ОАВ: Петербургда уйсизлар урушга ёлланмоқда
Петербургнинг Фрунзе тумани маъмурияти ходимлари “Ночлежка” ётоқхонасига келиб, у ерда тунайдиган уйсиз дайдиларга ҳарбий хизматга ёлланиш учун шартнома таклиф қилишди. Бу ҳақда хайрия ташкилоти матбуот хизмати “Бумага” нашри журналистларига маълум қилган.
Хабарда айтилишича, мулозимлар ётоқхонага 17 август куни келишган. Улар ташкилот қарамоғидаги уйсизлар билан гаплашиб, уларга шартнома бўйича хизматга доир маълумотлар ёзилган варақаларни беришга уринганлар. Бироқ ётоқхона навбатчиси бунга йўл қўймаган ва мулозимларга аввало ташкилот раҳбарияти билан сўзлашишни таклиф қилган.
Аввалроқ Россия қамоқхоналарида маҳкумлар Украинага қарши урушга жўнатиш учун ёлланаётгани хабар қилинган эди. Гувоҳларга кўра, бу ишга Путинга яқинлиги билан танилган тадбиркор Евгений Пригожин раҳбарлик қилмоқда.
Хусусан, у Иваново вилоятидаги учта қамоқхонага шахсан боргани ва жами 650 маҳкумни урушга боришга кўндиргани ҳақида маълумотлар бор.
Пригожин урушга боришга рози бўлган маҳкумларга ярим йилдан сўнг озод бўлишларини ваъда қилган, шунингдек ҳарбий ҳаракатлар чоғида украинлар билан хоҳлаган ишларини қилишлари мумкинлигини, бунинг учун ҳеч қандай жавобгарлик йўқлигини айтган.
Петербурглик тадбиркор ва “Вагнер” хусусий ҳарбий ширкатнинг асосчиси экани айтиладиган Евгений Пригожиннинг президент Владимир Путинга яқинлиги ҳам тилга олинади.
Бомбапаноҳларда болалар ўқийди
Босқин пайтида катта зарар кўрган ва Россия назоратига ўтган Буча шаҳридаги болалар мактабга қайтишмоқда. Николаевдаги болалар эса бомбардимон қилинган мактабдан дарсликларни уйга олиб кетишмоқда.
Бу ўқув йили бошида Украинадаги аксарият таълим муассасалари хавфсизлик туфайли ёпиқлигича қолмоқда. Бу украиналик болалар биринчи синфга қадам қўйди. Бир неча ой олдин уларнинг мактаби бомбардимондан бошпана бўлиб хизмат қилган. Маҳаллий аҳоли бу ерда рус ҳарбийларидан яширинган. Уруш давом этар экан, мактаб ҳам бошпана ҳам ўқув даргоҳи сифатида очилди.
Ота-оналар “Биз ўз қўрқувимизни болаларимизга кўрсатишга ҳаққимиз йўқ. Мен бомбардимондан бошпана жойини кўрдим, у ер яхши ҳолатда. Умид қиламанки, болаларга у ер керак бўлмайди. Болаларимиз ўқиб ўрганишлари ва тенгдошлари орасида бўлишлари керак", дея таъкидлади.
Россия ишғоли бошланганидан бери 2300 га яқин мактаб ўққа тутилди ва бомбардимон қилинди. Булар орасида Николаевдаги мактаб ҳам бор.
“Мен мактабга бориб, синфдошларим ва ўқитувчиларимни кўрмоқчиман”, дейди бешинчи синф ўқувчиси Арина Корчкова.
Арина каби минтақадаги болаларнинг 95 фоизи мактабдан китобларни олиб кетиб уйда ўқишади. Мактаб директори ўринбосари Виктория Полякова "мактабимиз жуда чиройли ва озода эди. Жуда кўп болалар бўлар ва улар бизнинг мактабда ўқишдан жуда хурсанд эдилар", дея хотирлайди.
Зеленский ва Патрон мактабга борди
Президент Владимир Зеленский биринчи сентябрь куни Ирпень шаҳридаги мактабга бориб, партага ўтирди.
Ушбу мактаб март ойида Украина қуролли кучларининг Россия армиясига қарши жангларида жиддий шикастланган эди. Бино янги ўқув йили бошлангунича тўлиқ тикланди.
“Билимлар куни”да президент мактабга машҳур ит Патрон ҳамроҳлигида келди.
БМТ маълумотларига кўра, Россия "махсус ҳарбий операция" деб атаган уруш давомида 350 дан ортиқ бола ҳалок бўлди, юзлаб болалар яраланди. Бироқ ҳақиқий рақамлар бундан анча кўп бўлиши мумкин.
ОАВ: «Вагнер» асосчиси Пригожин Ростовда мингга яқин маҳкумни Украина урушига ёллади
Президент Владимир Путинга яқин бўлган петербурглик тадбиркор ва “Вагнер” хусусий ҳарбий ширкатнинг асосчиси экани айтиладиган Евгений Пригожин Ростов вилоятининг иккита қамоқхонасида мингга яқин маҳкумни Украина урушига ёллади. Бу ҳақда Батайск шаҳридаги қамоқхонада сақланаётган маҳкумларга таянган ҳолда "Вот Так" нашри хабар берди.
Нашр манбаларининг айтишларича, Пригожин колонияга “Вагнер” раҳбарларидан бири Дмитрий Уткин билан биргаликда шахсий вертолётида учиб келган. Уларнинг ташрифи арафасида 15-сонли колония маъмурияти барча ходимларнинг видеорегистраторларини ўчириб қўйган. Шундан кейин маҳкумлар қамоқхона ҳовлисига саф тортишган.
Пригожин маҳкумлар олдида нутқ сўзлаб, Украина урушида иштирок этишга рози бўлганлар олти ойдан сўнг жазо муддатини ўташдан озод этилишиларини айтган ва “украиналикларга нисбатан хоҳлаган ҳаракатни қилишингиз мумкин, бунинг учун сизларга ҳеч нарса бўлмайди” деб ваъда берган. У, шунингдек, қочишга уринганлар отиб ташланишини таъкидлаган.
Нашрнинг ёзишича, 15-сонлик колониядаги минг нафар маҳкумдан 700 нафари “Вагнер”га ёлланган. Бошқа бир колониядаги мингга яқин маҳкумнинг 300 нафари ҳам жангариликка ёлланган.
Форум