳам йўқ.
Экспертлар фикрича, Украинанинг ютуқлари ва Россиянинг сукути рус ҳарбий блогерларининг жаҳлини чиқарган ва улар Россия армияси Балаклея шаҳрини сақлаб қолишга қодир бўлмаганини муҳокама қила бошлаганлар. Улардан айримлари – Россия қўшинлари Балаклеяни тўлиқ ёки қисман тарк этганидан, бошқалари эса Россия армияси у ердан сиқиб чиқарилганидан баҳс этганлар.
Россия қўмондонлиги бошига ёғилган танқидлар ISW экспертларига май ойида Россия ҳарбийлари Луганск вилоятида Северский Донец дарёсини кечиб ўта олмаган вазиятни эслатди. Ўшанда сунъий йўлдошдан олинган тасвирлар дарё яқинида Россиянинг жуда кўп ҳарбий техникалари яксон бўлганини кўрсатган эди. Ушбу тасвирлар Россия қўмондонлигининг воқеликни тактик даражада таҳлил қилиш лаёқатини катта шубҳа остига қўйди. Россия Мудофаа вазирлиги ўшанда ҳам вазиятга изоҳ бермаган.
Шундай қилиб, бугун Россия томони изоҳ беришдан ўзини олиб қочиб, аввалги хатосини такрорламоқда.
Бу орада Украина армияси Харьков вилоятининг Россия босиб олган ҳудудларини озод қилишда давом этмоқда. ISW таҳлилчиларига кўра, яқин 72 соат ичида украин қўшинлари Купянск шаҳрини эгаллайди. Бу Россия ҳарбийларининг Изюм шаҳри билан коммуникациясини баттар издан чиқаради.
Форум