Кривой Рог ракета зарбалари остида қолди
Россия армияси Днепропетровск вилоятининг Кривой Рог туманига ракета зарбалари йўллади
Бу ҳақда соат 08:13 да туман ҳарбий маъмурияти раҳбари Александр Вилкул маълум қилди. У маҳаллий аҳолини панажой топишга чақирди.
Бундан бироз олдин Вилкул телеграмда Кривой Рог тумани кечаси ўққа тутилмагани ҳақида ёзган эди.
“Украинская правда” нашрига кўра, сешанба тонггида бутун Украина бўйлаб ҳаво тревогаси эълон қилинган. Хусусан, Днепропетровск вилоятида тревога бир ярим соат – 07:02 дан 08:32 гача давом этган.
Вилоят ҳарбий маъмурияти бошлиғи Валентин Резниченко 6 сентябрга ўтар тунда Никополь тумани ҳам ўққа тутилганини билдирди. Айтишича, шаҳарга “Град” реактив қуроллари билан ҳужум қилинган.
Снарядлар Никополдаги турар-жой даҳаларига тушгани айтилмоқда. Бир эркак ва бир аёл жароҳат олиб, касалхонага тушган. Тиббиётчилар уларнинг аҳволини ўртача дея баҳолашмоқда.
Буюк Британия мудоаа вазири Бен Уоллес кечаги чиқишида Россия армиясининг Украинадаги урушда ўлган аскарлари сони 25 мингга етганини айтди.
Уоллесга кўра, Россиянинг уруш бошидан бери кўрган жами талафоти – ярадорлар, асирга тушганлар ва қочоқларни қўшиб ҳисоблаганда тахминан 80 минг кишини ташкил қилади.
Зеленский: Иккинчи марта радиация ҳалокати рўй беришига сал қолди
Владимир Зеленский украиналикларга йўллаган навбатдаги видеомурожаатида Запорожье АЭС яна ўққа тутилганига тўхталди
“Бугун, россиялик провакаторлар яна бир карра ўққа тутиши натижасида Запорожье АЭСни Украина энерготизими билан боғловчи сўнгги электр узатиш линияси шикастланди. Россиянинг провакациялари туфайли станцияда шу билан иккинчи марта радиация ҳалокати рўй беришига сал қолди. Россия айнан ҳозир – Атом энергияси бўйича халқаро агентлик хулосаси эълон қилиниши арафасида бу ишни қилгани кўп нарсани очиқлайди. Террорчи давлат бу билан Халқаро агентлик фикри ҳам, халқаро ҳамжамиятнинг қарори ҳам унинг учун мутлақо фарқсизлигини англатмоқчи. Россия вазият жуда ёмонлашувидан ва мумкин қадар узоқ сақланишидангина манфаатдор. Россиянинг эсини киргизиб қўйишнинг ягона йўли – бу санкцияларни кучайтириш ва барча даражаларда уни террорчи давлат деб расман тан олишдир”, деди Украина президенти.
Украина жангчилари Херсонда яна бир нечта аҳоли пунктини озод қилди
Украина ҳарбийлари 4 сентябр, якшанба куни Украина қўшинлари томонидан озод қилингани хабар қилинган Херсон вилоятининг Високополье қўрғонида ўз мамлакати байроғини кўтарди.
Украина президенти Владимир Зеленский якшанба куни Украинага қарши ўтган ҳафта бошланган ҳужумда муваффақиятга эришганини қайд этиб, ўз кучларига мамлакат жанубида иккита, шарқда учинчи аҳоли пункти ва бошқа ҳудудларда ҳам бир қанча аҳоли пунктларини озод қилгани учун миннатдорчилик билдирди.
5 сентябр куни эълон қилинган видеода украиналик аскар Високопольедаги бино ташқарисида “Украинага шон-шуҳрат” ёзуви туширилган байроқ ўрнатаётганини кўриш мумкин. Ушбу видео Високополье қўрғонидаги РОВД биноси яқинидаги кўчада суратга олингани тасдиқланди.
6 сентябр куни эълон қилинган яна бир видеода эса украиналик аскарлар вайронага айланган бинолар ёнидан ўтиб, Високополье томон кетмоқда. 2014 йилнинг феврал ва март ойларида Москва бостириб кирган ва аннексия қилган Қрим ярим оролидан шимолда жойлашган Херсон вилояти ҳозирги можаронинг бошида Россия кучлари томонидан босиб олинган эди.
Владимир Зеленский Нью-Йорк биржасига: Мен сизни Украинага таклиф қиламан
Владимир Зеленский 6 сентябр куни Нью-Йорк фонд биржаси билан телефон орқали уланди ва молия эгаларини Россия Украинада вайрон қилган саноатни қайта тиклаш учун хусусий сармоя киритишга чақирди.
Зеленский ҳукумати Россия билан уруш давом этаётган бир пайтда, Украина иқтисодиётини тиклашга ёрдам бериш учун хорижий инвесторлар учун қиймати 400 миллиард долларлик 500 дан ортиқ лойиҳалар платформасини ишга туширди.
JP Morgan, Pfizer Inc ва бошқа АҚШ компанияларининг топ-менежерлари иштирокидаги давра суҳбатидан сўнг, Зеленский инглиз тилида Украина Россия босқинидан олти ойдан кўпроқ вақт ўтиб, ўз иқтисодини тиклаётганини айтди:
- Биз Украина ҳудудини рус армиясидан озод қиляпмиз. Биз аллақачон рус террори томонидан вайрон қилинган жойларни тиклашни бошладик ёки қўлга олдик. Биз иқтисодиётимизни тиклаяпмиз. Биз сизга ва сизнинг компанияларингизга барчамиз манфаати учун биз билан ишлаш имкониятини берамиз. Украина - бу келажакдаги ғалаба ҳақидаги ҳикоя ва сиз учун ҳозирда ғалабани биз билан баҳам кўриш учун юзлаб миллиард долларлик лойиҳаларга сармоя киритиш имконияти. Мен сизни Украинага таклиф қиламан. Украинага сармоя киритинг. Бу сизнинг ғалабангиз, кейин эса компанияларингизнинг муваффақият тарихи бўлади.
Учрашув “Биз озодмиз. Биз кучлимиз. Биз бизнес учун очиқмиз” шиори остида ўтди.
Қўшма Штатлар ва унинг Европа ва Осиёдаги иттифоқчилари аллақачон миллиардлаб долларларни Украинанинг ёрдам, қурол-яроғ ва бошқа хавфсизлик харажатларига сарфлашган. Июл ойида Швейцарияда бўлиб ўтган конференцияда илк бор эълон қилинган “Украина афзаллиги” ташаббуси ҳарбий-саноат комплекси, энергетика, фармацевтика, металлургия, ёғочсозлик ва логистика каби 10 та муҳим соҳага қаратилган.
Украина, шунингдек, НАТО иттифоқи аъзоларининг ҳарбий ёрдамидан ташқари, ўз иқтисодиётини қўллаб-қувватлаш учун ҳар ойда тахминан 5 миллиард доллар халқаро ёрдам олмоқда.
Украина Иқтисодиёт вазири Юлия Свириденко Украина иқтисодиёти келгуси йил барқарорлашиши ва 15,5 фоизга ўсиши кутилаётганини маълум қилди.
Форум