Германия ташқи ишлар вазири парламентни Россия пропагандасига қарши курашишга чорлади
7 сентябрь куни Германия ташқи ишлар вазири Анналена Бербок Германия Россиянинг Украинадаги босқинчилик урушини дипломатик йўллар билан тугатиш учун етарли чора кўрмаётгани ҳақидаги танқидларга жавоб қайтарди.
Парламент олдида қилган чиқишида Бербок музокаралар ва дипломатик саъй-ҳаракатлар парда ортида давом этаётганини айтди. Айни пайтда, вазир ҳозирги шароитда дипломатик саъй-ҳаракатларни Бирлашган Миллатлар Ташкилоти орқали амалга ошириш тўғри бўлишини қўшимча қилди.
«Шуни ёдда тутишимиз керакки, бу уруш турли даражаларда олиб борилмоқда. Нафақат қурол билан, нафақат газ ва нефть билан, балки ёлғон ва асоссиз ҳикоялар билан. Видеолар монтаж қилинаётгани, мазмуни ўзгартирилаётгани рост. Бунга дош бера олиш бизнинг вазифамиз», - деди у.
Бербок Россия пропагандаси ва сохта янгиликлар тарқалаётганидан огоҳлантирар экан, газ нархининг ошиши одамларни бир-бирига қарама-қарши қилиш учун асос бўлмаслигини кераклигини айтди.
Бербок, шунингдек, парламент аъзоларидан Германия демократияси ва фаровонлигини қўллаб-қувватлашга, бунинг учун қонун устуворлигига қилинаётган ҳужумларга қарши туришга чорлади.
АҚШ Россияни Украинада «фильтрлаш» амалиётларини зудлик билан тўхтатишга чақиради
7-сентябрь куни АҚШ Кремлни Украинада «фильтрлаш» амалиётларини йўлга қўйганликда айблади. Вашингтонга кўра, Россия ўз назорати остидаги ҳудудларга мажбуран кўчириб ўтиш лозим бўлган украиналиклар рўйхатларини тузмоқда.
«Россия президенти маъмурияти расмийлари фильтрлаш учун нишонга олинаётган украиналиклар рўйхатларини тақдим этмоқда, бундай амалиётлар кўлами ва сурати ҳақида ҳисобот олмоқда. Биз фильтрлаш операциялари Кремлнинг ўз назорати остидаги украин ҳудудларни аннексия қилиш ҳаракатларида ҳал қилувчи аҳамиятга эга деб ҳисоблаймиз», дедиОқ уй матбуот котиби Карин Жан-Пьер.
Ўтган ой Йель университетининг эълон қилган ҳисоботида Россия ва унинг Украинадаги ҳарбийлари асирлар ва тинч аҳолини ҳибсга олиш, сўроқ қилиш ва қайта ишлаш учун 21 та махсус пункт яратгани айтилади.
Хусусий сунъий йўлдошлардан олинган тасвирлар ҳамда очиқ манбалардаги маълумотларга таянган ҳолда ёзилган ҳисоботда эътироф этилишича, бундай пунктлар орасида собиқ мактаб бинолари, бозорлар ва қамоқхоналар бор.
Украина расмийлари Россияни босиб олинган Украина ҳудудларидан юз минглаб одамни депортация қилишда айбламоқда.
Москва 24 февраль куни бошлаган «махсус ҳарбий амалиёти» давомида тинч аҳолини қасддан нишонга олаётганини рад этиб келади. Москва ҳудуддан чиқиб кетишни хоҳловчиларга инсонпарварлик ёрдами таклиф қилинаётганини иддао қилмоқда.
АҚШ Украинага қўшимча 675 миллион долларлик қурол-яроғ ажратади
АҚШ Президенти Жо Байден Украина учун қўшимча 675 миллион долларлик ҳарбий кўмак пакетини маъқуллади, дея маълум қилди АҚШ мудофаа вазири Ллойд Остин Германияда ўтган мудофаа вазирлари йиғилишида.
Вазирлар Россия босқини давомида Украинага узоқ муддатли ёрдам кўрсатиш масаласини муҳокама қилган
Германиядаги Рамштейн ҳаво базасида ўнлаб мудофаа вазирлари йиғилиши аввалида сўз олган Остиннинг таъкидлашича, иттифоқчи мамлакатлар Украина кучларини тайёрлаш ва узоқ муддатли истиқболда ўзларининг мудофаа салоҳиятини яхшилаш учун ҳамкорлик қилиш масалаларини муҳокама қилади.
"Ҳозир урушнинг муҳим бир палласида турибмиз. Россия кучлари Украина шаҳарлари ва тинч аҳолини ракета ва артиллерия билан шафқатсизларча бомбардимон қилишда давом этмоқда. Украина кучлари ҳам жанубдан қарши ҳужумларни бошлади. Улар ўз суверен ҳудудларини қайтариб олиши ва жанг қилиши учун кўрсатган ёрдамимиз ҳамда ўз имкониятларини бирлаштирган ҳолда ҳаракат қилишмоқда", деди АҚШ Мудофаа вазири Ллойд Остин.
Россия февраль ойида Украинага бостириб кирганидан бери Вашингтон Киевга 10 миллиард доллардан ортиқ ҳарбий ёрдам кўрсатди.
Сўнгги ҳарбий ёрдам пакети ўқ-дорилар, танкка қарши қуролларни ўз ичига олади.
Олти ойдан бери давом этаётган можаро минглаб одамларнинг ҳаётига зомин бўлиб, Украина шаҳарларини вайронага айлантирди.
Охирги ҳафталарда Европадаги энг йирик атом электр станцияси бўлмиш Запорожьеда радиация фалокати юз беришидан хавотирлар кучайди.
Украина босиб олинган ерларини қайтариб олмоқда
АҚШнинг Урушни ўрганиш институти (ISW) маълумотига кўра, украинлар Балаклея атрофида тахминан 20 километрга илгарилаб, чамаси 400 кв. км майдонни қайтариб олганлар. “Геолокацион тасвирлар Украина армияси кучлари Балаклея ҳамда Вербовкадан Т2210 шоссеси бўйлаб – Яковенко ва Волохов Яр орқали Шевченково томонга илгарилаганини кўрсатмоқда”, дейилади ISW экспертларининг янги ҳисоботида.
Украина ҚК Бош штаби ўз маълумотида илк бор Балаклеядаги ҳужумларга ишора қилди. Охирги суткаларда Россия артиллерияси зарба берган аҳоли масканлари орасида Байрак қишлоғи тилга олинди – кўплаб манбаларга кўра, украин қўшинлари мазкур қишлоқни куни кеча Балаклея шаҳри ва унинг атрофидаги кентларга ҳужум чоғида эгаллаган.
Форум