Россиянинг Украинага босқинига 6 ой тўлди
Россиянинг Украинага қарши бошлаган урушига 24 август, чоршанба куни олти ой тўлади. Президент Владимир Путин шу йилнинг 24 февралида, ўз наздида жиддий таҳдид, деб атаган хавфни бартараф этиш учун Украинага қарши “махсус ҳарбий операция” ўтказишга буйруқ берганди.
Путин бундан мақсад Россиянинг жанубий қўшнисини, ўз таъбирича, демилитаризация ва денацификация қилиш эканини иддао қилган:
"Бизни жанг майдонида мағлуб қилмоқчи эканликлари ҳақида эшитяпмиз. Нима ҳам дейман, бунга уриниб кўришсин. Ғарб биз билан Украинагача ҳам жанг қилмоқчи эканлигини кўп бора эшитганмиз. Бу Украина халқи учун фожиа. Лекин ҳамма билиши керакки, биз ҳеч нарсани ҳали жиддий тарзда бошламадик. Айни пайтда биз тинчлик музокараларини рад этмаймиз, лекин рад этаётганлар билиши керакки, ҳаммаси қанчалик узоққа чўзилса, биз билан шартнома тузиш улар учун шунча қийинроқ бўлади".
Россиянинг Украинага бостириб кириши Европада Иккинчи жаҳон урушидан кейинги энг катта инқирозга сабаб бўлди.
Россия босқини пайтидаги ўлим ва вайронагарчиликлар билан бир қаторда, Ғарбнинг Россияга санкциялари дон, ўсимлик ёғи, ўғит ва энергия нархини глобал ошишига олиб келди.
Бирлашган Миллатлар Ташкилоти Украинадаги уруш туфайли очарчилик хавфи юзага келиши ҳақида огоҳлантирди.
Россия озиқ-овқат инқирози учун жавобгарликни рад этиб, бунда Ғарб санкциялари ва Украина портларни миналаштирганини сабаб қилиб кўрсатмоқда.
Чоршанба куни Украина Совет иттифоқидан мустақил бўлганини нишонлайди
Президент Владимир Зеленский, бу санада Москвадан “исталган хунрезлик”ни кутишини айтиб, олдиндан ҳушёр бўлишга чақирди.
Шунингдек, Украина президенти Владимир Зеленский Россия тергов идоралари Мариуполда украин ҳарбий асирларини суд қилишга ҳозирланаётгани ҳақидаги хабарларга изоҳ берар экан, “бу Россияни музокаралардан узиб қўяди”, деди.
Аввалроқ тан олинмаган “ДХР” раҳбари Денис Пушилин “трибуналга тайёргарлик кўрилаётгани”ни ва “илк трибуналлардан бири Мариуполда бўлиши”ни айтган эди.
“Босқинчилар нимани ўйламасинлар, нимани режа қилмасинлар, давлатимизнинг муносабати мутлақо аниқ бўлади. Агар бу жирканч суд юз берса, бизнинг одамларимизни барча келишувларга, жамики халқаро қоидаларга зид ўлароқ ушбу театрга тортадиган, уларни масхара қиладиган бўлсалар, ундан сўнгра ҳар қандай музокара имконсиздир. Россия бу билан ўзини ўзи музокаралардан узиб қўяди”, деди Украина президенти Владимир Зеленский.
Аввалроқ Мариуполнинг Украина тайинлаган мэри Вадим Бойченко Россия ҳарбийлари 24 август – Украина Мустақиллиги кунида украин ҳарбий асирлари устидан суд ўтказиши мумкинлигини айтган эди.
Бойченко суд мажлиси бўлиб ўтадиган Мариуполь филармониясида украин асирлари учун қурилган темир қафас суратини эълон қилар экан, жаҳон ҳамжамияти, БМТ ва Қизил хочни “Мариуполда Еленовка фожиаси такрорланишига йўл қўймаслик учун” вазиятга аралашишга чақирди.
АҚШ ўз фуқароларини Украинани тарк этишга чорлади
23 август куни АҚШ ўз фуқароларини Украинани тарк этишга чақирди. АҚШнинг Киевдаги элчихонасига кўра, Россия яқин бир неча кун ичида фуқаролик ва ҳукумат инфратузилмасини нишонга олишга ҳозирлик кўрмоқда.
Аввалроқ Украина ҳукумати 24 август куни пойтахт Киевда совет ҳокимиятидан мустақиллик муносабати билан байрам тадбирларини ўтказишни ман қилган эди.
АҚШ элчихонаси сешанба куни эълон қилган баёнотда «Давлат департаменти Россия яқин кунларда Украинанинг фуқаролик инфратузилмаси ва давлат объектларига зарба бериш саъй-ҳаракатларини кучайтираётгани ҳақида маълумотга эга», дейилади.
Баёнотда АҚШ фуқаролари Украинани «зудлик билан» тарк этишлари керак, дейилади.
АҚШ биринчи марта бундай огоҳлантириш бераётган йўқ. Бу сафарги огоҳлантириш Украина Мустақиллиги куни арафасида эълон қилинди.
Ўтган ҳафтанинг шанба куни Москва яқинида автомашинага ўрнатилган портлашда таниқли россиялик миллатчи таҳлилчининг қизи Дарья Дугина нобуд бўлган эди. Москва қотилликда Украина агентларини айбламоқда. Киев эса бу айбловни рад этди.
Зеленский босиб олинган ҳудудларда Украина байроғини кўтаришга ваъда берди
23 август куни Украина президенти Владимир Зеленский мамлакатнинг Россия томонидан босиб олинган ҳудудларида Украина давлат байроғини кўтаришни ваъда қилди.
Зеленский Украинанинг пойтахт Киевда совет ҳокимиятидан мустақилликни нишонлашга қаратилган маросимида қатнашди.
«Бугун нафақат байроғимизнинг ўтмиши ҳақида, балки келажаги ҳақида ҳам гапирмоқчиман. Кўк-сариқ байроқ яна ўз уйида ҳилпирайди. Украинанинг барча вақтинча босиб олинган шаҳарларида, қишлоқларида. Вақтинчалик ишғол қилинган ҳудудларда абадий ҳилпирайди. Мелитополда – Ғалаба майдонида, мазкур урушда мағлуб бўлганларнинг байроғи бўлиши мумкин бўлмаган жойда. У ерда кўк-сариқ байроқ кўтарилади. Херсонда – Озодлик майдонида. Эркинлик нимани англатишини билмаганларнинг байроғи у ерда бўлиши мумкин эмас».
Президент нутқи ортидан Россия билан урушда ҳалок бўлганлар шарафига бир дақиқа сукут сақланди.
Сешанба куни Россия Запорожье вилоятида артиллерия ва ҳаво ҳужумларини амалга оширди. У ерда йирик АЭС жойлашган.
Киев Россия ҳужуми хавфи кучайганини айтиб, совет ҳокимиятидан мустақилликни нишонлаш учун оммавий байрамларни тақиқлади.
АҚШнинг Киевдаги элчихонаси ҳам ўз баёнотида Россиянинг яқин кунларда зарба бериш режалари ҳақида огоҳлантирди.
Форум