Донецкда савдо маркази ёнмоқда
Донецкда Галактика савдо марказида ёнғин содир бўлди. “ДНР” томонидан босиб олинган Донецк мери деб аталувчи Алексей Кулемзин ўзининг телеграмдаги каналида бунга Украина Қуролли кучларининг ўққа тутилиши сабаб бўлганини ёзди.
“Жабрланганлар ва етказилган зарар миқдори ҳақида маълумотлар аниқланмоқда”, — деди у.
Россия билан ҳамкорлик қилган маъмур портлатиб кетилди
Запорожье вилоятининг Россия назоратидаги Михайловка қўрғони муваққат маъмурияти раҳбари Иван Сушко суиқасд натижасида ўлдирилди. Бу ҳақда босиб олинган Запорожье вилоятининг Россия тайинлаган маъмурияти вакили Владимир Рогов маълум қилди.
Айтилишича, портлатиш қурилмаси мулозимнинг автомобили тагига ўрнатилган. Сушко олган жароҳатидан касалхонада вафот этган. Рогов суиқасдда Украина томонини айблади.
Сушко апрель ойида Михайловкага раҳбар этиб тайинланган эди. У илгари Украина Қуролли кучлари десант-штурм қўшинларида хизмат қилган.
Сўнгги ойларда Украинанинг Россия ишғол қилган ҳудудларида Москва тайинлаган мулозимларга нисбатан бир неча суиқасд амалга оширилди.
Шойгу Тошкентда нутқ сўзлади
Россия мудофаа вазири Сергей Шойгу Украина мустақиллик кунини нишонлаётган 24 август куни Тошкентга келди. Тошкентда Шанҳай ҳамкорлик ташкилотига аъзо давлатлар мудофаа вазирларининг кенгаши мажлисида қатнашган Шойгу ШҲТнинг жанговар салоҳиятини оширишга чақирди.
Шойгунинг иддаосича Россия Украинада тинч аҳоли орасида талафотларни камайтириш мақсадида ҳужум суръатини атайин пасайтирган, АҚШнинг мақсади эса Москвани стратегик жиҳатдан ҳолдан тойдиришдир.
- АҚШ ва жамоавий Ғарб мустақил давлатларга жаҳон ҳукмронлигини сақлаб қолиш учун мисли кўрилмаган босим ўтказаётган бир пайтда жиддий янги муаммолар пайдо бўлмоқда. Бунинг учун қўпол шантаж, таҳдидлар, рангли инқилоблар ва тўнтаришлардан фойдаланилмоқда, қўпол дезинформация тарқатилмоқда, деди Сергей Шойгу.
Россия мудофаа вазирининг сўзларига кўра, Москва афғонистондаги вазият манзарасида ўзининг Тожикистон ва Қирғизистондаги ҳарбий базалари жанговар тайёргарлигини кучайтиради.
Шанҳай ҳамкорлик ташкилоти мудофаа вазирлари кенгашига мезбонлик қилаётган ўзбекистон томони Шойгунинг баёнотига ҳеч қандай муносабат билдиргани йўқ. Расмий Тошкент Украинадаги уруш юзасидан бетараф мавқени эгаллаганини айтиб келади, аммо Украина ва Американинг Тошкентдаги дипломатлари Ўзбекистон расмийларининг баёнотлари унчалик ҳам нейтрал эмаслиги, Тошкент Украинадан масофалангани ҳолда, Россияга яқинроқ мавқеъни эгаллаётганини айтганлар.
Украина мустақиллиги кунида президент Байден Украинага яна 3 миллиард долларга яқин ҳарбий ёрдам ажратилиши ҳақидаги фармонни имзолади. Ҳарбий ёрдам дронлар, қурол яроқ ва энг замонавий жиҳозларни сотиб олишга сарфланади. Бугунга қадар АҚШ ёрдами 10 млрд 600 млн доллардан ошди.
ISW: Путин Шойгуга ўз ишончини йўқотган
Вашингтондаги урушни ўрганиш институти (ISW) Украинадаги қуролли можаронинг кунлик таҳлилини эълон қилди.
Хабарда айтилишича, Россия ушбу ҳудуддаги кескинликни камайтириш учун “ЛНР”га Миллий гвардиянинг қўшимча бўлинмаларини юборишга мажбур бўлган.
Ҳисоботда айтилишича, Россиянинг Украинадаги ҳарбий қўмондонлиги мудофаа вазири Сергей Шойгуга эмас, бевосита Россия президенти Владимир Путинга бўйсунади. Шойгу Украинага кенг кўламли босқиннинг дастлабки босқичидан сўнг Путиннинг ишончини йўқотди, Шойгу тезда ғалаба қозониш ҳақидаги ваъдаларига қарамай муваффақиятсизликка учради.
Россия қўшинлари Бахмутнинг шимоли-шарқида ва жанубида, Донецкнинг шимоли-ғарбий чеккасида ва Донецкнинг жануби-ғарбий қисмида чекланган қуруқлик ҳужумларини амалга оширди. Улар Николаев шаҳрининг шарқида ва Херсон вилоятининг шимоли-ғарбий қисмида чекланган муваффақиятларга эришдилар.
Украина кучлари Херсон вилоятидаги Россия ҳарбий обектлари ва қуруқлик линияларига зарба беришда давом этди.
Кремл украиналик болаларни Россияга олиб келиб, рус оилаларини уларни асраб олишга мажбур қилмоқда. Краснодар ўлкаси ҳукумати 1000 дан ортиқ болани Мариуполдан Тюмен, Иркутск, Кемерово ва Олтой ўлкасига кўчириб ўтказгани ва у ерда рус оилалари томонидан асраб олинган дастур ҳақида маълумот эълон қилди.
Форум