26 минг рус ҳарбийси устидан тергов кетмоқда
Украина февраль ойидан бери рус ҳарбийлари билан боғлиқ содир этилган 26 мингга яқин ҳарбий жиноятлар ишини тергов қилмоқда.
Ҳарбий прокурор Юрий Белоусовга кўра, 24 та босқинчилик ҳолати бўйича 135 кишига айблов қўйилган:
"Агар уруш жинояти бўйича ишлар ҳақида гапирадиган бўлсак, деярли 26 000 та жиноий иш мавжуд. Шулардан ҳозирга қадар 135 та ҳолатда жиноятчиларга айблов эълон қилинган. Бу дастлабки жараён, яъни ҳали судга оширилмаган, бироқ биз айбдорларга расман айблов қўйганмиз. 135 гумондордан 15 таси Украинада, 120 таси Украинада эмас. 13 та иш судга топширилиб, 7 та ҳукм чиқарилган".
Май ойида қўлга олинган 21 ёшли рус аскари Россия босқинидан кейин Украинада уруш жиноятлари бўйича суд қилинган биринчи шахс бўлди. У қуролсиз фуқарони ўлдиргани учун умрбод қамоқ жазосига ҳукм қилинган.
Журналист Овсянникова яна судланди
Россиянинг Украинадаги босқинига қарши жонли эфирда норозилик билдирган Россия давлат телевидениесининг собиқ журналисти Марина Овсянникова яна судга тортилди. Бу сафар журналист ҳарбийларни обрўсизлантиргани учун 40 минг рубль (650 доллар) жаримага тортилди.
Овсянникова Facebook’да пости сабаб ҳарбийларга қарши баёнотлар бериш моддаси билан айбланган.
"Ҳаммаси бемаъниликнинг ўзи. Биз суд қарорини уч соат кутдик, охир-оқибат, улар энг олий даражадаги қандайдир қарор қабул қилди. Судья шошганча келиб, "Овсянникова айбдор деб топилди ва у 40 000 рубль жарима тортилди, дея кетди", дкди Овсянникова.
Бундан авал Овсянникова Украинадаги урушни “даҳшатли жиноят” деб атаганидан сўнг ҳарбийларни обрўсизлантириш айблови билан 50 минг рубль (860 доллар) жаримага тортилган. Март ойида эса журналистга жонли эфирда урушга қарши плакат кўтаргани учун 30 минг рубль (270 доллар) жарима солинган эди.
Украина ғалласини ортиб йўлга чиққан кемалар сони ўнтага етди
Туркия ва Украина томонининг айтишича, 8 август, душанба куни маккажўхори ва соя ташувчи яна иккита кема Украина портларини тарк этди. Шу билан ўтган ҳафта Украина ғалласи экспортини тўсиб қўймаслик бўйича Россия билан тузилган келишув доирасида биринчи кема йўлга чиққанидан буён уларнинг сони ўнтага етди.
Ўтган ой Россиянинг Украинага бостириб кириши оқибатида ғалла етказиб бериш тўхтаб қолиши жиддий озиқ-овқат танқислигига ва ҳатто дунёнинг айрим мамлакатларида очарчилик авж олишига олиб келиши мумкинлиги ҳақида огоҳлантирувлар янграганидан кейин Бирлашган Миллатлар Ташкилоти ва Туркия воситачилигида келишувга эришилди.
Туркия мудофаа вазирлиги маълумотларига кўра, 1 август куни биринчи сузиб кетганидан бери Украинадан 243 минг тоннага яқин маккажўхори еттита кемада экспорт қилинган.
Қолган кемаларда 11 минг тонна соя, 6 минг тонна кунгабоқар ёғи ва 45 минг тонна кунгабоқар шроти ташилди.
Пермь ўзбеклари “Амир Темур” батальони тузмоқчи
Пермдаги ўзбеклар “Амир Темур” номидаги батальон ташкил қилиб, Украинага қарши урушмоқчи. Vetta телеканали эълон қилган видеода “Пермь ўлкаси ўзбекларининг Марказий Осиё жамияти” етакчиси Жаҳонгир Жалолов шундай таклифни илгари сурган:
“Фарзандларимиз болалар боғчаларига боришяпти, мактаб ва университетларда таълим олишмоқда. Биз Россияда яшаяпмиз, ишлаяпмиз. Еган нонимизни оқлашимиз керак, оқлашимиз шарт. Шу боис кўнгиллилардан батальон тузишни ва унга буюк Амир Темур номини беришни таклиф қиламан”.
Жалолов минбардан туриб, ҳамюртларини ушбу ташаббусни қўллаб-қувватлашга ва батальонга қўшилишга чақирган.
Залда ўтирган ўнлаб киши Жалолов таклифини қарсаклар билан олқишлайди.
Амир Темур батальони тузиш ҳақидаги видео тарқалганидан ярим кун ўтиб, Ўзбекистон Ташқи меҳнат миграцияси агентлиги Перьмдаги ўзбекларни огоҳликка чақирди.
Агентлик Ўзбекистон фуқароларидан бундай даъватларга эргашмасликни, зиддиятли ҳудудларга бормасликни ва ҳарбий ҳаракатларда иштирок этмасликни сўрайди.
Агентлик бундай ҳаракат Ўзбекистон Жиноят кодексининг 154 -моддаси билан малакаланиб, беш йилгача қамоқ жазоси кўзда тутилганини эслатган.
Форум