Чоршанба куни Украина Совет иттифоқидан мустақил бўлганини нишонлайди
Президент Владимир Зеленский, бу санада Москвадан “исталган хунрезлик”ни кутишини айтиб, олдиндан ҳушёр бўлишга чақирди.
Шунингдек, Украина президенти Владимир Зеленский Россия тергов идоралари Мариуполда украин ҳарбий асирларини суд қилишга ҳозирланаётгани ҳақидаги хабарларга изоҳ берар экан, “бу Россияни музокаралардан узиб қўяди”, деди.
Аввалроқ тан олинмаган “ДХР” раҳбари Денис Пушилин “трибуналга тайёргарлик кўрилаётгани”ни ва “илк трибуналлардан бири Мариуполда бўлиши”ни айтган эди.
“Босқинчилар нимани ўйламасинлар, нимани режа қилмасинлар, давлатимизнинг муносабати мутлақо аниқ бўлади. Агар бу жирканч суд юз берса, бизнинг одамларимизни барча келишувларга, жамики халқаро қоидаларга зид ўлароқ ушбу театрга тортадиган, уларни масхара қиладиган бўлсалар, ундан сўнгра ҳар қандай музокара имконсиздир. Россия бу билан ўзини ўзи музокаралардан узиб қўяди”, деди Украина президенти Владимир Зеленский.
Аввалроқ Мариуполнинг Украина тайинлаган мэри Вадим Бойченко Россия ҳарбийлари 24 август – Украина Мустақиллиги кунида украин ҳарбий асирлари устидан суд ўтказиши мумкинлигини айтган эди.
Бойченко суд мажлиси бўлиб ўтадиган Мариуполь филармониясида украин асирлари учун қурилган темир қафас суратини эълон қилар экан, жаҳон ҳамжамияти, БМТ ва Қизил хочни “Мариуполда Еленовка фожиаси такрорланишига йўл қўймаслик учун” вазиятга аралашишга чақирди.
Россиянинг Украинага босқинига 6 ой тўлди
Россиянинг Украинага қарши бошлаган урушига 24 август, чоршанба куни олти ой тўлади. Президент Владимир Путин шу йилнинг 24 февралида, ўз наздида жиддий таҳдид, деб атаган хавфни бартараф этиш учун Украинага қарши “махсус ҳарбий операция” ўтказишга буйруқ берганди.
Путин бундан мақсад Россиянинг жанубий қўшнисини, ўз таъбирича, демилитаризация ва денацификация қилиш эканини иддао қилган:
"Бизни жанг майдонида мағлуб қилмоқчи эканликлари ҳақида эшитяпмиз. Нима ҳам дейман, бунга уриниб кўришсин. Ғарб биз билан Украинагача ҳам жанг қилмоқчи эканлигини кўп бора эшитганмиз. Бу Украина халқи учун фожиа. Лекин ҳамма билиши керакки, биз ҳеч нарсани ҳали жиддий тарзда бошламадик. Айни пайтда биз тинчлик музокараларини рад этмаймиз, лекин рад этаётганлар билиши керакки, ҳаммаси қанчалик узоққа чўзилса, биз билан шартнома тузиш улар учун шунча қийинроқ бўлади".
Россиянинг Украинага бостириб кириши Европада Иккинчи жаҳон урушидан кейинги энг катта инқирозга сабаб бўлди.
Россия босқини пайтидаги ўлим ва вайронагарчиликлар билан бир қаторда, Ғарбнинг Россияга санкциялари дон, ўсимлик ёғи, ўғит ва энергия нархини глобал ошишига олиб келди.
Бирлашган Миллатлар Ташкилоти Украинадаги уруш туфайли очарчилик хавфи юзага келиши ҳақида огоҳлантирди.
Россия озиқ-овқат инқирози учун жавобгарликни рад этиб, бунда Ғарб санкциялари ва Украина портларни миналаштирганини сабаб қилиб кўрсатмоқда.
ФСБ: Дугина ўлимини украин махсус хизматлари уюштирган
Россия Хавсизлик хизмати “Русский мир” ғоясининг тарғиботчиси Александр Дугиннинг қизи Дарья Дугина ўлимини украин махсус хизматлари уюштирган, деган баёнотни эълон қилди.
Россия томони иддаосича, гўёки суиқасдни Украинанинг Наталья Вовк исмли фуқароси содир этган ва жиноятдан сўнг Эстонияга ўтиб кетган.
"Вовк Россияга 2022 йилнинг 23 июлида қизи билан кириб келган”, деб даъво қилмоқда Россия федерал хавфсизлик хизмати.
Украина президенти офиси раҳбарининг маслаҳатчиси Михаил Подоляк эса, “Русский мир” мафкурачиси Дугиннинг қизи - Дарья Дугина машинасининг портлатилишига Киевнинг алоқаси йўқ, деб баёнот берди.
“Таъкидлаб айтаманки, Украинанинг бунга мутлақо дахли йўқ, чунки биз Россия Федерацияси сингари криминал давлат эмасмиз, террорчи давлат ҳам эмасмиз”, деди Подоляк.
Мулозим фикрича, мазкур қотиллик Россия ичида ҳокимият учун кураш ва турли гуруҳларнинг тўқнашуви мавжудлигидан далолат беради, Россия ҳукумати эса Украинага нафрат “пилигини кўтариш” ва ички сиёсий дискурсни радикаллаштириш мақсадида Россия жамиятига “мафкуравий ахборот босими”ни ошириш учун бундан фойдаланмоқчи.
Россиянинг пешқадам пропагандачилари, жумладан, Владимир Соловьёв ҳамда Маргарита Симоньян Дарья Дугина ўлимига муносабат билдираркан, Украинадан қасос олишни талаб қилишди.
бошқарувидаги Toyota Land Cruiser шанба оқшомида Москва вилоятида портлаган. Дугин ва унинг қизи ўша куни “Традиция” номли ватанпарварлик фестивалида иштирок этишганди.
Айрим тахминларга кўра, улар Москвага бирга қайтишлари керак бўлган ва номаълум қотиллар ГЎЁКИ аслида Путиннинг Укринадаги урушини фаол тарғиб қилиб келаётган файласуф ва мафкурачи Дугинни ўлдиришга қасд қилганлар.
РФ армиясида фундаментал муаммо
Американинг Урушни ўрганиш институти (ISW) маълумотига кўра, Россия кучлари аввалроқ Бахмут ва Авдеевка остонасида эришган ютуқларидан фойда чиқара олмагани РФ армиясида фундаментал муаммо – тактик ютуқларни оператив ютуқларга айлантиришга лаёқатсизлик мавжудлигини кўрсатади.
Россия қўшинлари Украина шарқида жуда имиллаб олдинга силжиётгани ва катта эҳтимол билан, яқин ойларда янги ҳудудларни ишғол эта олмаслиги шу билан изоҳланади. Мавжуд аҳволни фақат тасодифларгина ўзгартириши мумкин.
Шунингдек, институт Россия оккупацион маъмурияти 24 август – Украина Мустақиллиги куни арафасида фильтрлаш тадбирларини кучайтирганини ва босиб олинган ҳудудларда одамларни ўғирлаш авж олганини қайд этган.
Форум