Зеленский: Харков ва Донбассда вазият оғир
Украина президенти Владимир Зеленский кеча агар Россия босиб олган ҳудудларда Россияга қўшилиш бўйича референдум ўтказишни давом эттирса, Россия билан Украина ёки унинг халқаро иттифоқчилари ўртасида ҳеч қандай музокара бўлмаслигини айтди.
Россия кучлари ва айирмачилар “махсус ҳарбий операция” бошланганидан сўнг Украина шарқидаги Донбасс ва жанубий ҳудудларда катта ерларни эгаллаб олди. Ҳар икки ҳудуд расмийлари референдум ўтказиш ташаббусини илгари сурмоқда.
Донбассдаги россияпарастлар 2014 йилда ҳудуднинг бир қисмини эгаллаб олиб, референдум ўтказган ҳамда Луганск ва Донетск вилоятларида “халқ республикалари”ни эълон қилган эди. Кремль феврал ойидаги босқин арафасида мазкур республикаларни тан олди.
Бир неча ҳафта давомида деярли бутунлай Россия назорати остида бўлган Луганск вилояти губернатори Россия янги босиб олинган ҳудудларда референдум ўтказишга тайёргарлик кўраётгани ва иштирок учун аҳолига имтиёзлар таклиф қилинаётганини маълум қилди.
Зеленский ўзининг тунги видеомурожаатида Киев Россияга ҳеч бир ҳудудини бермаслик позициясида содиқлигини билдирди. "Мамлакатимизнинг позицияси ҳар доимгидек ўзгармасдан қолади. Биз ўз ҳудудимиздан воз кечмаймиз", деди Зеленский. У Донбассдаги оғир вазиятга тўхтатлди.
"Донбассдаги вазият жуда оғирлигича қолмоқда. Бизнинг армиямиз рус террорини тўхтатиш ва босқинчиларга имкон қадар катта талофат етказиш учун қўлидан келган барча ишни қилмоқда. Донецк вилоятидаги Авдийивка, Пиский, Марйинка, Бахмут ва бошқа уруш ўчоқлари аҳолиси зарбага дучор бўлмоқда. Вазият душман ўз кучларини жамлашга уринаётгани Харков вилоятида ҳамда мамлакатимиз жанубида ҳам оғир”, деди Зеленский.
Уруш шароитида Украина томони бераётган бу маълумотларни мустақил манбалар орқали тасдиқлашнинг имкони йўқ.
Февраль ойида Россия кучлари Украинага бостириб кирганидан сўнг, Россия ва Украина расмийлари бир неча музокаралар ўтказди. Аммо айтарли муваффақиятга эришилмади. Март ойининг охиридан бери эса икки томон ўртасида ҳеч қандай учрашувлар ўтказилмади. Ҳар икки томон бунда бир-бирини айблаган.
Россия кучлари Украина жанубидаги Херсон вилоятининг катта қисмини назорат қилмоқда. Расмийлар Россияга қўшилиш бўйича референдум яқин ҳафталар ёки ойлар ичида ўтказилиши мумкинлигини тахмин қилган.
БМТ: Атом станциясига ҳар қандай ҳужум – ўз жонига қасд қилишдир
Бирлашган Миллатлар Ташкилоти Бош котиби Антониу Гутерриш, Японияда бир неча ўн йил ўтиб ядровий қарама-қаршилик хавфи яна пайдо бўлганини айтиб, ядро қуролига эга давлатларни ядро қуролидан биринчи бўлиб фойдаланмаслик мажбуриятини олишга чақирди.
БМТ бош котиби Токиода 6 август куни Хиросимага атом бомбаси ташланганининг 77 йиллигига бағишланган тинчлик ёдгорлик маросимида қатнашганидан икки кун ўтиб матбуот анжумани ўтказди.
Россиянинг Украинадаги Запорожье АЕСга ҳужуми ҳақидаги хабарларга тўхталар экан, “Атом станциясига ҳар қандай ҳужум “ўз жонига қасд қилиш билан баробар”, деди Гутерриш.
Гутерриш Халқаро атом энергияси агентли (МАГАТЕ) ҳодисани ўрганиши учун АЕСга киритилиши кераклигини қўшимча қилди.
Гутерриш, шунингдек, Корея ярим оролининг "тўлиқ" ва "қайтмас" денуклеризациясини ядровий қуроллар тарқалишини камайтиришнинг асосий мақсади сифатида таъкидлаб ўтиб, глобал қуролсизланиш "орқага" кетаётганини билдирди.
Запорожье атом электр станциясига ҳужум
Якшанба куни Украина ва Россия бир-бирини Украина жанубидаги Запорожье атом электр станциясига ҳужум қилганликда айблади.
Запорожье - Европадаги энг йирик атом энергетика комплексларидан бири бўлиб, Украина умумий электр энергиясининг чорак қисмини ишлаб чиқаради. У март ойидан бери Россия кучлари назоратида, сўнгги кунлардаги муҳокамалар марказида қолмоқда.
ТАСС ахборот агентлигининг хабар беришича, АЭС жойлашган Энергодар шаҳри маъмурияти тунги ҳужумларда Украина армиясини айблаган.
Хусусан, Кремль Ғарб давлатлари Киевни Запорожье атом электр станциясини ўққа тутишни тўхтатишга ундаши керак, деб талаб қилди.
"Украина Қуролли кучларининг АЭСни ўққа тутиши ўта хавфли. Агар тўхтатилмаса бу улкан ҳудуд, жумладан, Европа учун ҳалокатли оқибатлар олиб келиши мумкин. Биз Украина раҳбариятига нисбатан мутлақ таъсирга эга давлатлардан ўз таъсир кучидан фойдаланиб станцияни ўққа тутишни тўхтатишларини кутиб қоламиз”, деди Кремль матбуот котиби Дмитрий Песков.
Украина давлат атом энергияси оператори, Энергоатом Россия кучларини электр станциясини ўққа тутишда айблаб, шанба кунги ракета ҳужумлари станция омбори ёнидаги ҳудудга тушгани, у ерда 174 контейнерда фойдаланилган ядро ёқилғиси очиқ ҳавода сақланаётганини маълум қилди.
Энергоатомнинг таъкидлашича, айни дамда объектдаги радиация ҳолатини аниқ кузатишнинг имкони йўқ, чунки объект атрофидаги учта радиация мониторинги детекторига шикаст етган.
Россия: 45 минг тонна ўқ-дори сақланадиган омбор йўқ қилинди
Россия Мудофаа вазирлиги матбуот котиби Игор Конашенков Россия ҳарбий кучлари Украина жанубидаги Николаев вилоятида НАТО томонидан етказиб берилган 45 минг тонна ўқ-дори сақланадиган омборга ҳужум қилиб, уни йўқ қилди, деб баёнот берди.
Конашенковнинг сўзларига кўра, Россия армияси Донетскдаги бир қанча Украина нишонлари, жумладан, қўмондонлик пунктлари, артиллерия батальонлари ва омборхоналарга зарба берган.
Уруш шароитида Россия томони бераётган бу маълумотларни мустақил манбалар орқали тасдиқлашнинг имкони йўқ.
Форум