Германия ва Канада: Украина ва иқлим бўйича мақсадимиз бир
Россиянинг Украинага босқини Канада ва Германияни бир-бирига яқинлаштирмоқда. Икки мамлакат қазиб олинадиган ёқилғидан воз кечиш йўлида чора кўрар экан, Канада Германияга энергия ва муҳим минераллар экспортини оширишга бел боғлаган. Бу ҳақда 22 август куни бу икки мамлакат раҳбарлари маълум қилишди.
Душанба куни эрталаб Германия канцлери Олаф Шольц Канада бош вазири Жастин Трюдо билан учрашди. Шольцга Германия компаниялари раҳбарларидан иборат делегация ҳамроҳ бўлди.
Германия келаётган қишда санкцияларга жавобан Россия табиий газ экспортини янада қисқартиришдан хавотирда.
«Дунё Россияга қарши жазо чораларини, йирик иқтисодиётга нисбатан қўлланган энг қатъий санкцияларни жорий қилди. Бу ҳеч қаерда осон бўлгани йўқ, айниқса Европада, хусусан Германияда. Лекин, канцлер Шольц, катта босимлар ва энг қийин иқтисодий ва сиёсий вазиятларга қарамай, ўз раҳбариятингизнинг кучини қайта-қайта исботладингиз», – деди Трюдо.
Кун бошида Шольц Германия Россия таъминотига қарам бўлмаслик учун бошқа жойлардан газ сотиб олиши кераклигини, айни дамда мамлакат 2045 йилга бориб углерод чиқиндиларини нолга туширишни ўз олдига мақсад қилиб қўйганини айтди.
Канада эса 2050 йилга қадар углерод чиқиндиларидан воз кечмоқчи. Германия 2024 йил ўрталарида Россия газига бўлган эҳтиёжига барҳам бермоқчи.
Икки мамлакат 23 август Канададан Германияга водород ва муҳим минераллар экспортини тезлаштириш бўйича келишувларни эълон қилиши кутилмоқда.
Украина президенти Зеленский Россияни «террорчи давлат» деб тан олишга чорлади
22 август куни Украина президенти Россияни террорчи давлат сифатида тан олиш чақириғини такрорлади.
Зеленский навбатдаги тунги нутқини сўзлар экан, Россияни террорчи давлат сифатида қонуний белгилаб олиш ташаббусини илгари сураётганларга миннатдорчилик билдирди.
«Россияга қарши саккизинчи санкциялар пакети муҳим эканлигини унутмаган барча европалик сиёсатчилардан миннатдорман. Санкциялар пакетлари орасидаги оралиқ қанчалик узоқ бўлса, Россиянинг сурбетлиги шунчалик кучаяди. Объектив воқеликни тан олиш ва Россияни ҳуқуқий жиҳатдан террорчи давлат деб белгилаш зарурлигини тарғиб қилаётган барча дўстларимизга, эркинлик бўйича жаҳон бўйлаб барча ҳамфикрларимизга миннатдорчилик билдираман».
Москва ўз босқинини Украинани қуролсизлантириш ва у ердаги русийзабон жамоаларни ҳимоя қилиш операцияси деб атайди. Украина ва унинг иттифоқчилари эса Россияни босқинчилик урушини олиб бораётганликда айбламоқда.
Душанба куни БМТ урушда бугунга қадар 5 500 нафар тинч аҳоли вакили ҳалок бўлганини маълум қилди.
Киев Россия ҳужуми хавфи кучайганини айтиб, жорий ҳафтада совет ҳокимиятидан мустақилликни нишонлаш учун оммавий байрамларни тақиқлади.
Зеленский ижобий янгиликларни ҳам улашди – президент Украина ва Молдовани боғлаб турадиган темир йўл таъмирланиб, қайта ишга тушганини айтди.
Зеленскийнинг айтишича, ушбу темир йўл йилига ўртача 10 миллион тонна юк ташиш имконини беради.
АҚШ ҳукумати Украинага айрим қуролларни яширинча бераётган бўлиши мумкин
Бу ҳақда Politico хабар қилди. Нашр маълумотига кўра, 19 августда Пентагоннинг юқори мартабали вакили АҚШ бирмунча вақт Киевга радиолокация қурилмаларига зарба берувчи HARM ракеталарини етказиб берганини, аммо буни жамоатчиликка билдирмаганини тан олган.
“Украинага HARM ракеталари берилиши ҳақида илк бор маълум қилганимизда баёнотда у аниқ кўрсатилмаган эди. Биз уни “радиолокация қурилмаларига қарши имкониятлар” дея кўрсатганмиз”, деган Пентагон мулозими.
Politico газетасининг икки манбаси Киевга тақдим этиладиган янги ҳарбий ёрдам пакетида Excalibur русумли артиллерия снарядлари борлигини айтган. Ҳолбуки, ўтган ҳафтада эълон қилинган баёнотда бу ҳақда ҳеч нима дейилмаган эди.
Politico Украинага навбатдаги ёрдам пакети ажратилгани муносабати билан Конгрессга йўлланган хабарнома билан танишганини, унда Вашингтон Киевга етказиб берадиган қурол-аслаҳа рўйхатда кўрсатилганлар билан чекланмаслиги қайд этилганини маълум қилган.
Урушни ўрганиш институти (ISW): Запорожье вилоятидаги рус оккупацион маъмурияти амалда Украинадан мустақиллик эълон қилди
Вашингтондаги Урушни ўрганиш институти (ISW) Украина уруши бўйича навбатдаги кундалик таҳлилини эълон қилди.
Экспертларга кўра, Россия қўшинлари Изюмдан жануби-ғарб ва жануби-шарқ томон локал ҳужумлар уюштирган, шунингдек Северскдан жануби-шарққа ҳамда Бахмутдан шимоли-шарқ ва жанубга ерусти ҳужумларини давом эттирган. Айни чоғда Россия армияси Донецкнинг шимолий ва ғарбий чеккаларидан ҳужум қилишда давом этиб, Николаев-Херсон чизиғида кичик ютуқларга эришган.
Украина разведкаси тан олинмаган Луганск Халқ Республикаси 1 сентябрда “ялпи сафарбарлик” жараёнини бошлашга ҳозирланаётганини маълум қилди.
Запорожье вилоятининг рус оккупацион маъмурияти Украинадан мустақиллигини билвосита эълон қилди. Маъмурият раҳбари Евгений Балицкий имзолаган буйруққа кўра, босиб олинган Запорожье вилоятига келувчи Украина фуқаролари Россия қонунчилигига биноан вақтинча бошпана излаётган қочқинлар деб ҳисобланади. Ва улар, вақтинча бошпана бериш ҳақида расман илтимоснома берган тақдирда қайддан ўтишлари мумкин бўлади. Шу тариқа Россия оккупацион маъмурияти Запорожье вилоятининг босиб олинган ҳудудига кирган барча украинлар Украинада таъқибдан қочиб келган қочқинлар сифатида таснифланади.
Форум