Бомбапанадаги спектакль - Николаев театри олти ойлик узилишдан сўнг саҳнага қайтди
Украина жанубидаги шиддатли бомбардимон қилинаётган Николаев шаҳрида театр актёрлари олти ойлик узилишдан сўнг яна саҳнага қайтди.
Улар ер ости бомбапанасида ташкил этилган кичик саҳнада илк спектаклни намойиш қилди.
Олти ойлик урушдан сўнг украиналик актёрлар ғалаба билан саҳнага қайтишди.
Николаев бадиий драма театри спектаклининг очилиш кечаси учун бир неча ўнлаб томошабин ер ости бомбапанасига тушишди.
Аммо труппанинг барча аъзолари у ерда эмас эди.
“Албатта, кўплаб спектакллар бекор қилинди, чунки баъзи эркак актёрлар жанг қилиш учун кетишди, баъзилари вақтинчалик қочқин сифатида чет элда. Шундай қилиб, бизнинг театр жамоамиз икки баравар кичрайиб кетди”, - дейди театр актрисаси Виолета Мамикина.
Гуруҳнинг одатий жойи 450 ўринли безакли зал эди. Николаев рус кучлари томонидан бир неча бор нишонга олинганидан кейин у ёпилди.
“Театримиз 24 февралда Россиянинг кенг кўламли босқинидан сўнг дарҳол украин тилига ўтди. Бу жараён секинроқ кечиши керак эди. Бизнинг репертуаримизнинг бир қисми аллақачон украин тилида бўлган, аммо баъзи спектакллар ҳали ҳам рус тилида эди. Биз ҳамма нарсани аста-секин таржима қилдик. Аммо 24 февралдан кейин ҳаммамиз украин тилига ўтдик”, дейди театр актрисаси Виолета Мамикина.
Театр менежери Артем Свистун спектаклни "арт терапия" деб таърифлади ва шаҳарда қолган кўплаб маҳаллий аҳоли учун кичкина театр қанчалик муҳимлигини айтади.
Россия улкан ҳажмдаги газни исроф қилмоқда
Россия Европа Иттифоқи давлатларига газ етказиб беришни кескин қисқартирган бир пайтда Финляндия чегараси яқинидаги Ленинград вилояти ҳудудида улкан ҳажмдаги табиий газ исроф қилинаётгани ўртага чиқди.
Норвегияда жойлашган Rystad энергетика бўйича консалтинг ширкати таҳлилчилари буни экологик фалокат деб таърифладилар.
Атмосферага ёқиб юборилаётган газ миқдори Европа Иттифоқининг кунлик эҳтиёжининг тахминан ярим фоизига тенг эканлиги тахмин қилинмоқда.
Улкан олов Болтиқ денгизи остидан Германияга ўтадиган "Шимолий оқим 1" газ қувурининг компрессор станцияси жойлашган ҳудудда сунъий йўлдош суратларида кўриш мумкин.
Россия “Шимолий оқим 1” орқали газ узатиш қувватини 20 фоизигача қисқартирди ва турбиналарга техник хизмат кўрсатиш билан боғлиқ муаммолар сабаб уни келаси ҳафтада уч кунга бутунлай тўхтатишни режалаштирмоқда.
Европа Иттифоқи Россияни газдан Украина бўйича Ғарб санксияларига қарши курашда қурол сифатида фойдаланганликда айблайди.
Оловни ёқиш нефть ва газ қазиб олишда кенг тарқалган амалиётдир, аммо ҳозирги даража жуда юқори.
Россия энергетика гиганти “Газпром” изоҳ сўровига жавоб бермади.
Rystad таҳлилчиларига кўра, "ёқилаётган газ ҳажмини аниқлаш қийин, аммо тахминларга кўра кунига 4, 34 миллион куб метрни ташкил қилади. Бу йиллик ҳисобда 1, 6 миллиард куб метрга тўғри келади ва Европанинг газга бўлган талабининг тахминан ярим фоизига тенг".
Россия атмосферага зарарли газ чиқариш бўйича дунёда тўртинчи ўринни эгаллайди. Президент Владимир Путин ўз давлати 2060 йилдан кечиктирмай углероддан холис бўлишга интилишини айтган, Европа Иттифоқи ва бошқа давлатлар Москвани бу мақсадни кечиктирмасликка ундамоқда.
“Газпром” йил бошидан август ойи ўрталаригача табиий газ қазиб чиқариш ҳажмини 13 фоиздан кўпроққа қисқартириб, 275 миллиард куб метрга етказишини билдирган.
Унинг собиқ Совет Иттифоқидан ташқарига газ экспорти Украина бўйича Ғарб билан қарама-қаршилик фонида 36 фоизга қисқариб, 78, 5 миллиард кубометрга етди.
Аксарият маҳаллий экспертлар “Газпром” ишлаб чиқаришни тартибга солиш учун шунчаки кранларни ўчириб қўйиши мумкинлигини айтишган бўлса-да, компания ҳали ҳам ортиқча газни ёқишга мажбур.
Зеленский: Запорож атом станцияси жуда хавфли бўлиб қолмоқда
Украинадаги Россия томонидан босиб олинган Запорож атом станциясидаги вазият жуда хавфли бўлиб қолмоқда.
Гарчи жума куни объектнинг иккита ишлайдиган ядро реактори қайта уланган бўлса ҳам, вазият таҳликали, деди Украина президенти Владимир Зеленский.
Жума оқшомидаги нутқида у Атом энергияси бўйича халқаро агентликка имкон қадар тезроқ заводга ташриф буюришга рухсат бериш талабини яна бир бор таъкидлади.
"Россиянинг реакторлар узилишига олиб келадиган ҳар қандай ҳаракатлари станцияни яна хавф ёқасига олиб келади", - деди Украина президенти Владимир Зеленский.
Зеленский ўз чиқишида Туркия ва Бирлашган Миллатлар Ташкилоти воситачилигида тузилган дон битими шартларига кўра, Украина Қора денгиз портларидан бир миллион тонна қишлоқ хўжалиги маҳсулотларини экспорт қилганини ҳам маълум қилди.
Чаплинога ҳужум ҳарбий жиноят сифатида малакаланиши мумкин
24 август куни йигирмадан ортиқ одамнинг ҳаётига зомин бўлган Украинанинг Чаплино темир йўл вокзалига қилинган Россия ҳужуми ҳарбий жиноят сифатида таснифланиши мумкин.
Бу ҳақда Associated Press халқаро экспертларга таяниб берди.
Россия Мудофаа вазирлиги пайшанба куни Днепропетровск вилоятидаги Чаплино станциясига “Искандар” ракетаси “тўғридан-тўғри урилгани” ортидан у ердаги “Украина Қуролли Кучлари резервидаги 200 дан ортиқ ҳарбий хизматчи” ва 10 та ҳарбий хизматчини нишонга олганини айтиб чиқди.
Чаплинога борган Associated Press журналистининг айтишича, ҳалок бўлганлар орасида украиналик ҳарбийлар бўлганини кўрсатадиган далиллар йўқ, аксинча ҳалок бўлганлар орасида аёллар ва болалар бор.
Ҳозрга қадар Чаплинога ҳужумда камида 25 одам ҳалок бўлгани, олти яшар бола машинада тириклай ёниб кетгани, 11 ёшли яна бир бола эса харобалар тагида қолиб, ўлгани хабар қилинган. Уч бола дохил ўттиз чоғли ярадор оғир аҳволда касалхонага ётқизилган.
Днепропетровск вилоят кенгаши раҳбари Николай Лукашук Россия ракета ҳужуми оқибатида Донецк вилоятининг Покровск шаҳридан эвакуация қилинганларни олиб кетаётган поезднинг беш вагони ёниб кетганини айтган. Ҳалок бўлганлар орасида бир оила, жумладан, 17 ёшли қиз ҳам бўлганини билдирган.
Associated Press агентлигига кўра, ҳалок бўлганлар орасида ҳарбий хизматчиларнинг бир қисми бўлган тақдирда ҳам, зарба тинч аҳолига номутаносиб зарар етказса, уруш жинояти ҳисобланиши мумкин. Вандербилт университети ҳуқуқ факултети профессори Майкл Ньютоннинг тушунтиришича, кўп сонли тинч аҳоли қурбонлари бўлган ҳарбий хизматчиларнинг кичик гуруҳига зарба бериш уруш жинояти сифатида баҳоланиши мумкин.
Форум