Зеленский АЭХА вакиллари билан учрашди. Экспертлар Запорожье АЭСига жўнаб кетди
Украина президенти Владимир Зеленский Киевда Атом энергияси бўйича халқаро агентлик (АЭХА) делегацияси аъзолари билан учрашди. У ўз чиқишида яна бир бор Запорожье АЭСдан “Россия Федерациясининг барча қўшинларини олиб чиқиб кетишга” чақирди.
- Бугун Европа ва дунёнинг барча етакчилари станцияни зудлик билан қуролсизлантириш, барча рус ҳарбийларини ҳар қандай қурол билан портловчи моддалар билан олиб чиқилиши ва бизнинг станциямизни озод қилиш, шунингдек, демилитаризация зонасини ташкил этиш тарафдори. Запорожье АЭСи ва унинг атрофи ҳам тўлиқ Украина назоратига ўтказилиши лозим. Фақат шу йўл билан биз ядровий энергия билан боғлиқ ҳар қандай хавф-хатарни бартараф этишимиз мумкин, деди Владимир Зеленский.
Запорожье АЭСда ядровий ҳалокат рўй бериши хавфи шу қадар юқорики, мулозимлар яқин атрофдаги ҳудудлар аҳолисига нурланишга қарши йод таблеткалари тарқата бошлаганлар.
АЭХА бош директори Рафаэл Гросси ҳалокатнинг олдини олиш мақсадида бир неча ойдан буён Запорожье АЭСга кириш чораларини топишга уринди. АЭС Россия қўшинлари томонидан урушнинг дастлабки кунларидаёқ босиб олинган эди, уни украиналик атомчилар ишлатишмоқда. Агентлик раҳбари Рафаел Гроссининг сўзларига кўра, миссия АЭСдаги вазиятни “бир неча кун давомида” ўрганади. Бундан ташқари, Гросси станциядаги АЭХА миссияси назоратини доимий режимга кўчиришни кутаётганини айтди.
"Бу мен қилмоқчи бўлган энг муҳим ишлардан бири ва мен буни амалга ошираман", деди у.
Бурятлар украин байроғидаги рангларга қарши
Россияда эса Украин байроғида аксини топган сариқ ва кўк рангларга қарши кампания давом этмоқда. Айрим ҳолларда бу жуда кулгили ҳолатларга сабаб бўлмоқда.
Бурятияда маҳаллий аҳоли вакиллари ғазабини сариқ-кўк рангдаги мана бу бино қўзғатиб қолгани айтилмоқда. Бино рангини ўзгартиришни талаб қилган бурятиялик Ижтимоий тармоқ фойдаланувчиларидан бири “Муқаддас рус халқи Украина шарқида яшаш учун курашаётган бир пайтда, бизда мана бунақа бедодлик... Бундай бўлиши мумкин эмас!” деб ёзди.
Энг қизиғи, бу ранглар Бурятия Республикаси давлат байроғи ва герби ранглари ҳамдир.
"Газпром" газ қувурини вақтинчалик ёпди
Россиянинг "Газпром" компанияси чоршанба куни эрта тонгда Россиядан Европага ўтадиган асосий табиий газ қувури орқали табиий газ етказиб беришни тўхтатди. Шу ой бошида Россия давлат энергетика ширкати “Шимолий оқим 1” газ қувури орқали газ етказиб беришни шанба кунига қадар тўхтатиб қўйишини маълум қилганди ва буни компрессор станциясида режали техник хизмат кўрсатиш учун уч кунлик танаффус билан изоҳлаганди.
Газпром маълумотларига кўра, Портовая компрессор станциясида жойлашган ягона турбинани таъмирлаш керак.
Германиянинг Федерал тармоқ агентлиги раҳбари Клаус Мюллер таъмирлаш ишлари техник жиҳатдан тушунарсиз ва у бу ҳаракатларни Германияни Россия босқинидан кейин Украинага ён босгани учун жазолаш усули деб билишини айтди.
"Газпром" "Шимолий оқим 1" орқали газ оқимини бир неча бор қисқартирган, буни техник муаммоларни, масалан, ускуналарни таъмирлаш билан тушунтирганди. Германия бу қисқартиришларни Украинадаги уруш шароитида ноаниқлик ва нархларни ошириш учун сиёсий қадам деб атамоқда.
Россия урушда Украина томонида бўлган бошқа Европа давлатларига ҳам газ етказиб беришни қисқартирди.
Сўнгги пайтларда Германиянинг газ етказиб беришнинг учдан бир қисми Россия ҳиссасига тўғри келади.
Ўтган ҳафта ҳукумат газ оқимининг камайиши Германиянинг Россия таъминотига таянмаслигини тасдиқлаб, газни сақлаш талабларини ошириши ва захираларни тежаш учун қўшимча чоралар кўришини эълон қилди.
Қирғиз ҳуқуқ фаоли Бишкек кўчаларига чизиб кетилган Z ва V ёзувларини ўчирди
Ҳуқуқ фаоли Ўндуруш Тўқтўнасиров Бишкек кўчаларига номаълум шахслар томонидан чизиб кетилган Z ва V ёзувларини ўчириб чиқди. У 31 август - Мустақиллик куни арафасида Бишкек кўчаларига Россиянинг Украинага босқини рамзига айланган бу харфларни чизиб кетганларни қоралади.
Z ва V харфлари Украинага бостириб кирган рус ҳарбий техникасига чизилган эди. Кремль пропагандистлари бу харфларни “махсус амалиётнинг рамзлари” деб атайди.
Бунгача Бишкек милицияси ўз автомашиналарига Z харфини ёпиштирган ҳайдовчиларга жарима солган ва ёзувни олиб ташлашга мажбурлаган эди.
Форум