“Энергодар қум устига қурилган шаҳар”
БМТ Хавфсизлик Кенгаши пайшанба куни йиғилиб, вазиятни муҳокама қилди. Ташкилот бош котиби Антониу Гутерриш ҳар икки томонни завод яқинидаги барча жангларни тўхтатишга чақирди.
"Объектдан ҳар қандай ҳарбий амалиётнинг бир қисми сифатида фойдаланмаслик керак. Бунинг ўрнига ҳудуд хавфсизлигини таъминлаш учун қуролсизлантириш бўйича техник даражада шошилинч келишув зарур", - деди Гутерриш ўз баёнотида.
24 февралда Украинага бостириб кирган Россия март ойида Запорожьени эгаллаб олган. Станциядаги ҳар қандай ҳалокат қисқа муддатга катта радиосдаги майдонга тарқалиши мумкин.
"Энергодар қум устига қурилган шаҳар. Ўз-ўзидан атом электр станцияси ҳам қум устида барпо қилинган. Ҳар қандай кичик портлаш ҳам қумнинг ҳаракатланишига олиб келиши мумкин. Шаҳримизда доимий ҳаракатланувчи қумтепалар бор. Ҳар қандай портлаш ёки тебраниш туфайли қум ҳаракатлана бошлайди", дейди минтақадаги гуманитар ёрдам пунктларидан бирининг кўнгилли ишчиси Владимир Мартинюк.
Чикагода болалар Украина учун хайрия акциясига қўл урди
Chicago Children United for Ukraine аъзолари Кеllog's компанияси томонидан совға қилинган 5000 қути поп корн қутиларидан фойдаланган ҳолда мозаика яратиб, Гиннес рекордини янгилади. Тушган маблағлар Украина ёрдам учун ўтказилади.
"Биз бу ишимиз билан мамлакатда Украина ҳақида хабардорликни оширишга ҳам қарор қилдик", дейди 15 ёшли Майкл Котчер.
“Ғоя дастлаб Майкл билан менинг ҳаёлимга келди. Жуда яхши кўрганимиз учун ҳар гал кўчага чиққанимизда поп корн еймиз. Шу тариқа "мозаика яратиш учун маккажўхори қутиларидан фойдаланиш"га қарор қилдик. Мозаикани тугатгандан сўнг, нима қиламиз?", дея ўйладик ва тушган маблағнинг бир қисмини Катта Чикаго озиқ-овқат омборига хайрия қилишга қарор қилдик”, дейди ўсмирларга ёрдам бераётган фаол Райдер Шиффман.
Болалар поп корн сариқ қутилари ва Райс Криспиеснинг кўк қутиларидан Чикаго шаҳар марказидаги Wintrust Financial Corporation Grand xoлида Украинанинг улкан байроғини ясадилар.
Ўсмирлар нафақат Украинага, балки ўз маҳаллий ҳамжамиятига ҳам молиявий ёрдам кўрсатмоқда. Ҳозиргача 70 нафар кўнгилли Украинага ёрдам бериш мақсадида салкам 15 минг доллар маблағ йиққан.
Украина билан урушга рўй-рост қарши чиққан россиялик мусиқачи
“Барто” электропанк гуруҳи вокалчи ва мусиқачиси Мария Любичева Россияда истиқомат қилади ва Украина билан урушга рўй-рост қарши чиқмоқда.
У мусиқачилар зиммасидаги вазифа, Путин ва унинг амбициялари, россияликларнинг урушга муносабати ҳақида шундай дейди:
“Урушнинг сабаблари кўп: биринчиси – Путиннинг тушиб кетган рейтинггини кўтариш истаги. Иккинчидан, қариб-чириган чоллар ҳокимиятни ёшларга беришни хоҳламаслиги. Учинчидан, Путин ростдан ҳам ўзини Пётрнинг вориси ва рус ерларини бирлаштирувчи, деб билади. Қолаверса, СССР ҳалокати учун ўч олиш истаги ҳам бор. Аксар россияликлар урушни қўллаб-қувватлайди, дейишади... Ҳеч ҳам-да. Бизда холис ижтимоий тадқиқотлар ўтказилмайди.
Ҳа, февраль-март ойларида уруш тарафдорлари кўп бўлган бўлса бордир, лекин ҳозир аҳвол ўзгармаганига ишонмайман. Кўпчилик қарши, аммо фикрини очиқ айтишга қўрқади, чунки ҳукумат узоқ йиллардан бери бош кўтарганни тепкилаб, халқнинг юрагини олган. Кўп ҳамкасбларим кўриб-кўрмаганга олиб юришибди. Менга тегмасалар бас, дейишади. Қўрққанларича бор аслида. Урушга қарши чиққан Юрий Шевчук, Би-2 гуруҳи ва бошқалар жамият ҳаётидан узиб ташланганини ҳамма кўриб турибди”.
Медведев “ЛХР” расмийлари билан йиғилиш ўтказди
Дмитрий Медведев Россиянинг юқори мартабали мулозимлари билан бирга тан олинмаган “ЛХР”га келиб, йиғилиш ўтказди.
Учрашувда Россия Хавфсизлик кенгаши раҳбарининг ўринбосаридан ташқари, бош прокурор Игорь Краснов, президент администрацияси раҳбарининг биринчи муовини Сергей Кириенко, ички ишлар вазири Владимир Колокольцев, қурилиш вазири Ирек Файзуллин, ФСБ директори Александр Бортников, Тергов қўмитаси раиси Александр Бастрикин ҳамда тан олинмаган “ЛХР” ва “ДХР” раҳбарлари қатнашган.
Медведев йиғилиш пайшанба куни бўлиб ўтганини ёзган, аммо тафсилотларни очиқламаган.
Озодлик уруш шароитида ушбу маълумотларни мустақил манбалар орқали текшириш имкониятига эга эмас.
Форум