Украина Қуролли Кучлари: Украина кунига 700-800 маротаба ўққа тутилмоқда
Украина Қуролли кучлари бош қўмондони Валерий Залужнийнинг айтишича, Украина армиясининг бутун фронт чизиғи бўйлаб позициялари Россия қўшинлари томонидан кунига 700-800 марта ўққа тутилмоқда.
Шунга асосланиб, у Россия армияси кунига 60 минггача ўқ-дори сарфлайди, деган хулосага келди.
Россия томони, ўз навбатида, ҳар куни қанча ўқ-дорилар сарфлашини ҳеч қачон эълон қилмаган.
Юрий Шевчук урушга қарши чиққани учун жазоланди
Бошқирдистон пойтахти Уфа суди ДДТ гуруҳи раҳбари Юрий Шевчукни Россия армиясини обрўсизлантириш ҳақидаги маъмурий моддаси бўйича 50 минг рубл жаримага тортди. Бунга мусиқачининг май ойида Уфадаги концертида Ватан ва уруш ҳақидаги сўзлари сабаб бўлган.
Май ойи ўрталарида Шевчук Уфадаги концерт чоғида саҳнадан туриб “галдаги Қайсаримизнинг қанақадир наполеонча режалари учун Украинада қариялар, аёллар ва болалар нобуд бўлмоқда” деган ҳамда “Ватан доим ўпиб туриладиган президентнинг кети эмас”лигини таъкидлаган эди.
Шевчукнинг ўзи судда қатнашмади. Мусиқачининг адвокати бу ўринда мижози томонидан қонун бузилганига оид далил йўқлиги, полиция эса баённомани нотўғри тузганини айтган. Айблов томони эса Шевчук Россия президенти Владимир Путиннинг “махсус амалиёт” тўғрисидаги сўзларини шубҳа остига олиб, уларни “Наполеон режалари” деб атаган ва бу иш билан Россия армиясини обрўсизлантирган.
Шевчук ўзининг судга йўллаган мурожаатида исталган мамлакат ва исталган замондаги урушларнинг барчасига ҳар доим қарши бўлганини билдирган. У ўз хатида “Отма” қўшиғини ёзганини эслатган.
“"Отма” қўшиғи 1980 йилда ёзилган эди. Мен, шунингдек, Донбассда 8 йил давом этаётган уруш ва Украинада олиб борилаётган махсус ҳарбий амалиётга ҳам қаршиман!”, деб ёзди мусиқачи Юрий Шевчук.
Қримда яна портлаш бўлди
Россия ишғол қилган Қримнинг Жанкой туманида портлаш содир бўлди. “Криминформ” телеграм-канали хабарига кўра, маҳаллий аҳоли портлаш товушларини эшитган ва турли нуқталарда ҳавога ўрлаётган қора тутунни кўрган. Воқеа Жанкой яқинидаги Майкой қишлоғида содир бўлгани тахмин қилинмоқда.
Жабрланганлар ҳақида ҳозирча маълумот берилмади.
Россия расмийлари воқеа бўйича изоҳ беришгани йўқ. Бироқ “РИА Новости” кучишлатар тузилмалардаги манбаларига таяниб, Майкой қишлода трансформатор станцияси ёнаётганини хабар қилди. Агентликка кўра, воқеа жойига Қрим губернатори Сергей Аксёнов етиб борган:
“Жанкой туманининг Азов қишлоғидаман. Бугун эрталаб бу ерда, Мудофаа вазирлиги маълумотига кўра, ҳарбий қисмнинг вақтинчалик ўқ-дори сақлаш жойи ҳудудида ёнғин чиқди. Айни пайтда снарядлар портлаши давом этмоқда. Тинч аҳолидан икки киши жабрланган, уларнинг ҳаётига ҳеч қандай хавф йўқ. Аҳоли эвакуация қилиняпти, хавфсизликни таъминлаш мақсадида одамлар беш километр нарига олиб чиқиб кетилмоқда. ФВВ, Мудофаа вазирлиги, Росгвардия кучлари ҳамда қутқарув хизматлари сафарбар қилинган”.
Зеленский Россияга қарши янги санкциялар қўллашга чақирди
Украина президенти Владимир Зеленский Европадаги энг йирик Запорожье атом электр станциясидаги эҳтимолий фалокат хавфидан огоҳлантирар экан, Россияга қарши янги санкциялар қўллашга чақирди.
Ҳозирга қадар, Запорожье АЭС ҳудудини ўққа тутишда Украина ва Россия бир-бирини айблаб келмоқда. МАГАТЭ ташкилоти завод яқинида жанглар тўхтамаса, фалокат юз бериши мумкинлигидан огоҳлантирган.
Planet Labs ширкати томонидан эълон қилинган янги сунъий йўлдош тасвирларида Россия март ойида босиб олган завод яқинидаги отишма оқибатларини кўриш мумкин. Запорожьедаги россияпараст расмийлар ва Украина томони ҳужум масъулиятини бир-бирига юкламоқда.
Владимир Зеленский тунги видеомурожаатида Россия ядро секторига санкция қўллашга чақирди:
"Модомики, террорчи давлат халқаро ҳамжамиятнинг талабларини бутунлай менсимаётган экан, айниқса бундай нозик масалада, бу дарҳол чора кўриш зарурлигини англатади. Запорожье атом электр станциясида содир бўладиган ҳар қандай радиактив ҳалокат Европа Иттифоқи, Туркия, Грузия ва олис минтақалардаги давлатлар учун ҳақиқий фожиага айланиши мумкин. Ўшанда ҳаммаси биргина шамолнинг йўналиши ва кучи билан содир бўлади. Агар Россиянинг ҳаракатлари фалокатга олиб келса, оқибатлари ҳануз сукут сақлаётганларни ҳам четлаб ўтмайди”.
Форум