Украинада Россия танкчиси 8,5 йилга қамалди
Украина суди Россиянинг 35- махсус мотоўқчи гвардия бригадасининг танк командирини уруш қоидаларини бузишда айбдор деб топди ва 8,5 йилга қамади.
Ҳозирча исми ошкор этилмаётган зобит, прокуратура материалларида қайд этилишича, 24 февраль куни Украина ҳудудига Беларусдан бостириб кирган. Март ойи бошида у Халаявин қишлоғида тинч аҳоли вакилига қурол билан таҳдид қилиб, унинг мулкига эгадор бўлган. Орадан бир неча кун ўтиб зобит асирга олинган.
Бундан аввал май ойида Киев суди тинч аҳоли вакилини ўлдирганликда айбланган Россия армияси сержанти Вадим Шишмаринни умрбод қамоқ жазосига ҳукм қилган эди. Апелляция суди унга белгиланган жазони юмшатиб, 15 йилга озодликдан маҳрум қилган.
Август ойида украин суди Россия танкчиси Михаил Куликовга 10 йиллик қамоқ жазоси белгилади. У Чернигов шаҳрида тинч аҳоли яшайдиган уйга снаряд отганликда айбланган.
Украина россиялик миллиардер Евтушенковнинг активларини мусодара қилди
Украина ҳукумати "Система" акционерлик молия корпорацияси асосчиси бўлган россиялик миллиардер Владимир Евтушенковнинг активларини мусодара қилди.
Мусодара қилинган мулк умумий майдони юз минг квадрат метр бўлган 17 та кўчмас мулк ва миллиардернинг бир нечта украин фирмаларидаги улушларидан иборат. Украина суди Россия фуқаросининг мулкини мусодара қилиш тўғрисида илк маротаба ажрим чиқарди.
Украина Антикоррупция Олий судининг билдиришича, бундай қарор Адлия вазирлиги талаби билан қабул қилинган. Украинанинг “Санкциялар тўғрисида”ги қонунида “Россиянинг жанговар ҳаракатларига сезиларли даражада кўмак кўрсатганлар”нинг мулкини мусодара қилиш мумкинлиги белгиланган. Суд жараёнида Владимир Евтушенков Россия армияси учун учувчисиз бошқариладиган самолётлар ишлаб чиқарувчи бир нечта ширкатнинг эгаси экани тасдиқланган.
РБКнинг хабар беришича, Украина ҳукумати россиялик миллиардерлар Олег Дерипаска, Михаил Фридман, Алексей Миллер ва Аркадий Ротенбергларнинг мулкларини ҳам мусодара қилиш чораларини кўрмоқда.
“Катта еттилик” Кремлнинг нефть даромадларини чеклашни муҳокама қилади
Дунёнинг энг ривожланган етти мамлакати (G7) молия вазирлари 2 сентябрь куни АҚШ маъмуриятининг Россия нефти нархларини чеклаш таклифини муҳокама қилиш учун тўпланади.
“Бизнингча, Путиннинг даромадларини қирқишнинг энг самарали йўли шу. Айни чоғда бу жаҳондаги энергия манбалари нархи тушишига ҳам олиб келади”, деди Оқ уй матбуот котиби Карин Жан-Пьер.
G7 молия вазирлари Россия нефтининг энг юқори нархини белгилаш, шунингдек Россия нефти ташилишига тўсиқ қўйиш имкониятларини муҳокама қилишади. Ушбу масала “Еттилик гуруҳи”нинг июнь ойида Германияда бўлиб ўтган саммитида ҳам кўтарилган эди.
Baykar ширкати товушдан тез учар зарбдор дронининг иккинчи прототипини намойиш этди
Bayraktar Kizilelma (“Қизил олма”) oзиучар аппарат реактив двигатель ҳамда илғор сунъий идрок тизими билан жиҳозланган. У ҳавога кўтарилиши учун йўлак узун бўлиши шарт эмас, шу боис дрон енгил авиаташувчи саҳнидан парвоз қила олади.
Kizilelma, жумладан, Baykar ширкати Украинада қуришни режалаётган заводда ҳам ишлаб чиқарилиши мумкин. Дроннинг илк парвози 2023 йилга белгиланган.
Айни пайтда, Эрон Украина урушида қўллаш учун Россияга ҳарбий дронларининг илк партиясини жўнатди, деб ёзди Washington Post АҚШ махсус хизматларидаги манбаларига таяниб. Бироқ, маълумотларга кўра, Россия ҳарбийлари дронлар сифатидан норози. Москва бу хабарни “сафсата” деб атади.
АҚШ разведкасига кўра, жанговар дронлар юкланган биринчи транспорт учоғи 19 августда Эрондан Россияга жўнатилган. Улар орасида радарлар, артиллерия ва бошқа ҳарбий нишонларга зарба бера оладиган Mohajer-6 ва Shahed русумли ўзиучар аппаратлар борлиги айтилмоқда.
“Улар бир пайтлар Эрон ҳудудига бутун ҳолда ёки парчаланиб тушган АҚШ ўзиучар аппаратларининг кўчирма нусхаларидир. Эронийлар ана шу бўлаклар асосида бир неча русумдаги ўз дронларини яратишга муваффақ бўлганлар, улардан айримлари бир неча юз чақиримгача масофага зарба бериши мумкин. Аммо, барибир улар АҚШнинг оригинал дронларидан ва Исроилнинг шу турга мансуб ўзиучар аппаратларига нисбатан жуда қолоқ”, дейди ҳарбий эксперт Сергей Мигдаль.
Форум