Песков: ЕИ виза чекловини жорий этса, Россия жиддий жавоб қайтаради
Айни пайтда, Кремль матбуот котиби Дмитрий Песков Европа Иттифоқи Россия фуқароларига виза чекловларини жорий қилса, Москва бунга жиддий жавоб чораларини кўради, деб таҳдид қилди.
Россия Европа Иттифоқининг қарорини диққат билан кузатиб бормоқда ва бу ёқадими ёки йўқ Россия манфаатларидан келиб чиқиб бунга жавоб беради, деди Песков маҳаллий телеканалга берган интервьюсида.
Песков, шунингдек, “Шимолий оқим 1” қувури орқали газ етказиб бериш тўхтагани учун Европа Иттифоқини айблаган.
Песковнинг таъкидлашича, европаликлар Россия энeргетика гиганти "Газпром" тизимларини сақлаб қолишдан бош тортиб мутлақо бемаъни қарор қабул қилган. Шу сабабли ҳам газ етказиб бериш тўхтагани "Газпром"нинг айби эмас, балки санкция қарорини қабул қилган сиёсатчиларнинг айби.
Газпром ишончли газ таъминотчилигача қолмоқда, деди у.
Портовая компрессор станциясининг Трент 60 газ компрессор блокида Сименс билан қўшма таъмирлаш ишлари давомида турбинада нефть сизиши аниқланди, дейилади “Газпром”нинг жума куни эълон қилган баёнотида.
Газпром носозлик бартараф этилмагунича, “Шимолий оқим 1” орқали Германияга газ етказиб бериш тикланмаслигини маълум қилди.
Украина инфратузилма вазирлиги БМТ воситачилигидаги “ғалла ташаббус”и бошланганидан буён ўзининг энг йирик дон кемалари карвонини жўнатганини маълум қилди.
Якшанба куни Одесса, Черноморск ва Пивденний портларидан саккизта давлатга 282,5 минг тонна қишлоқ хўжалиги маҳсулотларини олиб кетаётган жами 13 та кема жўнаб кетган.
Россия: Запорожье завод ҳудудидаги радиация ҳолати нормал
Россия Мудофаа вазирлиги рус қўшинлари Донецкдаги хорижлик ёлланма аскарларга ҳужум қилгани ҳақида баёнот берди. Украин ҳарбийлари эса бир неча вилоятларда Россия ҳужумини қайтаришга муваффақ бўлгани ҳақида маълум қилди.
Россия Мудофаа вазирлиги матбуот котиби Игор Конашенков якшанба куни бўлиб ўтган кундалик брифингда Россия ҳарбий ҳаво кучлари Донецкдаги хорижий ёлланма аскарларнинг иккита базасига юқори аниқликдаги қуроллар билан зарба берди, деб маълум қилди.
Конашенковнинг сўзларига кўра, Николаев вилоятида Украина ҳарбий-ҳаво кучларига қарашли битта Су-25 қирувчи самолёти, бешта дрон уриб туширилган ҳамда АҚШда ишлаб чиқарилган учта HARM антирадар ракеталари тутиб қолинган.
Украина қуролли кучлари шанба куни Запорожье атом элeктр станцияси жойлашган ҳудудга зарба бериш учун саккизта дрон учирди, дея маълум қилди Россия Мудофаа вазирлиги.
Рус ҳарбийлари, яқинлашиб келаётган дронларни ўз вақтида пайқаб АЭС хавфсизлик ҳудудидан узоқлашишга мажбур қилди, дейилади Конашенков баёнотида. Запорожье завод ҳудудидаги радиация ҳолати нормал, дея қўшимча қилди у.
Украина Бош штаби эса кеча Россия қуролли кучлари Украинанинг бир қанча нуқталарига ҳаво ҳужумлари уюштиргани ва инфратузилма объектларини танк ва миномётлардан ўққа тутганини маълум қилди.
Бош штаб маълумотларига кўра, Украина қуролли кучлари Бахмут, Сольэдар ва яна бошқа ҳудудларда Россия ҳужумларини қайтаришга муваффақ бўлган. Уруш шароитида томонларнинг бу баёнотларини тезкор равишда мустақил манбалардан тасдиқлаш имконсиз бўлиб қолмоқда.
Зеленский: "Урушда Борис биз билан бўлди"
5-сентябрь куни Украина президенти Владимир Зеленский Буюк Британиянинг навбатдаги бош вазири Лиз Трасс «ҳар доим Европа сиёсатининг маърифатли томонида» бўлиб келганини ҳамда Киев у билан ҳамкорликни давом эттиришни интиқлик билан кутаётганини айтди.
Душанба куни Трасс ҳукмрон Консерватив партия номзодлари пойгасида ғолиб чиқиб, Буюк Британиянинг навбатдаги бош вазири бўлди. Сиёсатчи ваъда қилиб келганидек солиқларни қисқартириш ва турмуш даражасини яхшилаш устида ишлашини айтди.
Сиёсий таҳлилчилар Трасс Британиянинг Украинани қурол-яроғ ва ўқув машғулотлари билан таъминлаш сиёсатини давом эттиришини кутишмоқда.
Зеленский навбатдаги кечки нутқида душанба куни истеъфога чиққан бош вазир Борис Жонсон билан гаплашганини айтиб, Жонсон Украинани дастаклаб келгани учун олқишлади.
«Россиянинг Украина ва Европага қарши кенг кўламли урушининг дастлабки дақиқалариданоқ Борис биз билан бўлди. Ҳар доим „Яна қандай ёрдам бера оламан?“ унинг биринчи ва энг муҳим саволи бўлди».
Зеленский сўнгги йилларда Украина ва Британия ўртасидаги алоқалар «мисли кўрилмаган даражада» мустаҳкамлаганини қўшимча қилди.
«Бугун Борисга барча украиналиклар номидан миннатдорчилик билдирдим. Борис билан унинг янги мақомида ҳамкорликни давом эттиришни интиқлик билан кутаман».
Зеленский Запорожье атом электр станцияси миллий электр тармоғидан узилгани ва АЭСда иккинчи марта «радиациявий фалокатга бир қадам қолганини» айтди.
Зеленский АЭСдаги муаммоларга Россиянинг янги ҳужумлари сабабчи эканлигини айтди.
Россия ва Украина бир-бирини Запорожье АЭС ва унга яқин ҳудудларни ўққа тутишда айблаб келади.
«(Завод) ҳудудининг ўққа тутилиши террорчи давлат ХАЭА нима дейиши, халқаро ҳамжамият нима қарор қилиши унга қизиқ эмаслигини кўрсатади», — деди Зеленский.
Украина Польшада бўлиб ўтган ҳарбий кўргазмада ўз ракета тизимларини намойиш этди
«Укроборонпром» украин қурол ишлаб чиқарувчи ширкати Польшанинг Кельце шаҳрида бўлиб ўтаётган халқаро мудофаа саноати кўргазмасида ўз ракета ва ракета тизимлари моделларини тақдим этмоқда.
«Укроборонпром» кўргазмада иштирок этаётган 400 ширкатнинг биридир. Кўргазмада ширкат Украина армияси томонидан қирғоқларни, шу жумладан, жанубий Одесса портини ҳимоя қилиш учун қўлланилаётган «Нептун» ракеталарини тақдим этди.
Киевдаги «Луч» дизайн ишхонаси ходими Антон Ашевский 5 сентябрь куни Reuters агентлигига берган интервьюсида:
„Вильха“ тактик ракета тизими ракетаси 110 километр масофага бора олади. Айлана хато диапазони бор-йўғи 30 метрни ташкил қилади. Ракета йўналтириш мосламаси, бирлашган инерциал навигация тизимига ҳамда GPSга таянади. Россияга қарши урушда аллақачон жуда яхши иш беряпти. Бу фаол радар қидирувига эга қанотли ракета. Шундай ракеталардан бири Россиянинг «Москва» крейсерига бори урилган", - деди.
Уч кунга чўзиладиган Кельце кўргазмаси Париж ва Лондон кўргазмаларидан кейин Европадаги учинчи энг муҳим мудофаа саноати тадбири ҳисобланади.
Форум