ЕИ Россия фуқароларига енгиллаштирилган тарзда виза бериш режимини бекор қилади
ЕИ ташқи ишлар вазирлари Россия фуқароларига енгиллаштирилган тарзда шенген визаларини бериш режимини бекор қилишга келишади. Financial Times нашрининг бу борадаги музокараларда иштирок этаётган манбаларга таяниб хабар беришича, россияликларга виза тўлови нархи ҳам ҳозирга 35 евродан 80 еврога кўтарилади. Бундан ташқари, виза сўровларини кўриб чиқиш жараёни ҳам узайтирилади.
Хабарда айтилишича, мазкур қарор қабул қилиниши кутилаётган норасмий учрашув Прагада 30-31 август кунлари ўтказилади. Унда Болтиқ давлатларининг Россия фуқароларига виза беришни бутунлай тўхтатиш масаласи муҳокама қилиниши лозим эди. Бироқ бу таклиф Ғарбий Европа ва Еврокомиссия томонидан қўллаб-қувватланмаган.
Bloomberg агентлигининг хабар беришича, Чехия томонидан киритилган таклиф, яъни Россия фуқароларига шенген визаларини енгиллаштирилган тартибда бериш режимини бекор қилиш муроса сифатида қабул қилинган.
Dell Technologies Россия бозорини тўлақонли равишда тарк этди
Американинг Dell Technologies IT-корпорацияси август ойи ўрталаридан бошлаб Россия бозоридаги барча операцияларни тўлиқ тўхтатди, деб хабар берди Reuters.
Февраль охирларида Dell Россия ва Беларусдаги, Украинанинг Донецк ва Луганск вилоятларидаги савдоларни ва хизмат кўрсатишни тўхтатган эди. Бундан аввал корпорация Россия босиб олган Қримда ҳам мана шундай чекловларни ўрнатганди.
Dell Technologies жаҳондаги йирик компьютер ишлаб чиқарувчи ва етказиб берувчи ширкат ҳисобланади. Ширкат Россия бозорининг 20 фоизига эгалик қилган ва бу мамлакатга серверлар етказиб берувчилар орасида биринчи ўринни эгаллаган.
Россия Украинага бостириб кирганидан бери 1200 ширкат рус бозорини тарк этди.
Халқаро атом энергияси агентлиги Запорожье АЭСига бориш учун экспертлар гуруҳини тўплади
Халқаро атом энергияси агентлиги – ХАЭА кейинги ҳафтада Запорожье АЭСига бориш учун экспертлар гуруҳи тўпланганини маълум қилди, деб ёзди The New York Times.
Экпертлар гуруҳини ХАЭА бош директори Рафаэл Гросси ва асосан “бетараф мамлакатлар” вакилларидан иборат 13 киши ташкил этди. Бундан ташқари гуруҳ таркибига Украина ўзига дўст деб биладиган Польша ва Литва, шунингдек, Россия билан иноқ бўлган Сербия ва Хитой вакиллари ҳам киртилган. The New York Times гуруҳга АҚШ ва Британия вакиллари киритилмаганини билдирди.
Европадаги энг йирик Запорожье АЭСини Россия март ойида босиб олган. Шундан бери Киева ва Москва бир-бирини АЭС ҳудудини бомбардимон қилаётганликда айблаб келади.
Запорожьеда оккупацион маъмурият тайинлаган “полиция бошлиғи” осилган ҳолда топилди
Запорожье вилоятининг Россия томонидан босиб олинган қисмидаги Михайловка шаҳрида оккупацион маъмурият тайинлаган “полиция бошлиғи” Андрей Рижков осилган ҳолда топилди, деб хабар берди “Укринформ” вилоят ҳарбий маъмуриятига таянган ҳолда. Ҳозирча полиция бошлиғи ўз жонига қасд қилгани ёки қасддан ўлдирилгани маълум эмас.
Рижков Украина чегара қўшинида хизмат ўтаган. Истеъфога чиққанидан сўнг «Михайловка чегарачилари» жамоат ташклотига асос солган. Украин матбуотининг билдиришича, у оккупацион маъмуриятга ўзини полиция раҳбари лавозимига тайинлашни таклиф қилган.
24 август куни Михайловканинг Россия томонидан тайинланган ҳокими Иван Сушко автомобил портлаши оқибатида ҳалок бўлган.
12 августда Мелитополда оккупацион ҳукумат вакилларидан бирига суиқасд уюштирилган. Портлаш оқибатида Олег Шостак жароҳатланган.
26 августда Бердянскда давлат автомобил назорати бўлими бошлиғининг ўринбосари Александр Колесниковнинг автомашинаси портлатилган. Колесников оғир жароҳатлар туфайли, касалхонага олиб кетилаётганида жон берган.
Форум