Россия ТИВ консуллиги паспорт учун ҳужжат олишни тўхтатди
Россия ТИВ консуллик департаменти биометрик маълумотларга эга чет элга чиқиш паспортларини бериш учун ҳужжатлар қабул қилишни вақтинча тўхтатди.
“Электрон ахборот ташувчи ўрнатилган паспортларларни бериш учун аризалар қабул қилиш техник сабабларга кўра 2022 йил 26 августдан вақтинча тўхтатилади”, дейилади департамент сайтидаги хабарномада.
Ушбу хабарнома Россиянинг Латвия, Германия ҳамда Туркиядаги элчихоналари сайтларида ҳам эълон қилинди. Хориждаги Россия фуқаролари беш йил муддатга бериладиган паспорт олишлари мумкин, унда биометрик маълумотлар киритилган микросхема йўқ.
Россиянинг Туркиядаги дипмиссияси сайтида “электрон ахборот ташувчили паспортларни тайёрлаш билан боғлиқ муаммо ҳал этилгунга қадар” беш йиллик оддий паспорт берилиши маълум қилинган.
Расмий қайдларга кўра, Россия Украинага қарши уруш бошлаган 24 февраль санасидан то 22 августга қадар қарийб бир миллион нафар россиялик Европа Иттифоқига жўнаб кетган.
Айни пайтда, Евроиттифоқ мамлакатлари россияликларга виза беришни тақиқлашда якдил бўлиши қийин. Бу ҳақда ЕИ бош дипломати Жозеп Боррель Австриянинг ORF телеканалига интервьюсида айтди.
“Россиянинг фуқаровий аҳолиси билан алоқаларни узишдан наф бўлишига кўзим етмайди, қолаверса, ушбу ғоя бир овоздан қўллаб-қувватланади деб ҳам ўйламайман”, дея ундан иқтибос келтиради Reuters.
Эртага – 31 август куни ЕИга аъзо давлатлар ташқи ишлар вазирлари Прагада йиғилишиб, россияликларга сайёҳлик визалари беришни тақиқлаш масаласини муҳокама қиладилар.
Аввалроқ Financial Times нашри ташқи ишлар вазирларининг аксарияти мўътадил чорани танлашни, яъни Россия ва Беларусь фуқаролари учун соддалаштирилган тартибда шенген визаари беришни бекор қилиш ниятида эканини хабар қилган эди.
Ушбу қарор қабул қилинган тақдирда россияликлар ва белоруслар ҳозирги 35 доллар ўрнига 80 доллар виза йиғими тўлашга ва ҳужжатлар кўриб чиқилишини узоқроқ кутишга мажбур бўлишади.
ФСБ: Дугинага суиқасдни уюштирганнинг шериги топилди
Россия Федерал хавфсизлик хизмати - ФСБси Кремлга яқин миллатчи файласуф Александр Дугиннинг қизи – Дарья Дугинага суиқасдни уюштиришда, гўёки Наталья Вовк билан бирга иштирок этган “украин қўпорувчи-террорчи гуруҳи” аъзосининг шахсини аниқлаганини эълон қилди.
Бу ҳақда ФСБ Жамоатчилик билан алоқалар марказига таяниб, ТАСС хабар қилмоқда.
ФСБ маълумотига кўра, Вовкка1978 йилда туғилган Богдан Петрович Циганенко исмли шахс ёрдамлашган.
У қизга Қозоғистон фуқароси Юлия Зайко номига олинган ҳужжатлар ҳамда автомобиль рақамларини топиб бергани иддао қилинмоқда. Яна айтилишича, Вовк унинг кўмагида Москванинг жануби-ғарбидаги гаражда қўлбола бомба тайёрлаган.
Шунингдек, ФСБ, ўз даъвосича, Циганенконинг қотилликни уюштиришга қаратилган хатти-ҳаракатлари ёзилган видеони ҳам эълон қилди.
“Видеокузатув камераларини ўрганиш чоғида жиноят ижрочиси бўлмиш Украина фуқароси Наталья Вовк “Традиция” фестивали меҳмонларининг машиналари турган автотураргоҳда Дугинани шахсан кузатгани ҳужжатлар билан тасдиқланди”, дейилади ФСБ хабарномасида.
Дарья Дугина 20 август куни Одинцово шаҳар округида, Большие Вяземи посёлкаси ҳудудида автомобили портлаб кетиши натижасида ҳалок бўлган эди.
Воқеадан бир неча кун ўтиб ФСБ қотиллик Украина махсус хизматлари томонидан тайёрланганини иддао қилиб чиқди. 23 июль куни Россияга қизи билан бирга келган Украина фуқароси Наталья Вовк жиноят ижрочиси ўлароқ тилга олинди. Украина ҳукумати Дарья Дугина ўлимига алоқадорлигини рад этмоқда.
Зеленский: Босқинчилар таназзул ва ўлимни олиб келишди
Украина президенти Владимир Зеленский ўзининг тунги видеомурожаатида Донбасс Россия зарбалари натижасида деярли буткул вайрон бўлганини айтаркан, Россия учун одамлар ҳаётининг қадри бир пулга қиммат, дея таъкидлади.
Шунингдек, Зеленский мудофаа ва хавфсизлик соҳаси вакиллари билан учрашув ўтказгани, бироқ учрашув тафсилотларини ошкор эта олмаслигини айтди:
"Донецк доимо Украинанинг энг бой ва мустаҳкам шаҳарларидан бири бўлиб келган. У ерда кончилик энг ҳурматли касблардан бири эди. Ҳозир Донбасс Россия зарбалари натижасида деярли вайрон бўлди. Мағрур ва улуғвор Донецк шаҳри Россия босқинчилари томонидан эгалланиб, таҳқирланди, талон-торож қилинди. Россия у ерга олиб кирган энг даҳшатли нарса – инсон ҳаётига буткул беписандлик, ҳурматсизлик. Босқинчилар таназзул ва ўлимни олиб келишди. Ва Бу нарсалар абадий қолишига ишонишади. Лекин ундай бўлмайди, бу вақтинчалик".
Якшанба куни Россия артиллерияси Запорожье атом электр станциясига яқин Украина шаҳарларини ўққа тутди. Бу ҳақида маҳаллий расмийлар хабар қилган. Бу хабарлардан сўнг, аҳолининг радиация ҳалокати юз беришидан хавотирлари янада ортди.
Запорожье вилоят губернатори Олександр Старух, Украина телевидениесига берган интервьюсида аҳолига радиация сизган тақдирда йод қоришмасидан фойдаланиш ўргатилаётганини айтди.
Сўнгги жанг ҳаракатлари:
Айни пайтда, Россия Мудофаа вазирлиги мамлакат армияси Украинанинг бир қатор мудофаа саноати жойлашган обьектларига зарба берганини даъво қилган бўлса, Украина ҳарбийлари Харков ва бошқа йўналишларда рус кучларини чекинишга мажбур қилганини маълум қилди.
Россия Мудофаа вазирлиги матбуот котиби Игор Конашенковнинг маълум қилишича, Россия ҳарбий ҳаво кучлари Украина ҳарбий вертолётлари таъмирланаётган Запорожье шаҳридаги Мадасик компанияси базасига юқори аниқликдаги ракеталар билан зарба берган.
Россия кучлари Днепропетровскдаги Украина армиясига ёнилғи етказиб берувчи нефть омборига зарба берган. Шу жумладан Россия ҳарбийлари Славянскдаги Украина армиясига захира хизматчиларни тайёрлаш марказини ҳам юқори аниқликдаги қуроллар билан нишонга олган.
Украина қуролли кучлари Бош штаби Украина армияси рус қўшинларини Харьков, Славянск ва Авдиивка йўналишида чекинишга мажбур қилгани ҳамда душман Харьков ва Авдиивка йўналишларида йўқотишларга учрагани ҳақида маълум қилди.
Шунингдек, Украина армияси Россиянинг Бахмут йўналишидаги бир неча ҳужумларини ҳам қайтарган. Уруш шароитида томонларнинг бу даъволарини мустақил манбалар орқали тасдиқлаш имконсиз бўлиб қолмоқда.
Пентагон манбаларига кўра, АҚШ Мудофаа вазирлиги қурол-яроғ ва ўқ-дори етказиб беришни кенгайтириш орқали Украинага кўпроқ ҳарбий ёрдам кўрсатишга киришган. Германия ташқи ишлар вазири Анналена Бербок, якшанба куни берган интервьюсида Германия Украинага молиявий ва ҳарбий ёрдам беришда давом этишини билдирди.
Германия Украинага ҳарбий техника етказиб берувчи давлатлар орасида тўртинчи ўринни эгалламоқда. Хабарларга кўра, Берлин Украинага ҳозирга қадар тахминан 1,7 миллиард АҚШ долларга тенг ҳарбий ёрдам кўрсатган.
Форум