Киевда оммавий тадбирлар ўтказиш тақиқланди
Киевда шаҳар ҳокимияти 22-25 август кунлари оммавий тадбирларни тақиқлади. 23 август куни Украинада Давлат байроғи куни, 24 август куни эса Мустақиллик куни нишонланади.
Расмийлар ўша куни шаҳарга ракета ҳужумлари уюштирилиши мумкинлигидан хавотирда.
Шу боис ҳар қандай оммавий йиғилишлар, митинглар ва тадбирлар тақиқланади.
Айни пайтда шаҳар маъмурияти Россия армиясининг яксон бўлган ҳарбий техникалари кўргазмасига тайёргарлик кўрмоқда.
БМТ раҳбари Одесса портига борди
Бирлашган Миллатлар Ташкилоти бош котиби Антониу Гутерриш Украинанинг Одесса портида дон кемасига чиқди.
БМТ раҳбари юк ташувчи кемасига чиқишдан олдин Одесса мэри Геннадий Труханов билан қўл бериб кўришди.
Кема буғдойни Туркияга олиб боради. Гутерришнинг айтишича, БМТ воситачилигида озиқ-овқат экспорти бўйича келишувдан сўнг Украина озиқ-овқат маҳсулотлари экспортини таъминлаш учун ҳали кўп иш қилиш керак бўлади.
Аввалроқ Украина ҳукумати мамлакатнинг учта портида аллақачон еттита кемага озиқ-овқат юклай бошлагани ҳақида хабар берган эди. Кемалар 65 минг тонна буғдой, маккажўхори ва ёғ олиб кетади.
Ўтган ой Истанбулда Қора денгиз портларини қамалдан чиқариш бўйича келишувга эришилган эди.
Россия ва Украина Туркия ва БМТ билан имзолаган ҳужжатда Истанбулда мувофиқлаштирувчи марказ ташкил этиш кўзда тутилган - унинг ёрдами билан Украина портларидан ғалла экспорти устидан назорат амалга оширилади.
Россия Запорожье АЭСи ҳудудига халқаро экспертлар миссияси юборилишига рози бўлган
Франция президенти Эммануэл Макроннинг идораси Россия президенти Владимир Путин Запорожье АЭСи ҳудудига халқаро экспертлар миссияси юборилишига рози бўлганини маълум қилди.
Украина президенти Владимир Зеленский Атом энергияси бўйича Халқаро агентлиги Запорожье атом станциясига жўнатган миссияси АЭС хавфсизлигини тиклаши мумкинлигини айтди.
Киев раҳбари Россияни “ядровий шантаж”да айблади.
“Газпром” жума куни Россия табиий газини Болтиқ денгизи остидан Германияга етказиб берувчи “Шимолий оқим 1” қувури август ойидан бошлаб тўхтатилишини маълум қилган эди.
Қувурнинг ёпилиши Европанинг газ таъминотида узилишларга олиб келади. Зеленский Европа давлатларини Россия газига қарамликни камайтиришга чақирди.
“Террорчи давлат Европа ва жаҳон энергетика бозорида қанча узоқ қолса, бу бозорда нобарқарорлик шунча узоқ давом этади. Европадаги ҳар бир киши ўз энергия тизимини Россия энергия манбаларисиз ҳам ишлашига қанча тез эришса улар ҳар қандай қишдан тезроқ омон қолишлари мумкин бўлади”.
Запорожье атом станцияси жойлашган ҳудуд тинимсиз ҳужумга тутилар экан бу ерда Чернобил типидаги ядровий фалокат хавфидан қўрқув кучайган.
Киев ва Москва Россия назоратидаги АЭСни ўққа тутганликда бир-бирини айбламоқда.
Украина Атом энергияси халқаро агентлиги эспертларининг АЭСга киритилишини талаб қилган.
Украинада уруш бошланганидан бери 363 бола ҳалок бўлди
Украина Бош прокуратурасининг 20 августдаги хулосасига кўра, Украинада уруш бошланганидан бери 363 нафар бола ҳалок бўлган, 718 нафардан ортиқ бола жароҳатланган.
Болаларнинг аксарияти Донецк, Харьков, Киев, Чернигов, Луганск, Николайев, Херсон ва Запорожье вилоятларида жабрланган.
Бу маълумотлар якуний эмас, жанговар ҳаракатлар давом этаётган кўплаб минтақаларда ва босиб олинган ҳудудларда ҳозир йўқотишларни ҳисоблаш имконсиз.
2328 дан ортиқ таълим муассасаси бомбардимон ва ўққа тутилиши натижасида зарар кўрган, улардан 289 таси бутунлай вайрон қилинган.
Форум