«Вагонларда ўтирган йўловчилар гўёки қопқонда қолган»
Днепропетровск вилоятидаги Чаплино темирйўл бекатига 25 август куни берилган зарба оқибатида қурбон бўлганлар сони эса 25 кишига етди.
Россия Мудофаа вазирлиги бекат ўққа тутилганини тан олди, бироқ нишон УҚК захира аскарлари ва ҳарбий техника бўлганини иддао қилмоқда.
25 қурбондан икки нафари болалар: олти яшар бола машинада тириклай ёниб кетган, 11 ёшли яна бир бола эса харобалар тагида қолиб, ўлган. Уч бола дохил ўттиз чоғли ярадор оғир аҳволда касалхонага ётқизилган.
Фожиадан сўнг Чаплино шаҳарчасида бўлган Украинанинг 5-канали мухбири Виктория Ковалёва ҳикоя қилади:
– Посёлкада даҳшатли манзара устидан чиқдик: бир неча кўчада ўнлаб уйлар вайрон бўлган. Одамлар харобалар устида куймаланиб, омон қолган буюмларини излашмоқда. Россия бекатни айни поезд жўнашга ҳозирланаётган маҳалда ўққа тутган. Вагонларда ўтирган йўловчилар гўёки қопқонда қолганлар. Шу боис ҳам қурбонлар, ярадорлар жуда кўп. Ҳарбийлар Россия армияси ялпи ўт очиш тизими ва “Искандер” ракета комплексидан зарба йўллаганини айтишмоқда.
Путиннинг фармони яқин кунларда рус армияси қудратини таъминлай олмайди
АҚШдаги Урушни ўрганиш интститути – ISW ҳисоботида қайд этилишича, Россия президенти Владимир Путиннинг Қуролли кучлар таркибини 137 минг киишига кўпайтириш тўғрисидаги қарори яқин кунлар ичида сезиларли ҳарбий қудратни таъминлай олмайди.
Иккинчидан, Қуролли кучлар таркиби кўпайиши ортидан жиддий муаммо пайдо бўлади. Чунки уларни машқлантирувчи мутахассислар етишмайди. Институтнинг билдиришича, Россия машқтирувчилардан иборат бўлинмаларни ҳам Украина уришига жўнатган ва улар жиддий талафот кўрган.
25 август куни Владимир Путин 2023 йилнинг 1 январидан Қуролли кучлар таркибидаги ҳарбийлар сонини 137 минг нафарга оширишга оид фармонни имзолаган эди. Фармонга асосан Россия армияси таркиби ҳозирги 1 миллион 13 минг 628 нафар кишидан 1 миллион 150 минг 628 нафарга етказилади.
Ҳужжатда айни пайтда Қуролли кучлар штат бирлиги 1 миллион 902 минг 758 та экани, кейинги йил бошидан эса 2 миллион 40 мингта бўлиши қайд этилган.
Европа Иттифоқидан бошпана сўраган руслар сони кўпайди
Россия Украинага бостириб кирган 24 февралдан то 22 августгача Европа Иттифоқига 998 мингдан кўпроқ россиялик кўчиб ўтди. Бу ҳақда ERR Европа Иттифоқининг ташқи чегаралар хавфсизлиги бўйича Frontex агентлигига таянган ҳолда хабар берди. Маълум қилинишича, Россиядан Европага қочганларнинг 329 минг 185 нафари Финландия орқали, 281 минг 957 нафари Эстония орқали кириб келган.
Аввалроқ Deutsche Welle ( “Немис тўлқини”) радиоси Миграция ва қочқинлар бўйича федерал агентликка таянган ҳолда 2022 йил январидан то шу кунгача Германияга бошпана сўраб мурожаат қилаётган россияликлар сони 1098 кишига етгани тўғрисида билдирган эди. Уларнинг фақат 11,2 фоизига қочқин мақоми берилган.
Бошпана сўраганларнинг 830 нафари Германияга Россия Украинага бостириб кирганидан сўнг келган. Июль ойида қочқинлик мақоми сўраган россияликлар сони энг юқори даражага етган. Июлда бошпана сўраган россияликлар сони 192 кишини ташкил қилди.
Киевда Россия ва Совет Иттифоқига алоқадор 95 та кўча номи ўзгартирилди
Киев мэри Виталий Кличко Telegram каналида пойтахтда Россия ва Совет Иттифоқига алоқадор 95 та кўча номи ўзгартирилгани тўғрисида маълум қилди. Жумладан, маршал Малиновский кўчаси «Азов полки қаҳрамонлари», Питер кўчаси Лондон, Карл Маркс кўчаси Гуцл деб ўзгартирилди.
Июль ойида Украинада руслаштириш орқали тоталитаризм шаклланишига қарши Мадания вазирлиги қошида махсус комиссия ташкил қилинган эди. Авгсут ойи бошларида комиссия Россия ва СССРга алоқадор топонимларни ўзгартириш тўғрисида таклиф киритган.
Форум