АҚШ ва Канада Россияга нисбатан санкцияларни кенгайтирди
АҚШ Россияга қарши санкцияларнинг навбатдаги пакетини қабул қилди. Унга кўплаб рус тадбиркорлари ва қатор ширкатлар, жумладан, Магнитогорск металлургия комбинати ва у билан афилланган тузилмалар, “Сколково” жамғармаси киритилди.
Санкция рўйхатига киритилган жисмоний шахслар орасида Магнитогорск металлургия комбинати раҳбари Виктор Рашников, миллиардер Андрей Гурьев (АҚШ Молия вазирлиги билдирувида у Путиннинг яқин сафдоши сифатида тилга олинган) ҳам бор. Бундан ташқари Алина Кабаева ҳам санкциялар рўйхатига киритилди. АҚШ молия вазирлиги Кабаева президент Владимир Путин билан яқин муносабатларга эгалигини ва Кремлга мойил “Миллий медиа гуруҳ”ни бошқаришини қайд этган. Аввароқ Канада, Британия ва Европа Иттифоқи ҳам Кабаевга санкция жорий қилган эди.
АҚШ Россия эгаллаб олган Украина ҳудудларида ташкил этилган оккупациявий ҳукумат вакиллари, жумладан, Херсон вилоят ҳокими Владимир Салдо, унинг ўринбосари Кирилл Стремоусов ва Мариупол ҳокими Константин Ивашенкога ҳам санкциялар жорий қилди.
Канада эса 2 август куни санкциялар рўйхатига киритилган Россия ҳарбий раҳбарияти ва мудофаа корхоналари бошлиқлари рўйхатини кенгайтирди. “Қора рўйхат”га қўшимча тарзда 43 жисмоний ва 17 юридик шахс киритилди.
Украина ғалласи юкланган илк кема Туркияга етиб келди
Россия уруш бошлаганидан бери Украина ғалласи юкланган илк кема Одесса бандаргоҳидан Истанбулга муваффақиятли етиб келди.
Расмий Анқаранинг билдиришича, Украина ғалласини экспорт қилиш бўйича Истанбулда июль ойида эришилган Туркия, Украина ва Россия ўртасидаги келишувга мувофиқ, кунига украин портларидан ғалла ортилган камида бир кема чиқарилади.
Сьерра-Леоне байроғи остида сузаётган Razoni кемаси 1 август куни Одесса бандаргоҳидан 26 минг тонна жўҳори юклаб, Ливанга йўл олган эди. У Истанбулга 2 август куни кечқурун етиб келди.
Украина инфратузилма вазирлиги Одесса портида яна 16 та кема жўнаш учун ўз навбатини кутаётгани ва йўлак хавфсизлигига тўла ишонч пайдо бўлмагунча ҳар куни фақат учта кема портдан чиқарилишини маълум қилди.
Йўлак хавфсизлиги тўлиқ таъминлангач, Украина дон экспортининг ойлик қувватини яқин 4-6 ой ичида уч миллион тоннага етказиш режаланган.
Украина қишлоқ хўжалиги идоралари томонидан эълон қилинган маълумотларга кўра, ўтган йили йиғиб олинган 20 миллион тоннадан ортиқ ғалла Украина портларида ётибди.
Россия фуқароларига ТOEFL имтиҳонида иштирок этиш тақиқланди
Инглиз тили бўйича халқаро TOEFL имтиҳони ташкилотчиси бўлган ETS ташкилоти Россия фуқароларига тестда иштирок этишни ва шу кунгача олинган тайёр тест натижаларини олий ўқув юртларига жўнатишни тақиқлади.
ETSнинг билдиришича, тақиқ АҚШ Молия вазирлиги Шимолий Корея ва Россия фуқароларига TOEFL имтиҳонида иштирок этишни чеклашни талаб қилгани ортидан жорий этилди.
10 март куни ETS ва IELTS Россия ҳамда Беларусда тест ўтказишни тўхтатган эди. Шундан сўнг бу давлат фуқаролари хорижий давлатларда тест топширишга мажбур бўлганди.
Хориждаги университетларнинг кўпи абитуриентлардан инглиз тилини билиш даражасини аниқлаш учун TOEFL ва IELTS сертификатларини талаб қилади.
АҚШ Россияни террорни молияловчи давлат деб тан олса, Москва Вашингтон билан дипломатик алоқаларни узади
Агар АҚШ Россияни террорни молияловчи давлат деб тан олса, Москва Вашингтон билан дипломатик алоқаларини узиши мумкин, деб билдирди Россия ТИВ расмий вакили Мария Захарова.
АҚШ Конгресси июль охирида Кремлнинг Чеченистон, Грузия, Сурия ва Украинадаги ҳаракатлари “кўплаб бегуноҳ эркаклар, аёллар ва болалар ўлимига сабаб бўлган”ини таъкидлаб, Россияни террорни молиялаштирувчи давлат сифатида тан олиш чақириғи акс этган резолюцияни қабул қилганди.
АҚШ Конгресси бу масалани мустақил равишда ҳал эта олмайди. Бунинг учун Давлат департаменти Конгрессга таклиф киритиши керак.
Украина Олий Радаси ҳам АҚШ Конгрессига Россияни террони молиялаштирувчи давлат сифатида тан олиш илтимосини киритган.
АҚШ шу кунгача Сурия, Эрон, Куба ва Шимолий Кореяни террорни молиялаштирувчи давлат деб тан олган.
Форум