"Катта 7лик" молия вазирлари Россия нефтига энг максимал баҳо ўрнатишга келишди
Буюк Британия молия канцлери Надим Захави жума куни G7 Россия нефт бозорига қарши янги чекловлар жорий этилаётганини айтди. Катта 7лик мамлакатлари молия вазирлари Россия нефтига энг максимал баҳо ўрнатишга келишиб олишди.
- Бу Путиннинг нефт нархининг ўта юқори бўлишига йўл қўймайди. Ва энг муҳими - бу биз биргаликда бошқа мамлакатларни ҳам жалб қилишимиз мумкинлигини англатади. Биз G7 молия вазирлари ўртасида келишиб олдик - ушбу қарор фуқароларимизни келгуси йилги нефт нархининг кескин кўтарилишидан ҳимоя қилади, деди Надим Заҳави, Буюк Британия молия канцлери.
Bloomberg нашри Urals маркали нефтнинг бир баррелига $40-60 бериш муҳокама этилаётганини билдирди. G7 мамлакатлари бу чоралар Украинага босқинчилик урушини бошлаган Россиянинг газ ва нефт даромадларини кескин камайтиришига ишонмоқда.
Россия президенти матбуот котиби Дмитрий Песков ва Хавфсизлик Кенгаши раҳбари Дмитрий Медведев рус ёқилғисига қўйилган чекловни қўллаб қувватлаган мамлакатларга Россия нефт сотмаслигини эълон қилди.
ЕИ Иқтисодий комиссари: Россия бизни газ билан қўрқита олмайди!
Европа Иттифоқининг иқтисодий комиссари Россиянинг Европага газ етказиб беришни тўхтатиши шартнома бузилиши ва “оқибатларга олиб келиши” мумкинлигини айтди.
"Амбросетти" форумида чиқиш қилган Паоло Гентилони давлат раҳбарлари, иқтисодчилар ва Нобел мукофоти лауреатларининг асосан иқтисодиётга бағишланган халқаро йиғилишида шундай изоҳ берди:
- Путин газ таъминотини тўхтатиш учун яна бир қадам ташлаяпти. Бу шартномани бузиш деганидир, барчамиз бундай бўлмайди деб умид қиламиз. Аммо, агарда бу содир бўладиган бўлса, оқибатлар бўлиши аниқ, лекин биз бу хавфга бир неча ойлар давомида тайёргарлик кўрганимиз ҳам аниқ, шунинг учун биз буни паст баҳоламаслигимиз керак. Лекин улар бизни қўрқита олмайдилар.
Жума куни Россиянинг энергетика гиганти Газпром Германияга йирик қувур орқали табиий газ етказиб беришни ҳали тиклай олмаслигини айтганидан кейин Европадаги энергетика можароси авж олди.
Газпром чоршанба куни "Шимолий оқим 1" газ қувурини уч кунлик техник хизмат кўрсатиш учун ёпганди. Аммо жума куни кечқурун ижтимоий тармоқдаги постда турбинанинг "носозликлари" аниқлангани ва улар тузатилмагунча қувур ишламаслигини қўшимча қилган.
“Газпром” ширкати “Шимолий оқим 1”нинг газ оқимининг қисқариши сабабини техник муаммолар билан изоҳлаган.
Рамзан Қодиров Чеченистон раҳбари лавозимини тарк этиши мумкинлигини айтди
Бу қачон ва нима сабабдан бўлишини аниқлаштирмади. Сиёсатчи илгари ҳам шунга ўхшаш баёнотлар билан чиққан, аммо ҳокимиятни ҳалигача тарк этгани йўқ.
- Мана 15 йилдан бери мен республикани бошқариб келяпман... Менимча, мени ҳайдаб юборишмасларидан вақтим етиб келди. Шунақа гаплар... Маълум бўлишича, мен аллақачон қариб қолибман. Бир пайтлар мен ёш, тажрибасиз эдим. Ҳозир ҳам мен тажрибасиз, лекин ёшлигим ўтиб кетди, биз бу ҳақда аллақачон ўйлай бошладик ва ўз вақтида кетиш учун ҳаракат бошладик, деди ўз видеомурожаатида Рамзан Қодиров.
Видеомурожаат остидаги изоҳда у шундай ёзув ҳам қолдирган: "Мен жуда узоқ қолганимни ўзим ҳам пайқадим. Мен чексиз ва узоқ муддатли таътилга тўлиқ лойиқман деб ўйлайман. Умид қиламанки, мени қўллаб-қувватлайсиз ва тушунасиз".
Қодиров 2007 йилдан бери Чеченистонни бошқариб келади. 2021 йилнинг май ойида у республика раҳбари лавозимини тарк этиши мумкинлигини айтган эди, бироқ ўша йилнинг кузида у яна беш йилга қайта сайланди. Бунгача сиёсатчи 2016 ва 2017 йилларда кетиши мумкинлиги ҳақида гапирган эди.
Россиянинг Украинага кенг кўламли босқини бошланганидан сўнг, Қодиров урушнинг асосий тарғиботчиларидан бирига айланди, у мунтазам равишда фронтга ёлланма аскарларни жўнатаётгани ҳақида хабар бериб турди, ҳатто шахсан Украина президенти Владимир Зеленскийга таҳдид қилди. Бундан ташқари, у рус қўшинлари ядро қуролидан фойдаланиши мумкинлиги тўғрисида бир неча бор гапирган эди.
Украин армияси яна бир нечта аҳоли пунктини озод қилди
Херсон вилоятида Украина армиясининг контрҳужумлари давом этаётгани расман билдирилди. Олий рада депутати Юрий Мисягин якшанба куни вилоят шимолидаги Високополье шаҳарчаси озод қилинганини билдирди ва ижтимоий тармоқда шаҳарча касалхонаси биноси томига Украина байроғи ўрнатилаётгани акс этган фотсуратни эълон қилди.
Кейинроқ бу маълумотни Украина президенти маъмурияти раҳбари Андрей Ермак ва бошқа расмийлар ҳам тасдиқлашди.
Украина президенти Владимир Зеленский ўзининг кечки видеомурожаатида украин армияси мамлакат жанубида 2 та, Донецк вилоятида 1 та аҳоли пункти озод қилинганини билдирди. Лекин президент бу аҳоли пунктларнинг номларини айтмади.
Россия томони ҳозирча бу хабарларга муносабат билдирмади.
Форум