Новороссийск портида Суриядан олиб келинган С-300 ракета тизимлари туширилмоқда
28 ва 29 август кунлари Планет.cом сунъий йўлдошидан олинган бу суратлар Россия Мудофаа вазирлиги назоратидаги «Оборонлогистика» компаниясига тегишли, Суриядан Россиянинг С-300 зенит тизимларини етказиб бергани айтилаётган SPARTA II кемасидан Новороссийск портида юк туширилаётгани кўрсатилган.
Туркия кемани Босфор бўғози орқали ўтказиб юборгани сабабли, душанба куни Украина Ташқи ишлар вазирлиги департаментга чақирилган Туркия элчисига ушбу фактдан "ташвиш" ҳақида "оғзаки нота" топширди.
Россия Суриянинг Хама вилоятидаги Масаф шаҳри ҳудудидан С-300 батареясини Суриядан олиб чиққани худди шу сунъий йўлдош тасвирлари туфайли маълум бўлди. Ушбу қурилмалар Россия томонидан 2018 йилда Сурия президенти Башар ал-Асадга топширилган.
20 август куни SPARTA II Тартусни тарк этганди, 24 да у Босфордан ўтиб, 27 август куни Новороссийск портига етиб борган. Россия ҳарбий кемалари учун Босфор бўғози орқали Туркия 1 март куни ёпиб қўйган эди - бу мамлакат ҳукумати Украинада содир бўлаётган воқеаларни қўшни мамлакатлардаги уруш деб билади ва Монтрё конвенцияси бу ҳолатда урушаётган томонларнинг ҳарбий кемаларининг бўғоз орқали ўтишини чеклашга имкон беради. Бироқ Конвенцияга кўра, Туркия ҳатто ҳарбий юк ташувчи фуқаролик кемалари учун ўтишни тақиқлай олмайди.
Украина-Россия фронтидаги вазият борасида Британия ҳарбий разведкаси ўзининг янги ҳисоботини эълон қилди
Инглиз разведкасига кўра, Украина Қуролли Кучларининг танк бўлинмалари Украина жанубида Россия кучларининг жанубий гуруҳига қарши ҳужумларини давом эттирмоқда. Украина армияси фронтни бироз ичкарига силжитишга эришгани айтилмоқда. Украина армияси русларнинг нисбатан заиф мудофаа қобилиятидан фойдаланган ҳолда буни уддалай олган.
Россия, ўз навбатида, ўз чизиғидаги бўшлиқларни ёпишга ҳаракат қилмоқда. Бунинг учун армия Шарқий гуруҳнинг ҳарбий қисмларини ўз ичига олган махсус мобил захира бўлинмаларидан фойдаланмоқда.
Бундан ташқари, Британия ҳарбий разведкаси Россия “кўнгилли” батальонлар ёрдамида янги бўлинмаларни шакллантиришда давом этаётганини хабар бермоқда. 24 август куни 3-армия корпусининг кўнгиллилар батальони Москвадаги базасини тарк этди. Бу ҳарбий бўлинманинг қанчалик самарадор экани номаълум. Бироқ, Буюк Британия Мудофаа вазирлигининг фикрича, 3-ҳарбий корпусда, эҳтимол, кадрлар етишмовчилиги ва ҳарбий хизматчиларни тайёрлаш сифати ёмонлашгани кузатилмоқда.
Путин собиқ тансоқчисидан фронтдаги вазият борасида ҳисобот олди
Россия президенти Владимир Путин сешанба куни Москвада Росгвардия раҳбари Виктор Золотов билан учрашди. Путин Золотовнинг унинг қўшинлари “Донецк ва Луганск халқ республикалари ҳудудида қонун ва тартибни сақлаш ва тинч ҳаётни тиклаш бўйича кенг кўламли вазифаларни бажараётгани” ҳақидаги ҳисоботини тинглади.
- Миллий гвардия қўшинлари Донецк ва Луганск халқ республикалари ҳудудида, шунингдек, Запорожье ва Херсон вилоятларида қонун ва тартибни сақлаш ва тинч ҳаётни тиклаш бўйича кенг кўламли вазифаларни бажармоқда. Биз жанговар ҳаракатларда бевосита иштирок этяпмиз - яъни разведка ва пистирма, шунингдек, душманнинг қўпорувчи кучларини аниқлаш ва йўқ қилиш, ўқ-дорилар омборларини аниқлаш ва йўқ қилиш, деди Виктор Золотов, Россия Миллий гвардияси бошлиғи.
Путиннинг собиқ тансоқчиси, Россиянинг криминал доиралари билан алоқадорликда гумон қилинган генерал Золотов рус қўшинлари "маҳаллий аҳоли томонидан қўллаб қувватланаётгани", босиб олинган ҳудуд аҳолиси ўз фарзандларининг “бахтли болалигини ҳимоя қилинаётгани”ни ҳис этишаётганини ҳам иддао қилди.
Россияликларнинг 80 фоизи уруш туфайли маблағларини йўқотган
Россиянинг ўзидаги иқтисодий вазият бироз таранг.
Бу ҳақда «АльфаСтрахование» агентлигиэълон қилган сўрови натижаларида айтилади. Россияликларнинг 80 фоиздан ортиғи Россия ва Украина ўртасидаги уруш бошланган феврал ойидан бери ўз жамғармаларини қисман ёки тўлиқ йўқотган.
Респондентларнинг 8 фоизи молиявий даромад манбаини йўқотгани, ҳар бешинчи киши (~21%) деярли барча жамғармаларини йўқотгани, 52 фоизи эса жамғармасининг бир қисмини йўқотганини билдирган.
Сўровда қатнашганларнинг атиги 19 фоизи ҳеч нарсани йўқотмагани ва даромад ҳажми ўзгармаганини билдирган.
Форум