Губернатор Запороже АЭСи ҳудудини қуролсизлантиришга чақирди
Запороже вилояти губернатори Запороже атом электр станциясини қуролсизлантириш ва унинг хавфсизлигини таъминлаш учун халқаро ташкилотларни даъват қилди.
Губернатор АЭС ичкариси ва атрофида қурол мутлақо бўлмаслигини таъминлаш керак, деди Олександр Старух, Запороже вилояти губернатори:
- Ҳозирда вазият кескинлигича қолмоқда. Худога шукур, ядровий хавф туғдирувчи объектлар ўққа тутилмаган, радиациявий фон нормал чегараларда. Аммо шу билан бирга, у ерга қўшин ва ўқ-дориларни жойлаштириш эртами-кечми тузатиб бўлмас оқибатларга олиб келиши мумкин.
У МАГАТЭ (Атом энергияси бўйича халқаро агентлик) каби ташкилотларнинг қоидаларини бажаришга чақирди.
В.Зеленский: АЭСдаги ҳар бир рус солдати нишонимизга айланади!
Украина мамлакат жанубидаги босиб олинган атом станциясига қарата ўт очаётган ёки ундан фойдаланаётган рус аскарларини нишонга олди, деди президент Владимир Зеленский 13-август кунги кечки чиқишида.
- Станциядан ўқ узган ёки ундан ниқоб сифатида фойдаланаётган ҳар бир рус аскари бизнинг разведкачиларимиз, махсус хизматларимиз, армиямиз учун алоҳида нишонга айланишини англаши керак. Ва террористик давлатнинг мутлақо барча амалдорлари, шунингдек, атом электр станцияларида шантаж амалиётларида уларга ёрдам бераётганлар халқаро судда жавоб беришлари керак, - деди Владимир Зеленский .
Украина ва Россия Европадаги энг йирик атом электр станцияси бўлган Запороже атом электр станциясининг сўнгги пайтларда бир неча бор ўққа тутилиши юзасидан айбловлар билан алмашди. Уруш бошидаёқ станция рус қўшинлари томонидан эгаллаб олинганди.
Тафсилотларни келтирмаган Зеленский Россия атом электр станцияларидан ядровий шантаж учун фойдаланаётганликда айблади.
Беларус аэродромидаги портлашда бир нечта ҳарбий техника йўқотилди
Maxar Technologies компанияси Гомел вилоятидаги Зябровка аэродромининг янги сунъий йўлдош суратларини эълон қилди, суратлар 12 август куни олинган. Суратларда асосий учиш-қўниш йўлагида яқинда содир бўлган портлаш излари кўрсатилган ва яқин атрофда куйган ўсимликлар кўринади.
OSINT таҳлилчиларидан бири Оливер Александр Твиттерда ёниб кетган объектни "Т-72 танки ёки шунга ўхшаш" эканлигини аниқлади.
Зябровка аэродроми ҳудудида 11 августга ўтар кечаси портлашлар содир бўлганди. Бу ҳақдаги маълумотни бир вақтнинг ўзида бир нечта манбалар тасдиқлади - улар камида саккизта портлаш бўлганини хабар қилишди. Кейинроқ Беларус Мудофаа вазирлиги аэродром ҳудудида “техника двигатели” ёниб кетгани ҳақида хабар берди.
Беларуснинг Зябровка аэродромидан рус қўшинлари фойдаланаётгани Россиянинг Украинага қарши урушининг дастлабки кунларида маълум бўлди. Украинадан атиги 50 км нарида жойлашган Зябровкадан учоқлар мунтазам равишда учиб турган, Украинага ракеталар отиб турилган.
Саки аэродромида нечта учоқ йўқ қилинди?
Қримнинг Новофедоровка аэропортидаги портлашлардан кейин Россия 55 миллион доллардан 450 миллион долларгача бўлган самолётларини йўқотган бўлиши мумкин, деб ҳисоблайди Украинанинг Форбс нашри.
Американинг Планет Лабс компанияси Портлашлардан бир неча соат олдин аэродромнинг сунъий йўлдош тасвирларини олганини маълум қилди: ўша пайтда у эрда 20 дан ортиқ ҳарбий учоқ - асосан Су-30СМ қирувчи ва Су-24МР бомбардимончи самолётлари, битта оғир ҳарбий транспорт Ил-76 ва бир нечта вертолётлар бўлганини қайд этган. Форбес йўқ қилинган техниканинг умумий нархини 650-850 миллион долларга баҳолади.
Новофедоровкада қанча ва қайси учоқ зарба туфайли аниқ вайрон қилингани номаълум.
Турли манбалар турли рақамларни келтирмоқда: мутахассислар 8 дан 24 тагача самолёт йўқ қилинганини айтишмоқда. ИнформНапалм халқаро тергов ҳамжамиятининг Қрим манбаларига кўра, Россия роппа-роса 24 учоқни йўқотган. ИнформНапалм уларнинг нархини 380 миллион долларга баҳоламоқда.
Форум