Украина президенти Зеленский Россияни «террорчи давлат» деб тан олишга чорлади
22 август куни Украина президенти Россияни террорчи давлат сифатида тан олиш чақириғини такрорлади.
Зеленский навбатдаги тунги нутқини сўзлар экан, Россияни террорчи давлат сифатида қонуний белгилаб олиш ташаббусини илгари сураётганларга миннатдорчилик билдирди.
«Россияга қарши саккизинчи санкциялар пакети муҳим эканлигини унутмаган барча европалик сиёсатчилардан миннатдорман. Санкциялар пакетлари орасидаги оралиқ қанчалик узоқ бўлса, Россиянинг сурбетлиги шунчалик кучаяди. Объектив воқеликни тан олиш ва Россияни ҳуқуқий жиҳатдан террорчи давлат деб белгилаш зарурлигини тарғиб қилаётган барча дўстларимизга, эркинлик бўйича жаҳон бўйлаб барча ҳамфикрларимизга миннатдорчилик билдираман».
Москва ўз босқинини Украинани қуролсизлантириш ва у ердаги русийзабон жамоаларни ҳимоя қилиш операцияси деб атайди. Украина ва унинг иттифоқчилари эса Россияни босқинчилик урушини олиб бораётганликда айбламоқда.
Душанба куни БМТ урушда бугунга қадар 5 500 нафар тинч аҳоли вакили ҳалок бўлганини маълум қилди.
Киев Россия ҳужуми хавфи кучайганини айтиб, жорий ҳафтада совет ҳокимиятидан мустақилликни нишонлаш учун оммавий байрамларни тақиқлади.
Зеленский ижобий янгиликларни ҳам улашди – президент Украина ва Молдовани боғлаб турадиган темир йўл таъмирланиб, қайта ишга тушганини айтди.
Зеленскийнинг айтишича, ушбу темир йўл йилига ўртача 10 миллион тонна юк ташиш имконини беради.
Германия ва Канада: Украина ва иқлим бўйича мақсадимиз бир
Россиянинг Украинага босқини Канада ва Германияни бир-бирига яқинлаштирмоқда. Икки мамлакат қазиб олинадиган ёқилғидан воз кечиш йўлида чора кўрар экан, Канада Германияга энергия ва муҳим минераллар экспортини оширишга бел боғлаган. Бу ҳақда 22 август куни бу икки мамлакат раҳбарлари маълум қилишди.
Душанба куни эрталаб Германия канцлери Олаф Шольц Канада бош вазири Жастин Трюдо билан учрашди. Шольцга Германия компаниялари раҳбарларидан иборат делегация ҳамроҳ бўлди.
Германия келаётган қишда санкцияларга жавобан Россия табиий газ экспортини янада қисқартиришдан хавотирда.
«Дунё Россияга қарши жазо чораларини, йирик иқтисодиётга нисбатан қўлланган энг қатъий санкцияларни жорий қилди. Бу ҳеч қаерда осон бўлгани йўқ, айниқса Европада, хусусан Германияда. Лекин, канцлер Шольц, катта босимлар ва энг қийин иқтисодий ва сиёсий вазиятларга қарамай, ўз раҳбариятингизнинг кучини қайта-қайта исботладингиз», – деди Трюдо.
Кун бошида Шольц Германия Россия таъминотига қарам бўлмаслик учун бошқа жойлардан газ сотиб олиши кераклигини, айни дамда мамлакат 2045 йилга бориб углерод чиқиндиларини нолга туширишни ўз олдига мақсад қилиб қўйганини айтди.
Канада эса 2050 йилга қадар углерод чиқиндиларидан воз кечмоқчи. Германия 2024 йил ўрталарида Россия газига бўлган эҳтиёжига барҳам бермоқчи.
Икки мамлакат 23 август Канададан Германияга водород ва муҳим минераллар экспортини тезлаштириш бўйича келишувларни эълон қилиши кутилмоқда.
Зеленский босиб олинган ҳудудларда Украина байроғини кўтаришга ваъда берди
23 август куни Украина президенти Владимир Зеленский мамлакатнинг Россия томонидан босиб олинган ҳудудларида Украина давлат байроғини кўтаришни ваъда қилди.
Зеленский Украинанинг пойтахт Киевда совет ҳокимиятидан мустақилликни нишонлашга қаратилган маросимида қатнашди.
«Бугун нафақат байроғимизнинг ўтмиши ҳақида, балки келажаги ҳақида ҳам гапирмоқчиман. Кўк-сариқ байроқ яна ўз уйида ҳилпирайди. Украинанинг барча вақтинча босиб олинган шаҳарларида, қишлоқларида. Вақтинчалик ишғол қилинган ҳудудларда абадий ҳилпирайди. Мелитополда – Ғалаба майдонида, мазкур урушда мағлуб бўлганларнинг байроғи бўлиши мумкин бўлмаган жойда. У ерда кўк-сариқ байроқ кўтарилади. Херсонда – Озодлик майдонида. Эркинлик нимани англатишини билмаганларнинг байроғи у ерда бўлиши мумкин эмас».
Президент нутқи ортидан Россия билан урушда ҳалок бўлганлар шарафига бир дақиқа сукут сақланди.
Сешанба куни Россия Запорожье вилоятида артиллерия ва ҳаво ҳужумларини амалга оширди. У ерда йирик АЭС жойлашган.
Киев Россия ҳужуми хавфи кучайганини айтиб, совет ҳокимиятидан мустақилликни нишонлаш учун оммавий байрамларни тақиқлади.
АҚШнинг Киевдаги элчихонаси ҳам ўз баёнотида Россиянинг яқин кунларда зарба бериш режалари ҳақида огоҳлантирди.
АҚШ ўз фуқароларини Украинани тарк этишга чорлади
23 август куни АҚШ ўз фуқароларини Украинани тарк этишга чақирди. АҚШнинг Киевдаги элчихонасига кўра, Россия яқин бир неча кун ичида фуқаролик ва ҳукумат инфратузилмасини нишонга олишга ҳозирлик кўрмоқда.
Аввалроқ Украина ҳукумати 24 август куни пойтахт Киевда совет ҳокимиятидан мустақиллик муносабати билан байрам тадбирларини ўтказишни ман қилган эди.
АҚШ элчихонаси сешанба куни эълон қилган баёнотда «Давлат департаменти Россия яқин кунларда Украинанинг фуқаролик инфратузилмаси ва давлат объектларига зарба бериш саъй-ҳаракатларини кучайтираётгани ҳақида маълумотга эга», дейилади.
Баёнотда АҚШ фуқаролари Украинани «зудлик билан» тарк этишлари керак, дейилади.
АҚШ биринчи марта бундай огоҳлантириш бераётган йўқ. Бу сафарги огоҳлантириш Украина Мустақиллиги куни арафасида эълон қилинди.
Ўтган ҳафтанинг шанба куни Москва яқинида автомашинага ўрнатилган портлашда таниқли россиялик миллатчи таҳлилчининг қизи Дарья Дугина нобуд бўлган эди. Москва қотилликда Украина агентларини айбламоқда. Киев эса бу айбловни рад этди.
Форум