“Энергоатом”: экспертлар Запорожье АЭСнинг кризис марказига киритилмади
Украинанинг “Энергоатом” ташкилоти АЭХА гуруҳининг Запорожье АЭСга сафари қандай ўтгани ҳақида маълумот берди:
Энергоблокларнинг машина залларида ростдан ҳам ҳарбий юк машиналари турибди. Аввалроқ бу машиналар акс этган видеолар ҳақиқийлигини Reuters ва BBC тасдиқлаган эди. Оккупация “маъмурияти” экспертларга уларни кимёвий ҳимоя қўшинларига қарашли техникалар сифатида тақдим этмоқда.
Россия томони делегация ишига монелик қилмасликка ваъда берганига қарамай, экспертлар Запорожье АЭСнинг кризис марказига киритилмаган. “Энергоатом”нинг маълум қилишича, у ерда халқаро вакилларининг кўзидан пана қилинган ҳарбийлар бўлган. Бунинг устига, станция ишига фақат оператив персонал жалб қилинган.
АЭХА делегацияси келган куни Энергодарда мобил алоқа ва интернет ўчирилган.
Запорожье вилоятининг босиб олинган қисмидаги “маъмурият” халқаро атом агентлиги экспертларининг кўзини бўяш учун “томоша” уюштиришгани айтилмоқда: ўзини маҳаллий аҳоли вакиллари, деб танитган бир неча киши экспертларга Украина армияси уларнинг уйларини бомбалаётганидан шикоят қилган.
Россия давлат агентликлари ёйинлаган видеода икки эркак агентлик раҳбари Рафаэл Гроссининг ёнига келиб, Украина ҳужумларини тўхтатишни сўраб 20 минг киши имзо чеккан хатни топширгани акс этган.
Уруш шароитида Россия ва Украина томонлари бераётган бир-бирига қарама-қарши бу маълумотларни мустақил манбалар орқали тасдиқлашнинг имкони йўқ.
Халқаро атом энергияси агентлиги экспертлари заводга етказилган зарарни, хавфсизлик тизимларининг ишлаши ва ходимларнинг ҳолатини баҳолайдилар. Гросси, миссия ўрганишлар бўйича ҳисобот берилишини айтди.
Украина қуролли кучлари қарши ҳужумни давом эттирмоқда
2 сентябрга ўтар кечаси Украина Қуролли кучлари босиб олинган Мелитополь шаҳридаги Россия армиясига оид икки манзилга зарба берган.
Бу ҳақда шаҳар мэри Иван Фёдоров маълум қилди. Унинг айтишича, украин ҳарбийлари аэродром яқинидаги ўқ-дори омборини йўқ қилганлар.
“Зарба шу қадар аниқ бўлдики, ўқ-дорилар портлаши бир неча соат давом этди”, деб ёзди у телеграмда.
Уруш шароитида томонлар бераётган бу маълумотларни мустақил равишда текшириш имкони бўлмаётир.
Россия: НАТО Финляндия ва Швецияда ҳарбий база очса, Россия шимоли-ғарбда ҳарбий салоҳиятини оширади
Россия ташқи ишлар вазири Сергей Лавров, агарда НАТО Финляндия ва Швецияда ҳарбий базаларини ташкил этса, Россия шимоли-ғарбдаги ҳарбий салоҳиятини оширишини айтди.
Москвадаги тадбирда Лавров, НАТО Финляндия ва Швеция ҳудудида ҳарбий базаларни жойлаштириш тўғрисида қарор қабул қилса, Россия ҳам шимоли-ғарбда ўз қуролли кучларини кучайтиради, деди.
Финляндия ЕИ аъзолари орасида Россия билан энг узун - 1300 км дан ортиқ чегарага эга давлат.
Россия-Украина можароси бошланганидан кейин Финляндия ва Швеция ҳам НАТОга аъзо бўлишга қарор қилиб, 18 май куни альянсга ариза топширди.
Икки мамлакат 5 июль куни Брюссельдаги НАТО бош қароргоҳида аъзоликка кириш протоколларини имзолади.
Россия бир неча бор НАТОнинг икки давлатда ҳарбий инфратузилмасини жойлаштирса, бунга муносиб жавоб беришини таъкидлаган.
Кремль Россия нефтига чекловни қўллаганлар мамлакатларга нефть экспорт қилмайди
Россия бош вазири ўринбосари Александр Новак, Кремль Россия нефтига чегараланган нарх сиёсатини қўллаб-қувватловчи мамлакатларга нефть экспорт қилмайди, дея таъкидлади.
Оқ Уй маълумотларига кўра, Катта еттилик молия вазирлари Россия нефтига чекланган нарх ўрнатиш имкониятини муҳокама қилишни режаламоқда.
Новакнинг айтишича, Россия қанча нефть ишлаб чиқариш ва сотиш имкониятига эга бўлса, шунча ишлаб чиқаради. Агар бозордаги талаб мустаҳкамланиб, вазият барқарорлашса, ишлаб чиқариш ҳам ортади, деди Новак.
“Россия нефть нархини чеклаш “мутлақо абсурд”. Муҳим бўлган нефть саноати бозорига бундай аралашув охир-оқибат энергия бозоридаги тартибсизликка олиб келади”, деди Новак.
Унинг таъкидлашича, агар нарх чегараси кучга кирса, асосий юк АҚШ ва Европадаги истеъмолчилар зиммасига тушди.
Россия-Украина можароси бошланганидан бери АҚШ бошчилигидаги Ғарб давлатлари Россияга бир неча босқичли санкциялар жорий қилди. Бу эса жаҳон бўйлаб инфляцияни келтириб чиқарди.
Форум