Зеленский Хотира кунини таъсис қилди
29 август куни Украина президенти Владимир Зеленский янги таъсис қилинган Хотира куни Украинанинг Россия билан урушдаги йўқотишларини эслатиб туришини айтди.
«Хотира куни 2014 йилдаги фожиали воқеаларни барчага эслатиш учун ёзнинг охирига, 29 августга белгиланди. Ҳаммага 2014 йилдаги фожиали воқеаларни эслатиб туриш учун. Иловайскни эслатиб туриш учун. Қримимиз оккупацияси билан бошланган ушбу уруш, Донбассни эгаллаш уринишлари айнан ўша ерда якунланиши керак. Озод қилинган Қримда, Донбаснинг озод қилинган шаҳарларида, бизнинг қўшинларимиз Украинанинг давлат чегарасига етиб бориши билан якунланиши керак».
Зеленский навбатдаги тунги нутқини сўзлар экан, Украина қўшинлари Россия армиясини «чегарагача» таъқиб қилишини таъкидлади. Душанба куни президентнинг тўнғич маслаҳатчиси Украина қўшинлари Херсон шаҳри яқинидаги фронт чизиғининг бир неча жойида Россия мудофаасини ёриб ўтганини айтганди.
Москва Украина янги ҳужум бошлаганини тан олди, бироқ у муваффақиятсизликка учраганини, украин ҳарбийлари катта талофат кўрганини иддао қилди.
Бу орада Россия жанубдаги Николаев порт шаҳрини ўққа тутди. Шаҳар ҳокимининг айтишича, ҳужумда тинч аҳоли яшайдиган уйлар вайрон бўлган, камида икки киши ҳалок бўлган.
Россия февраль ойида бошлаган урушда сўнгги бир неча ҳафтадан бери силжиш бўлмай, икки томон асосан бир-бирига ердан ва ҳаводан ракета отаётганди.
Урушнинг дастлабки босқичида Россия Украинанинг Қора денгиз соҳиллари яқинидаги жанубий қисмларини, жумладан Херсон, шаҳрини қўлга киритган.
Украина жанубий қўмондонлиги матбуот котиби Наталия Хуменюкнинг айтишича, мамлакат қўшинлари жанубда бир неча ҳудудда, жумладан, Россия томонидан аннексия қилинган Қрим яримороли шимолида жойлашган Херсон вилоятида ҳужум ҳаракатларини бошлаган.
Украина Ғарб томонидан тақдим этилган мураккаб қуроллардан фойдаланган ҳолда, Россия ўқ-дори омборлари ҳамда таъминот линияларига зарба бермоқда.
Запорожье АЭСи жойлашган Энергодар шаҳрида бомбардимон оқибатида уч киши ҳалок бўлди
ТАСС агентлигининг билдиришича, бомбардимон оқибатида иккита болалар боғчаси ҳам ёниб кетди. Бундан ташқари шаҳарнинг икки мавзесида олтита портлаш юз берди.
Нашрларнинг Россия томонидан тайинланган шаҳар мэри Александр Волгага таяниб хабар беришларича, Энергодар шаҳрига Украина десантчилари бўлинмаси туширилган.
Қирғиз ҳуқуқ фаоли Бишкек кўчаларига чизиб кетилган Z ва V ёзувларини ўчирди
Ҳуқуқ фаоли Ўндуруш Тўқтўнасиров Бишкек кўчаларига номаълум шахслар томонидан чизиб кетилган Z ва V ёзувларини ўчириб чиқди. У 31 август - Мустақиллик куни арафасида Бишкек кўчаларига Россиянинг Украинага босқини рамзига айланган бу харфларни чизиб кетганларни қоралади.
Z ва V харфлари Украинага бостириб кирган рус ҳарбий техникасига чизилган эди. Кремль пропагандистлари бу харфларни “махсус амалиётнинг рамзлари” деб атайди.
Бунгача Бишкек милицияси ўз автомашиналарига Z харфини ёпиштирган ҳайдовчиларга жарима солган ва ёзувни олиб ташлашга мажбурлаган эди.
"Газпром" газ қувурини вақтинчалик ёпди
Россиянинг "Газпром" компанияси чоршанба куни эрта тонгда Россиядан Европага ўтадиган асосий табиий газ қувури орқали табиий газ етказиб беришни тўхтатди. Шу ой бошида Россия давлат энергетика ширкати “Шимолий оқим 1” газ қувури орқали газ етказиб беришни шанба кунига қадар тўхтатиб қўйишини маълум қилганди ва буни компрессор станциясида режали техник хизмат кўрсатиш учун уч кунлик танаффус билан изоҳлаганди.
Газпром маълумотларига кўра, Портовая компрессор станциясида жойлашган ягона турбинани таъмирлаш керак.
Германиянинг Федерал тармоқ агентлиги раҳбари Клаус Мюллер таъмирлаш ишлари техник жиҳатдан тушунарсиз ва у бу ҳаракатларни Германияни Россия босқинидан кейин Украинага ён босгани учун жазолаш усули деб билишини айтди.
"Газпром" "Шимолий оқим 1" орқали газ оқимини бир неча бор қисқартирган, буни техник муаммоларни, масалан, ускуналарни таъмирлаш билан тушунтирганди. Германия бу қисқартиришларни Украинадаги уруш шароитида ноаниқлик ва нархларни ошириш учун сиёсий қадам деб атамоқда.
Россия урушда Украина томонида бўлган бошқа Европа давлатларига ҳам газ етказиб беришни қисқартирди.
Сўнгги пайтларда Германиянинг газ етказиб беришнинг учдан бир қисми Россия ҳиссасига тўғри келади.
Ўтган ҳафта ҳукумат газ оқимининг камайиши Германиянинг Россия таъминотига таянмаслигини тасдиқлаб, газни сақлаш талабларини ошириши ва захираларни тежаш учун қўшимча чоралар кўришини эълон қилди.
Форум