ОАВ: Россия қўшинлари Украинанинг 12,4 трлн долларлик конларини босиб олди
Россия қўшинлари Украинанинг умумий қиймати 12,4 трлн долларга тенг бир қанча фойдали қазилмалар конларини босиб олди, деб ёзадиWashington Post нашри.
Нашр маълумотига кўра, Россия конларнинг бир қисмини 2014 йилда, Қрим воқеаларидан сўнг эгаллаб олган. Украинада титан, темир, литий каби маъданлар, шунингдек кўмир ёқилғисининг улкан захиралари мавжуд. Уларнинг бари бирга ўнлаб триллион доллар туради.
Американинг Урушни ўрганиш институти (ISW)маълумотига кўра, Россия армиясининг 64-мотоўқчилар бригадаси, катта эҳтимол билан, жангларда бутунлай қириб ташланган.
Эслатиб ўтамиз, Украина томони ушбу бригада аскарларини Бучада тинч аҳолини қатл этганликда ва оммавий қийноққа солганликда айблайди. Айтилишича, бригада Изюм ва Славянск йўналишларида кечган оғир жангларда яксон қилинган.
Экспертлар “Кремль ўз жангчилари Киев вилоятида содир этган ҳарбий жиноятларни яшириш мақсадида атай қақшатқич жангларга йўллаб, улардан қутулган”, деб ишонадилар.
Бахмутни аҳолининг 80 фоизи тарк этди
Жумладан, Россия қўшинлари Донецк вилоятининг Бахмут шаҳрини ўққа тутмоқда, ракеталар турар-жой даҳаларига ҳам учиб келяпти.
Аҳолининг қарийб 80 фоизи шаҳарни аллақачон тарк этган, лекин айримлар эвакуация текин бўлишига қарамай кетишни хоҳламаяпти – кимдир “туғилиб ўсган жойимдан кетмайман” деб оёқ тираб олган, айримлар эса борадиган жойлари йўқлигини ва украин армияси “агрессорни тирқиратиб қувгунича” кутишларини айтишмоқда.
– Қаерга ҳам борардик. Узоққа кўчиш учун катта пул керак. Начора, сабр қилиб турамиз-да... Лекин қанча сабр қилиш керак, билмайман. Бу балолар тезроқ тугасин, яқинларимиз, фарзандларимиз дийдорига етайлик, деб ўтирибмиз…
– Якка ўзим қолсам ҳам майлига, лекин бу ердан кетмайман. Айирмачи эмасман, босқинчилар хизматига кириш ниятим ҳам йўқ. Аммо бу ер менинг уйим, уни ташлаб кетмайман.
Россия: Украинанинг кўплаб ҳарбий объектларига ҳужум уюштирилди
Россия Мудофаа вазирлиги рус қўшинлари Украинанинг кўплаб ҳарбий объектларига ҳужум уюштираётгани ҳақида яна баёнот берди.
Вазирлик матбуот котиби Игор Конашенковга кўра, Россия қўшинлари Украинанинг Артёмовск ва Авдеевкадаги ҳарбий кучларининг 14 ва 66- механизациялашган бригадаларига зарба берган.
Бундан ташқари, Россия ҳарбий ҳаво кучлари, Днепропетровск вилоятидаги Никопол яқинида битта Ми-24 вертолёти ва Харков вилоятида бир нечта дронларни уриб туширганини айтмоқда.
Украина Қуролли кучлари Бош штаби, Россия ҳарбий кучлари Донецк ва Луганскда тўлиқ назорат ўрнатиш ва бу ҳудудларда ҳужумларни қайта тиклаш учун қулай шароит яратишга ҳаракат қилаётганини айтмоқда.
Украина томонининг қўшимча қилишича, Россия қўшинлари мудофаа чизиғини ёриб ўтиб, Донецк вилоятида қулай позицияни эгаллашга уринмоқда ҳамда Краматорск ва Артёмовскка ҳужумларни қайта бошлашга интилмоқда.
Ҳозирча Россия ва Украина томонлари берган бу маълумотларни мустақил манбалардан текшириш имкони йўқ.
Франция Зеленский талабини қувватлади
Украина президенти Владимир Зеленский тунги видеомурожаатида Запорожье атом электр станцияси ҳудудига “янги зарбалар” берилганини айтар экан, Россияга ишора қилиб, бу ҳужумни “террорчи давлатнинг энг катта жиноятларидан бири", дея атади:
"Ҳозир Запорожье АЭС атрофида содир бўлаётган воқеалар террорчи давлатнинг энг катта жиноятларидан биридир. Россия жаҳон тарихида яна терроризм манбаига айланди. Шу пайтгача ҳеч ким атом электр станциясидан дунёга таҳдид қилиш ва шартлар қўйиш учун фойдаланмаганди. Босқинчиларни Запорожье АЭСдан қувиб чиқариш учун бутун дунё зудлик билан ўз муносабатини билдириши керак. Бу фақатгина Украинанинг эҳтиёжи эмас, балки бутун дунё учун глобал манфаат масаласидир".
Франция Зеленскийнинг талабини қўллаб-қувватлар экан, Россиянинг АЭСни босиб олиши дунё учун хавф туғдираётганини айтди.
“Россия қуролли кучларининг завод яқинида мавжудлиги ва ҳаракатлари ҳалокатли оқибатларга олиб келадиган авария хавфини сезиларли оширади”, — дейилади Франция ташқи ишлар вазирлиги баёнотида.
Форум