БМТ раҳбари Запорожье АЭСни демилитаризация қилишга чақирди
Европадаги энг йирик атом электр станцияси Россия ва Украина ўртасидаги зиддиятнинг кучайиш марказига айланар экан, Бирлашган Миллатлар Ташкилоти Бош котиби Антониу Гутерриш станцияни зудлик билан демилитаризация қилишга чақирди.
Гутерришнинг бу баёноти Львов Украина президенти Владимир Зеленский ва Туркия президенти Режаб Тойиб Эрдўғон билан учрашган пайтда айтилди.
Музокараларда Запорижье станциясидаги вазият биринчи ўринда турди. Украина томони Россия объектда "провокация" ни режалаштираётганини айтмоқда.
Россия иншоотни ёпиши мумкинлигини айтди. Киевнинг огоҳлантиришича, бу ҳаракат ядровий фалокат хавфини яна ҳам оширади.
Атом электр станциясини тўхтатиш мураккаб операция бўлиб, у ёқилғини қизиб кетишдан ва эришни келтириб чиқаришдан ҳимоя қилиш билан бирга ядровий занжир реакцияларини тўхтатишни талаб қилади.
Зеленский Россияни “ядровий шантажда” айблади. Москва АЭСни демилитаризация қилиш ғоясини рад этган.
Украина "энг аянчли сценарий"га тайёрланмоқда
Украина Запорожье Атом станциясида рўй бериши мумкин энг аянчли ядровий фалокатга тайёргарлик кўрмоқда.
Мамалакат фавқулодда хизматлари Запорожье вилоятида Европадаги энг катта атом станцияси жойлашган ҳудудда юзага келиши мумкин инқироз учун машқ ўтказмоқда.
Станция жойлашган ҳудуд кетма-кет ҳужумга тутилиши ортидан Чернобилдан ҳам ёмон ядровий фалокат рўй бериши хавфини ўртага чиқарди.
“Албатта, биз хавотирдамиз, бу аниқ. Биз вазиятни кузатяпмиз. Россия армияси 5 августдан бошлаб ўққа тута бошлаганини кўряпмиз. Вазият ҳалокат ёқасига келяпти. Биз бундан жуда хавотирдамиз. Шунинг учун биз бу ердамиз, шунинг учун биз бу гуруҳни ташкил қилдик”, - деди Украина Энергетика вазири Ҳерман Халушенко.
Айни пайтда Қўшма Штатлар, Европа Иттифоқи, Бирлашган Миллатлар Ташкилоти Запорожье атом станциясидаги вазиятдан жиддий хавотирга тушган.
Россия қўшинлари Запорожье атом электр станциясини март ойи бошида, Украинага бостириб кириш бошланганидан кўп ўтмай ишғол қилган.
“Россия армияси атом электр станцияси ва унга қўшни бўлган барча ҳудудлардан чиқиб кетиши, станциядан ҳарбий техникасини ҳам олиб чиқиши керак. Бу ҳеч қандай шартларсиз ва имкон қадар тезроқ қилиниши керак. Украина Атом энергияси бўйича халқаро агентлик томонидан тегишли назорат таъминланиши тарафдори ва Запорожье станциясига қонуний миссия юборилиши зарур”, - деди Украина президенти Владимир Зеленский.
Россия учоқларини Қримдан кўчирмоқда
Украина разведкаси маълумотига кўра, босиб олинган Қримдаги Россия ҳарбий объектлари, хусусан Саки аэродромида яқинда юз берган портлашлардан сўнг Россия қўмондонлиги учоқ ва вертолётларни яриморол ичкарисига, шунингдек Россиянинг ўз ҳудудидаги базаларга кўчиришни бошлаган.
Разведка камида 24 та учоқ ҳамда 14 та вертолёт бошқа базага ўтказилганини қайд этган. Улар фронтдан анча узоқда жойлашган Севастополь, Краснодар, Кушчевск аэродромларига йўллангани айтилмоқда.
Сўнгги кунларда Қримдаги қатор ҳарбийобъектларда портлашлар рўй берди. Россия қўмондонлиги айрим ҳолларда украин қўпорувчиларини айблаган бўлса, айрим портлашларни тасодифий омиллар билан изоҳлади.
БМТ бош котиби Зеленский ва Эрдўғон билан музокара қилиш учун Львовга келди
БМТ бош котиби Антониу Гутерриш 18 август, пайшанба куни Украина ва Туркия президентлари Владимир Зеленский ҳамда Ражаб Эрдўғон билан учрашади. Учрашувда Запорожье атом электр станцияси билан боғлиқ вазият ҳамда украин ҳарбий асирлари сақланган Еленовка қамоқхонасининг ўққа тутилиши бўйича тергов масалалари муҳокама қилиниши кўзда тутилган.
Гутерриш 19 август куни Одессада бўлади, эртасига эса “ғалла битими” доирасида ташкил қилинган Қўшма мувофиқлаштириш маркази фаолияти билан танишиш учун Истанбулга жўнаб кетади.
Форум