Россия темир йўлни бомбардимон қилгани оқибатида камида 22 киши ҳалок бўлди
Украина президенти Владимир Зеленский видеоалоқа орқали БМТнинг Хавфсизлик кенгашида 24 август куни қилган чиқиши пайтида Россия Днепропетровск вилоятида темир йўлни бомбардимон қилгани оқибатида 15 киши ҳалок бўлганини маълум қилди.
“Мен ҳозиргина Россия Днепропетровск вилоятидаги Чаплино станциясида турган вагонларга ракета отгани тўғрисида маълумот олдим. Ҳозир йўловчи ташувчи тўртта вагон ёнмоқда. Дастлабки маълумотларга қараганда, камида 15 киши ҳалок бўлди, 50 киши яраланди. Қутқарувчилар ишламоқда. Афсуски, ҳалок бўлганлар сони кўпайиши эҳтимол”,- деди Зеленский.
Кейинроқ ҳужум оқибатида ҳалок бўлганлар сони камида 22 кишига етгани расман хабар қилинди.
“Оперативний Днепр” телеграм каналида станцияга қилинган ҳужумга оид фотосуратлар эълон қилинди.
Уруш шароитида Озодлик мазкур ҳужум тафсилотларини тезкор тарзда мустақил манбалардан тасдиқлаш имкониятига эга эмас.
Россия армияси 8 апрель куни ҳам Донбасснинг Краматорск шаҳри вокзалига ракета отган эди. Ўшанда камида 57 киши ҳалок бўлган. Россия Краматорск вокзалига ракета отганини рад этиб келади ва Украинани айблайди. Киев эса ҳужум учун Москва масъул эканини таъкидлаб келади.
Британия Украинага 63,5 миллион долларлик дронларни беради
Украина Мустақиллик куни муносабати билан 24 августда Киевга борган Британия Бош вазири Борис Жонсон украин армиясига яна 63,5 миллион долларлик ҳарбий ёрдам кўрсатилиши тўғрисида баёнот берди.
Мазкур ёрдам 2000 та замонавий кичик дронлар ва танкка қарши снарядлардан иборат бўлади. Бундан ташқари Украинага шаҳар ва қишлоқ шароитида разведка ўтказиш имкониятига эга бўлган 850 та Black Hornet нанодронлари ҳам берилади.
Британия Бош вазири маъмуриятининг билдиришича, бу дронларнинг катталиги мобил телефонига тенг бўлиб, уларни бошқаришни 20 дақиқа ичида ўрганиш мумкин.
Шунингдек, Украинага миналарга қарши қайиқлар ҳам тақдим этилади. Қайиқлар воситасида денгизнинг соҳилбўйи ҳудудларини миналардан тозалаш мумкин.
Британия Украинага Россия бостириб кирган биринчи кунларданоқ кўмак кўрсатишни бошлаган. Олти ой ичида Лондон Киевга 2 миллиард 700 минг долларлик ҳарбий ёрдам кўрсатди.
АҚШ Украинага навбатдаги 3 миллиард долларлик ёрдамни ажратди
АҚШ президенти Жо Байден 24 август- Украина Мустақиллик куни муносабати билан эълон қилган баёнотида Киевга 2 миллиард 980 миллион доллар миқдорида навбатдаги ёрдам ажратилиши ҳақида билдирди. Бу Россия босқини бошланганидан бери АҚШ томонидан Украинага берилган ёрдам траншининг энг каттасидир.
Байденга кўра, бу маблағ эвазига Украина ҳаводан мудофаа тизимларини, артилерия қуролларини, ўқ-дориларни, дронларни ва радарларни сотиб олади.
«Сўнги олти ой давомида украиналиклар мисли кўрилмаган жасорати ва эркинлик тамойилларига содиқлиги билан жаҳонни илҳомлантирмоқда. Улар Россиянинг Украинага тўлақонли босқинига қарши қатъий курашмоқда. Бугун биз Украина мағрур равишда мустақил давлат эканини ва шундайлигича – суверен ва мустақил бўлиб қолишини тасдиқлаймиз»,-деди Байден.
19 август куни Байден Украинага 775 миллион долларлик ҳарбий ёрдам ажратиш тўғрисидаги фармонни имзолаган эди.
АҚШ Конгресси ҳаммаси бўлиб Украинага 40 миллиард долларлик ёрдам пакетини маъқуллаган, бу маблағнинг 20 миллиарди ҳарбий эҳтиёжлар ва мудофаа салоҳиятини ошириш учун сарфланиши айтилган.
Россия яна тинч аҳолини нишонга олди - 22 қурбон
24 август Украина Совет Иттифоқидан мустақил бўлганининг 31 йиллигини нишонлар экан, Россия украин шаҳарчасида амалга оширган ракета зарбалари ортидан йўловчи поезди ёниб кетган ва камида 22 киши ҳалок бўлган, ўнлаб одамлар яраланган.
Украина шарқида жойлашган Чаплино шаҳарчаси аҳолиси вайроналар ичида қолган яқинлари учун аза очишган.
«Овозини эшитмадик. Ҳеч нарса эшитилмади. Фақат портлаш эшитилди. Портлаш содир бўлди ва ёнғин бошланди», – деди шаҳар турғуни Татьяна Reuters агентлиги билан суҳбатда.
Ҳужум туфайли чаплинолик Сергей 11 ёшли ўғлидан айрилган.
«...11 ёшда... Уйда эди, зарба уни улоқтириб юборибди. Биз уни ўша ердаги вайроналарда қидирдик. Мана бу ерда ётган экан. Бу ерда эканлигини ҳеч ким билмаган. Ҳеч ким. Балки у томга улоқтирилгандир, деб ўйлагандик, лекин у шу ерда ётган экан. Агар аввалроқ хабар топганимизда... Лекин бу ерда ётганини ҳеч ким билмаган», – деди у ўралган жасаднинг ёнида чўккалаганича.
Украина президенти Владимир Зеленскийнинг ёрдамчиси Кирилл Тимошенконинг сўзларига кўра, рус кучлари Чаплинога икки марта зарба берган. Биринчи ҳужумда ракета бориб урилган уй ичидаги ёш бола ҳалок бўлган.
Кейинроқ эса темир йўл станциясига берилган ракета ҳужумлари ортидан йўловчи поездининг беш вагони ёниб кетган, натижада 22 киши ҳалок бўлган.
23 август куни президент Зеленский Украина Мустақиллик кунига Россия «провокация» тайёрлаётгани ҳақида огоҳлантирган эди. Шунингдек, 24 август куни Россия қўшинларининг Украинага бостириб кирганига роппа-роса 6 ой тўлди.
Зеленский Бирлашган Миллатлар Ташкилоти Хавфсизлик Кенгашига видеомурожаат қилиб, Россия ракеталари Чаплинода йўловчи поездга бориб урилганини айтди.
«Бугун мамлакатимизда асосий миллий байрам – Мустақиллик байрами нишонланмоқда. Эндиликда ҳар бирингиз дунёда қанча [нарса] давлатимиз мустақиллиги билан боғлиқлигини, хусусан, Украина тинчлиги, халқимиз хавфсизлиги, ҳудудимиз яхлитлиги ва чегараларимиз дахлсизлиги билан боғлиқлигини кўриб турибсизлар. Россия бизга қарши бошлаган бу даҳшатли урушнинг ҳар бир жиҳатини кўриб чиқиш мумкин ва ҳар бир жиҳатда яна бир глобал инқирознинг илдизларини топса бўлади».
Зеленский ярим тунда украиналикларга мурожаат қилар экан, рус ракеталари тинч аҳоли уйларини, йўловчи поездларни нишонга олаётганини айтди. Зеленский босиқнчилар бу ишлари учун жавоб беришини таъкидлади:
«Чаплино – бугун бизнинг ярамиз. Ҳозиргача 22 одам ҳалок бўлди, улардан беш нафари вагонда куйиб кетди. 11 ёшли ўсмир ҳалок бўлди. Рус ракетаси унинг уйини вайрон қилди. Қидирув-қутқарув ишлари вокзалда давом этади. Босқинчиларни ҳамма қилган иши учун албатта жавоб беришга мажбур қиламиз. Ҳеч шубҳасиз босқинчиларни юртимиздан қувиб чиқарамиз. Озод Украинамизда бу ёвузликдан асар ҳам қолмайди. Ғалаба сари қадам ташлайлик. Ғалаба бўлади!»
Чаплино шаҳарчаси Россия босиб олган Донецкдан 145 км ғарбда жойлашган.
Россия томони ҳозирча бу талафотлар юзасидан расмий маълумот бергани йўқ.
Уруш шароитида Озодлик бу рақамларни мустақил манбалардан тасдиқлаш имконига эга эмас.
Форум