В.Зеленский: АЭСдаги ҳар бир рус солдати нишонимизга айланади!
Украина мамлакат жанубидаги босиб олинган атом станциясига қарата ўт очаётган ёки ундан фойдаланаётган рус аскарларини нишонга олди, деди президент Владимир Зеленский 13-август кунги кечки чиқишида.
- Станциядан ўқ узган ёки ундан ниқоб сифатида фойдаланаётган ҳар бир рус аскари бизнинг разведкачиларимиз, махсус хизматларимиз, армиямиз учун алоҳида нишонга айланишини англаши керак. Ва террористик давлатнинг мутлақо барча амалдорлари, шунингдек, атом электр станцияларида шантаж амалиётларида уларга ёрдам бераётганлар халқаро судда жавоб беришлари керак, - деди Владимир Зеленский .
Украина ва Россия Европадаги энг йирик атом электр станцияси бўлган Запороже атом электр станциясининг сўнгги пайтларда бир неча бор ўққа тутилиши юзасидан айбловлар билан алмашди. Уруш бошидаёқ станция рус қўшинлари томонидан эгаллаб олинганди.
Тафсилотларни келтирмаган Зеленский Россия атом электр станцияларидан ядровий шантаж учун фойдаланаётганликда айблади.
Губернатор Запороже АЭСи ҳудудини қуролсизлантиришга чақирди
Запороже вилояти губернатори Запороже атом электр станциясини қуролсизлантириш ва унинг хавфсизлигини таъминлаш учун халқаро ташкилотларни даъват қилди.
Губернатор АЭС ичкариси ва атрофида қурол мутлақо бўлмаслигини таъминлаш керак, деди Олександр Старух, Запороже вилояти губернатори:
- Ҳозирда вазият кескинлигича қолмоқда. Худога шукур, ядровий хавф туғдирувчи объектлар ўққа тутилмаган, радиациявий фон нормал чегараларда. Аммо шу билан бирга, у ерга қўшин ва ўқ-дориларни жойлаштириш эртами-кечми тузатиб бўлмас оқибатларга олиб келиши мумкин.
У МАГАТЭ (Атом энергияси бўйича халқаро агентлик) каби ташкилотларнинг қоидаларини бажаришга чақирди.
Бахмут жанг майдонларида “Вагнер” ёлланма ҳарбийларининг жасадлари топилди
Украиналик аскарлар Донецк вилоятидаги Бахмут жанг майдонида кийим-кечаклари “Вагнер” ёлланма ҳарбийлариники бўлган жасадларни топган.
"Ўлим - бизнинг ишимиз - ва бу иш яхши кетяпти" шиори, ёлланма ҳарбийлаштирилган “Вагнер” гуруҳининг ташриф қоғози. Жасадлар ҳарбий кийимида ана шундай ёзув ёзилган белги бор.
"Улар бу ерга пул ортидан келишди ва пул учун ер тишлашди", дейди украин аскари.
Украинада “Вагнер” ёлланма ҳарбийлари жанг қилаётгани маълум.
MediaHub журналистик суриштирувлар маркази “Вагнер” хусусий ҳарбий ширкатига Ўзбекистон ва Қирғизистон фуқароларини ҳам ёллаш бошлангани тўғрисида хабар берган.
“Вагнер” ёлланма жангчилари 2014 йилдан бери Донбассдаги жангларда сепаратчилар томонида жанг қилиб келади.
Расман мазкур ширкат аскарлари Россия Қуролли Кучларига алоқадор эмас. Айни пайтда улар Мудофаа вазирлиги инфраструктураси ва транспортидан фойдаланади.
“Вагнер” ширкатини россиялик тадбиркор, президент Владимир Путинга яқин Евгений Пригожин бошқариши айтилади. Пригожинга ҳам АҚШ ва Европа Иттифоқи санкция қўллаган.
“Вагнер” ширкати ёллаган жангарилар Сурия, Мали ва Судандаги кўплаб ҳарбий жиноятларга алоқадор экани тахмин қилинади.
13 минг тонна жўхори ортилган кема Украинадан Италияга келди
Украинадан 13 минг тонна жўхори олиб кетаётган “Рожен” кемаси жума куни Туркияда тўхтаб, Италия шимолидаги Равенна портига кирди.
Украинанинг Қора денгиз портларидан ғалла экспортини қайта тиклашга рухсат бериш тўғрисидаги Россия билан келишувга кўра, уруш туфайли беш ой давомида тўхтаб қолган жами 14 та кема сўнгги икки ҳафта ичида Украинадан жўнаб кетди.
Туркия Мудофаа вазирлигининг билдиришича, шанба куни Туркиядан Украина йўналиши бўйича яна бир кема Украина ғалласини олиб келиш учун йўл олган.
Туркия билан биргаликда Бирлашган Миллатлар Ташкилоти воситачилигида ўтган ой Украина ғалла етказиб беришни бошлади.
Бундан олдин БМТ уруш туфайли таъминотнинг тўхташи кучли озиқ-овқат тақчиллигига ва ҳатто дунёнинг айрим қисмларида очарчилик авж олишига олиб келиши мумкинлигидан хавотир билдирган эди.
Шу йилнинг февралигача глобал буғдой экспортининг деярли учдан бир қисми Украина ва Россия хиссасига тўғри келган.
Украинада ўтган йилги ҳосилдан 20 миллион тоннага яқин дон қолган. Бу йилги буғдой ҳосили ҳам 20 миллион тоннага баҳоланмоқда.
Форум