Европада табиий газнинг фючерс нархлари кескин кўтарилди
Жума куни “Газпром” “Шимолий оқим-1” қувури орқали Европага газ етказиб бериш қувурда таъмирлаш ишлари бажарилиши муносабати билан уч кунга тўхтатиб турилиши ҳақида эълон қилганидан сўнг Европада табиий газнинг фючерс нархлари кескин кўтарилди. Жума куни табиий газ фючерс нархи март ойидан бери илк дафъа бир кубометр учун 2700 АҚШ долларидан ошди, савдолар якунида сентябрда етказиб бериш шарти билан 2670 АҚШ долларлик нарх қайд этилди.
Июнь ойи ўрталарида “Газпром” Россияга қарши санкциялар туфайли Siemens ширкати газ-турбина двигателларини ўз вақтида капитал таъмирлаб бера олмаганини баҳона қилиб асосий газ қувури орқали газ етказиб беришнинг суткалик миқдорини камайтирган эди. 27 июлда эса “Газпром” Европага газ юбориш кунлик миқдорини янада қисқартириб, 33 миллион кубометрга туширдики, бу газ қувури максимал ўтказиш қувватининг тахминан 20 фоизини ташкил қилади.
2011 йилда қуриб битказилган “Шимолий оқим-1” газ қувури Россия шимоли-ғарбидаги Виборг шаҳрини Болтиқ денгизи туби орқали Германия билан боғлайди. Унга қўшимча равишда 2021 йилда қуриб битказилган “Шимолий оқим-2” газ қувурини сертификатлаш ишлари февраль ойида Россия Украинада уруш бошлаганидан сўнг тўхтатилган эди.
Россия яна янги омборларни йўқ қилганини даъво қилмоқда
Россия Украинанинг Одесса вилоятидаги ўқ-дорилар омборини йўқ қилганини, Украина эса Россиянинг Донецкда бир неча йўналишдаги ҳужумларини қайтарганини даъво қилмоқда.
Жумладан, Россия Мудофаа вазирлиги матбуот котиби Игор Конашенковнинг маълум қилишича, рус ҳарбийлари Одесса вилоятининг Майорское қишлоғи яқинида Калибр ва ҲИМАРС ракета тизимлари ҳамда Ғарбда ишлаб чиқарилган зенит тизимлари учун ракета ва ўқ-дорилар омборини йўқ қилган.
Шунингдек, Россия ҳарбий-ҳаво кучлари Запорожье вилоятида Украинанинг 102-ҳудудий мудофаа бригадасининг ёнилғи омборини ва Херсон вилоятидаги жанговар позицияларда Американинг иккита М777 гаубицасини йўқ қилди, деб маълум қилди Конашенков.
Украина Қуролли кучлари Бош штаби эса якшанба куни украин армияси Россиянинг Славянск, Бахмут, Авдеевка ва Донецк вилоятининг бошқа ҳудудларидаги ҳужумларини қайтарганини маълум қилди.
Ҳозирда рус қўшинлари Украина жанубида Николаев ва Херсон йўналишида тўпланмоқда.
Украина ҳарбий-денгиз кучларининг маълум қилишича, Россия армияси Қора денгиздаги ҳарбий мавжудлигини кучайтирмоқда.
Ҳозирда Қора денгизда 36 калибрли қанотли ракеталар билан қуролланган бешта рус ҳарбий кемаси жанговар навбатчилик қилмоқда.
Уруш шароитида томонлар бераётган бу маълумотларни мустақил манбалардан тасдиқлаш имконсиз.
РФ армиясида фундаментал муаммо
Американинг Урушни ўрганиш институти (ISW) маълумотига кўра, Россия кучлари аввалроқ Бахмут ва Авдеевка остонасида эришган ютуқларидан фойда чиқара олмагани РФ армиясида фундаментал муаммо – тактик ютуқларни оператив ютуқларга айлантиришга лаёқатсизлик мавжудлигини кўрсатади.
Россия қўшинлари Украина шарқида жуда имиллаб олдинга силжиётгани ва катта эҳтимол билан, яқин ойларда янги ҳудудларни ишғол эта олмаслиги шу билан изоҳланади. Мавжуд аҳволни фақат тасодифларгина ўзгартириши мумкин.
Шунингдек, институт Россия оккупацион маъмурияти 24 август – Украина Мустақиллиги куни арафасида фильтрлаш тадбирларини кучайтирганини ва босиб олинган ҳудудларда одамларни ўғирлаш авж олганини қайд этган.
ФСБ: Дугина ўлимини украин махсус хизматлари уюштирган
Россия Хавсизлик хизмати “Русский мир” ғоясининг тарғиботчиси Александр Дугиннинг қизи Дарья Дугина ўлимини украин махсус хизматлари уюштирган, деган баёнотни эълон қилди.
Россия томони иддаосича, гўёки суиқасдни Украинанинг Наталья Вовк исмли фуқароси содир этган ва жиноятдан сўнг Эстонияга ўтиб кетган.
"Вовк Россияга 2022 йилнинг 23 июлида қизи билан кириб келган”, деб даъво қилмоқда Россия федерал хавфсизлик хизмати.
Украина президенти офиси раҳбарининг маслаҳатчиси Михаил Подоляк эса, “Русский мир” мафкурачиси Дугиннинг қизи - Дарья Дугина машинасининг портлатилишига Киевнинг алоқаси йўқ, деб баёнот берди.
“Таъкидлаб айтаманки, Украинанинг бунга мутлақо дахли йўқ, чунки биз Россия Федерацияси сингари криминал давлат эмасмиз, террорчи давлат ҳам эмасмиз”, деди Подоляк.
Мулозим фикрича, мазкур қотиллик Россия ичида ҳокимият учун кураш ва турли гуруҳларнинг тўқнашуви мавжудлигидан далолат беради, Россия ҳукумати эса Украинага нафрат “пилигини кўтариш” ва ички сиёсий дискурсни радикаллаштириш мақсадида Россия жамиятига “мафкуравий ахборот босими”ни ошириш учун бундан фойдаланмоқчи.
Россиянинг пешқадам пропагандачилари, жумладан, Владимир Соловьёв ҳамда Маргарита Симоньян Дарья Дугина ўлимига муносабат билдираркан, Украинадан қасос олишни талаб қилишди.
бошқарувидаги Toyota Land Cruiser шанба оқшомида Москва вилоятида портлаган. Дугин ва унинг қизи ўша куни “Традиция” номли ватанпарварлик фестивалида иштирок этишганди.
Айрим тахминларга кўра, улар Москвага бирга қайтишлари керак бўлган ва номаълум қотиллар ГЎЁКИ аслида Путиннинг Укринадаги урушини фаол тарғиб қилиб келаётган файласуф ва мафкурачи Дугинни ўлдиришга қасд қилганлар.
Форум