ISW: Оленивка қамоқхонасига ҳужумда жавобгарлик Россия зиммасига тушади
Ўзини ДХР республикаси деб атаётган айирмачилар Донецкдаги касалхонадан олинган тасвирларни тарқатди. Унда Оленивкадаги қамоқхонанинг ўққа тутилиши натижасида яраланган украиналиклар кўрсатилган.
Донецкдаги 16 сонли касалхона жарроҳи камоқхонадан келган асирларнинг барчасининг аҳволи оғирлигини айтади.
Уруш шароида кадрлар ва интервьюлар олинган сана, жой ва воқеаларни мустақил равишда аниқлаш имкони йўқ.
Россия ва Украина бир-бирини айирмачилар минтақасидаги қамоқхонани ўққа тутишда айблади. Бу ҳужум Мариуполдаги жанглардан сўнг асирга олинган ўнлаб украиналик маҳбусларнинг ўлимига сабаб бўлгани айтилмоқда.
Айни пайтда айрим нашрлар колонияга ҳеч қандай ракета ҳужуми бўлмагани, маҳбуслар сақланаётган бино ичкаридан портлатилгани ҳақидаги тахминларни илгари сурди
Кеча Қизил Хоч халқаро қўмитаси сепаратчилар ҳудудидаги колонияга киришга расман рухсат ололмаганини билдирди.
Американинг Урушни ўрганиш институти (ISW) маълумотига кўра, 53 нафар украин ҳарбий асирлари ўлимига олиб келган Оленивка қамоқхонасига йўлланган зарба учун жавобгарлик Россия қўшинлари зиммасига тушади. АҚШнинг исми сир қолишини истаган икки мулозими ушбу колонияга Украина Қуролли кучлари HIMARS воситасида зарба берганини тасдиқловчи ҳеч қандай далил-исбот йўқлигини айтган.
Украина ғалласи Истанбулга бугун эмас, эртага етиб боради
Уруш бошланганидан бери Украина донини олиб кетаётган илк юк кемаси кеча хабар қилинганидек, бугун эмас, балки эртага - 3 август куни Истанбулга етиб боради. Бу ҳақда маълум қилган Туркия Мудофаа вазирлигига кўра, Қора денгиз дон йўлаги келишувига кўра кема текширувдан ўтказилади, бироқ бунинг учун кема Истанбул портига кирмайди, балки денгиздаги боғланиш нуқтасида текширилади.
Текширув Россия, Украина, Бирлашган Миллатлар Ташкилоти ва Туркия вакилларидан ташкил топган Қўшма мувофиқлаштириш маркази гуруҳи томонидан олиб борилади.
БМТ Бош котиби Украина ғалласини олиб чиқиш бошланганини олқишлаб, буни кутилаётган очарчиликнинг олдини олишдаги муҳим қадам ўлароқ баҳолади.
Кремль матбуот котиби Дмитрий Песков ҳам Украина дони ортилган кеманинг жўнаб кетишини ижобий ҳолат деб атади ва Россия имзоланган барча келишувлар амалга ошишига умид қилишини таъкидлади.
Украина инфратузилма вазирлиги Одесса портида яна 16 та кема жўнаш учун ўз навбатини кутаётгани ва йўлак хавфсизлигига тўла ишонч пайдо бўлмагунча ҳар куни фақат учта кема портдан чиқарилишини маълум қилди.
Йўлак хавфсизлиги тўлиқ таъминлангач, Украина дон экспортининг ойлик қувватини яқин 4-6 ой ичида уч миллион тоннага етказиш режаланган.
Украина қишлоқ хўжалиги идоралари томонидан эълон қилинган маълумотларга кўра, ўтган йили йиғиб олинган 20 миллион тоннадан ортиқ ғалла Украина портларида ётибди.
АҚШ Украинага яна 550 миллион долларлик ёрдам беряпти
АҚШнинг Миллий хавфсизлик кенгаши сўзчиси Жон Кирбининг маълум қилишича, Украинага хавфсизлик бўйича 550 миллион долларлик янги траншни президент Жо Байден расман маъқуллаган.
"Бугун ҲИМАРС деб аталадиган илғор, тезкор ракета тизимлари учун кўпроқ ўқ-дорилар берилиши маълум қилинди, шунингдек, Украинага аллақачон етказиб берилган ва фойдаланилаётган 155 мм артиллерия тизимлари учун ўқ-дорилар борлигидан хабардорлигингизни биламан. Бу Байден маъмурияти президент Байден лавозимига киришганидан бери 17-марта хавфсизлик ёрдами пакетига рухсат беришидир. Февраль ойи охирида босқин бошланганидан бери Украинага 8 миллиард доллардан кўпроқ моддий ва хавфсизлик ёрдами берилган", деди Миллий хавфсизлик кенгаши матбуот котиби Жон Кирби.
БМТ: Урушда 5,3 мингдан ортиқ тинч аҳоли ҳалок бўлди
БМТнинг Инсон ҳууқлари бўйича олий комиссари бошқармаси маълум қилишича, уруш бошланганидан бери Украинада 5327 нафар тинч аҳоли нобуд бўлган, яна 7 мингдан ортиқ киши жабрланган.
Ҳаммаси бўлиб 2056 нафар эркак, 1400 аёл, 156 нафар ўғил бола ва 146 нафар қиз бола қурбон бўлган, айни чода 41 бола ва 1519 нафар катта ёшли кишиларнинг жинси ҳозирча аниқланган эмас.
7257 нафар ярадордан 221 нафарини ўғил ва 155 нафарини қиз болалар ташкил қилади.
Форум