Ғалла ортилган Украина кемаси Истанбулга етиб борди
Истанбулда фаолият юритаётган Қўшма мувофиқлаштириш маркази маълумотларига кўра, БМТ воситачилигидаги келишув асосида Украина буғдойини олиб кетаётган биринчи кема 14 август куни Истанбулга етиб борган.
Белиз байроғи остида сузаётган «Сормовский» кемаси Россия босқинидан кейин Украинадан Қора денгиз орқали буғдой олиб ўтган биринчи кемадир. 3050 тонна буғдой ортилган кема жума куни Украинанинг Чорноморськ (русча Черноморск) портидан жўнаб кетган эди.
24 февралда Москва Украинага қарши «махсус операция»ни бошлашидан олдин Россия билан Украинага жаҳон буғдой экспортининг деярли учдан бир қисми тўғри келган.
Украинанинг Қора денгиз портларидан ғалла экспортини қайта тиклашга рухсат бериш тўғрисидаги Россия билан эришилган келишув асосида сўнгги икки ҳафта ичида жами 18 та кема Украинадан жўнаб кетди.
Туркия ва БМТ Украина ғалласи экспортини тиклаш ва глобал озиқ-овқат хавфсизлигига таҳдидни юмшатиш учун ўтган ой Истанбулда Украина ва Россия ўртасидаги келишувга воситачилик қилганди.
Венгрия парламенти спикери: Евроиттифоқнинг Россияга нисбатан санкциялари нотўғри
Якшанба куни Венгрия Миллий Ассамблеяси спикери Ласло Кёвер Европа Иттифоқи Россияга қарши жорий қилган санкциялар «тубдан нотўғри» эканлигини таъкидлаган. Бу ҳақда Россия матбуоти хабар бермоқда.
Кёвер Европа Иттифоқининг Россияга қарши санкциялари блокнинг ўз иқтисодиётига жиддий зарар етказишидан огоҳлантириб, Брюсселm инқироз ва қийинчиликларни ўзаро ҳурмат ва мулоқот орқали ҳал қилиши кераклигини айтган.
Европа Иттифоқи Россиянинг табиий гази ва нефтига таянади. Россия-Украина можароси бошланганидан бери Европа Иттифоқи АҚШ ортидан Москвага қарши қатор санкция киритди. Аммо блок бунинг ортидан энергия танқислигига дучор бўлди.
Венгрия энергия танқислиги сабабли фавқулодда ҳолат эълон қилди ва энергия ва ёғоч экспортини ман қилди.
Венгрия ташқи ишлар вазирлигининг маълум қилишича, жума куни «Газпром» «Турк оқими» қувури орқали Венгрияга кунига 2,6 миллион куб метр қўшимча табиий газ етказиб беришни бошлаган. Бу ҳолат август ойига охиригача давом этиши айтилмоқда.
Бу орада Будапешт билан Москва Венгрияга сентябрь ойида табиий газ етказиб беришни бошлаш бўйича икки тарафлама музокараларни бошлаб юборган.
Украина шаҳарларининг бирида шошилинч равишда кўмилган жасадлар қазиб олинмоқда
Жанглар тўхтагач, Украинанинг Рубижне (русча Рубежное) шаҳрида маҳаллий аҳоли Украина ва Россия кучлари ўртасидаги жанглар давомида шошилинч равишда кўмилган жасадларни қазиб ола бошлади.
50 минг одам истиқомат қиладиган Рубижне шаҳри март ойида бошланиб, узоқ давом этган жанглардан сўнг Россия дастаклаётган Луганск Халқ Республикаси қўшинлари томонидан қўлга олинган.
12 август куни шаҳарда вайрон қилинган иморатларнинг бири ёнида кўмилган жасадлар қазиб олинди.
Жорий йилнинг февраль ойида Россия президенти Владимир Путин Украинага қарши «махсус ҳарбий операцияси» бошлаган эди.
48 ёшли Лилия Ай-Талатини март ойида бошланган ҳужум давомида шошилинч тарзда дафн этилган онаси жасади қазиб олинишини кузатиб турди.
Ҳужумлар ортидан шаҳар иккига бўлинган. Ай-Талатинининг айтишича, у шаҳарнинг Украина назоратидаги қисмида қолган. Ота-онасининг руслар назоратидаги ҳудудда жойлашган квартирасига 10 кун деганда етиб борган.
«Онам аллақачон ўлаётган эди ... қўллари кўкарган, ранги оқарган, кўзлари остида ҳалқалар пайдо бўлганди», - деди у.
«Эртаси куни онам оламдан ўтди».
Ай-Талатини ва эри курак топа олмаган, шунинг учун снарядлар овози остида мурдани ердаги очиқ окопга судраб боришган.
«Энди мен учун бир оз осонроқ, чунки у кўчада, ... ғайриинсоний шароитда кўмилган эмас. Қабристонга олиб борамиз, у ерда жойимиз бор», - деди у.
Қабрларни қидиришда иштирок этиб келаётган Луганск Халқ Республикаси расмийси Анна Сороканинг айтишича, Рубижне шаҳрида 10 кундан бери ишлаган гуруҳ 104 та жасадни эксгумация қилган, яъни қазиб олган.
«Шрапнель яралари кўп экан, лекин ўқ жароҳатлари ҳам бор», - деди у жасадлар яралари ҳақида.
Расмийнинг тахминларига кўра, шаҳарда жами 500 та норасмий қабр мавжуд.
Ай-Талатинининг онаси яшаган иморат ёнида жами олти жасад қазиб олинган. Жасадлар қайта кўмилишидан олдин уларни кўздан кечириш учун шаҳарнинг бошқа қисмига олиб кетишган.
Россия жанубидаги Ростов вилоятида фаолият юритувчи суд-тиббиёт эксперти Борис Ковалёвнинг сўзларига кўра, номаълум жасадларни аниқлашга ёрдам бериш учун улардан генетик материал намуналари олинади.
Россияпараст каналлар Украина “Вагнер ХҲШ”нинг Попаснаядаги штабига зарба берганини хабар қилмоқда
8 август куни россиялик журналист Сергей Среда ушбу “штаб”да бўлгани ҳақида ёзган эди. У Телеграмда шундай пост қолдирган: “Попаснаяга келиб, “Вагнер ХҲШ” штабига кирдим. Қадрдон биродар каби кутиб олишди. Мириқиб суҳбатлашдик”.
У эълон қилган фотосуратлардан бирида “Вагнер ХҲШ” эгаси деб ишониладиган тадбиркор Евгений Пригожин акс этган.
Среда Евгений Пригожин фотосурати илова қилинган бу постини кейинроқ ўчириб ташлаган.
Қизиғи, пост штаб жойлашган бинога Украина томонидан ракета зарбаси берилганидан сўнг ўчирилган. Штаб геолокацияси Среда ижтимоий тармоққа чиқарган фотосуратлар орқали аниқлангани йтилмоқда.
Бу орада Телеграмда гўё ракета зарбаси натижасида ярадор бўлган “вагнерчи” машинага ортилаётгани акс этган видео пайдо бўлди. Озодликнинг рус хизмати видеодаги жой геолокацияси аниқлади: бу кадрлар ростдан ҳам Попаснаядаги Мироновкая кўчасидаги 8-уйдан олинган бўлиб, камера “вагнерчилар” штаби бўлгани айтилаётган бинога қаратилган.
Россияпараст каналлар хабарича, Евгений Пригожиннинг ўзи тирик (бунинг ажабланарли ери йўқ – унинг Попаснаяда ҳарбий мухбир Среда олган фотосурати пайдо бўлганидан бери орадан 6 кун ўтди). Аммо, “Вагнер ХҲШ”га яқин манбаларга кўра, зарбадан жабрланган бор.
Бу орада Телеграмда портлашдан сўнг бино харобалари кўздан кечирилаётгани акс этган бошқа видео ёйинланди. Мазкур тасвирлар Мироновская кўчасидаги 12-уйда яшовчи киши томонидан олинган бўлиши мумкин.
Форум