Асирликдаги “Азовстал” мудофаачиларидан бири вафот этди
Тан олинмаган “ДХР” тергов изоляторида “Азовстал”ни мудофаа қилишда қатнашган украин ҳарбий асирларидан бири вафот этди. ТАСС агентлиги ўз манбасига таяниб хабар қилишича, аскар “Медведи SS” қўпорувчи-штурм гуруҳи” аъзоси бўлган.
Агентлик манбаси ҳарбий асир гўё сурункали касал ва гиёҳванд бўлганини айтган ва ўлим сабабини шу билан изоҳлаган. Бироқ бу хулосани тасдиқловчи бошқа бирон маълумот йўқ.
“Азовсталь” мудофаачилари оилалари ассоциацияси “Азов” полки жангчиларининг сохта трибуналларда суд қилинишини қоралаш, бунга йўл қўймаслик, ушбу бемаъниликни тўхтатиш илтимоси билан” Украина президенти Владимир Зеленскийга ҳамда Қизил хоч қўмитаси ва БМТга мурожаат қилди.
Ҳарбийлар қариндошлари фикрича, Украина ҳудудида давлат ва қонун белгилаб берган вазифаларини адо этган украин ҳарбийлари ўзга давлатлар, яна-тағин ҳеч ким тан олмаган сохта мамлакатлар томонидан суд қилиниши мумкин эмас.
Ўтган ҳафта Россия Олий суди Украинанинг Азов полкини террорчи гуруҳ деб ҳукм чиқарди.
Азов полки Украина шарқида Россияга қарши курашаётган энг жанговар украин ҳарбий тузилмаларидан биридир.
Россия мунтазам равишда ўз иддаосича, Азовни Украина “фашистлар” томонидан назорат қилинаётганининг исботи сифатида кўрсатиб келади.
Май ойининг ўрталарида таслим бўлган кўплаб Азов жангчилари Москва томонидан асирликда ушлаб турилибди.
Харьковда тунда камида тўртта портлаш бўлди
Кеча Харьковга қилинган ҳужумда бир киши ўлди, бири жароҳатланди. Бугун тунда Россия қўшинлари Харьковни яна ўққа тутди. Бу ҳақда вилоят ҳарбий маъмурияти раҳбари Олег Синегубов ўз телеграм-каналида маълум қилди.
“Кечаси соат 02:00 ларда душман Шевченко ва Индустриальний туманларига зарба берди. Меҳмонхона-ресторан мажмуаси, транспорт ва бошқа муҳим инфратузилма объектларига шикаст етди”, деб ёзди у. Ҳужум натижасида жабрланганлар йўқ.
Харьков шаҳри мэри Игорь Тереховга кўра, Индустриальний туманида “трамвай излари ва электр симёғочлар яксон қилинган”. “Яна битта снаряд ҳарбий инфратузилмага сира алоқаси бўлмаган икки қаватли иморат ёнида портлаб, фасад ва томга шикаст етказди, ойналар тўкилиб тушди”, деб ёзди Терехов.
Унинг айтишича, кечаси шаҳарда камида тўртта портлаш содир бўлган.
Николаев шаҳри хоинларни аниқлаш учун 2 кунга ёпилди
Ўтган дам олиш кунлари Украина ҳукумати Николаевда душманга артиллерия нишонларини белгилаш ва тузатишда ёрдам берган хоинларни қидириб топиш мақсадида шаҳарни икки кунга ёпиб қўйди.
"Натижада 7 нафар коллаборант қўлга олинди, улардан 5 нафари қидирувда бўлган, 20 та жиноят иши қўзғатилди, шунингдек яна 400 кишига нисбатан гумонлар текширилмоқда", деди Николаев мэри Александр Сенкевич “Настояшчее время” ёйинида.
Британия разведкаси: Россия Бахмут йўналишида 1 ойда атиги 10 чақирим силжий олди
Британия ҳарбий разведкаси маълумотига кўра, ўтган дам олиш кунлари Россия асосий эътиборини Украина жанубида мудофаани мустаҳкамлашга қаратган. Шу билан бирга, Украина армиясининг Донецк вилоятидаги позицияларига ҳужумлар давом эттирилган. Аммо Россия қўшинлари узоқ вақтдан бери ушбу ҳудудда устунликка эриша олгани йўқ.
Сўнгги ойда Россия учун Донбассдаги энг муваффақиятли ҳужумлар Бахмут йўналишида бўлди, бироқ шу 30 кун мобайнида Россия қўшинлари атиги 10 километр олдинга силжий олди холос. Донецк вилоятидаги бошқа йўналишларда эса бир ой ичида 3 чақиримдан ортиқ силжий олган эмас.
Развудкага кўра, мазкур ҳудудда Россия жангга лаёқатли пиёда аскарларни жамлаш ва чуқурроқ ёриб кириш мақсадида артиллериядан кенг фойдаланига қарамай барибир мақсадига эриша олмади.
Форум