Пермь ўзбеклар диаспораси раҳбари жавоб берди
“Перм ўлкаси Марказий Осиё ўзбеклари жамияти” жамоат ташкилоти раҳбари Жаҳонгир Жалолов Ўзбекистондан келган элчихона ва бошқа масъул шахслар баёнотларидаги огоҳлантиришларга муносабат билдирди.
У "АиФ-Прикамье" нашрига ҳеч ким Ўзбекистон фуқароларини жалб қилмоқчи эмаслигини тушунтиришга уринди.
- Таклиф фақат Россия фуқаролари, миллатига кўра ўзбеклар учун эди. Оммавий ахборот воситалари ёзаётганлари, баталонимиз ҳақида салбий фикрлар унчалик яхши эмас, улар ҳамма нарсани нотўғри тушунишган. Биз Ўзбекистон фуқароларини баталёнга қўшилишга чақирмаймиз, деди Жаҳонгир Жалолов.
Унинг сўзларига кўра, баталён сафига қўшилишни хоҳловчилар сони ҳақидаги маълумотлар кейинроқ – ҳарбий хизматга қабул қилиш бўлимидан маълумот олинганидан кейин пайдо бўлади.
Аммо ўзининг ВКонтактедаги саҳифасида 11 август куни у бироз бошқача оҳангда қолдирган ёзуви пайдо бўлди.
- Мен Украинани озод қилишда иштирок этиш учун кўнгиллилар батальонини тузишга даъват қилганимдан бошлаб мисли кўрилмаган босим остида қолдим. Мамлакатимизга мағлуб бўлишни истайдиган Россия душманлари томонидан нега таҳдид ва ҳақоратлар оқими бўлаётганини тушуняпман. Ҳозирги вазиятда яна такрорлашим мумкин. Ҳар қандай босимга қарамай, мен Россияни ҳар томонлама қўллаб-қувватлаш ва унинг манфаатларини ҳимоя қилиш позициямдан ҳеч қачон воз кечмайман. Қанчалик баландпарвоз эшитилмасин, лекин сизни ишонтириб айтаманки, ўз президентим Владимир Владимирович Путинни сўнгги нафасимгача ҳимоя қиламан. Россия учун! Мен Ватанга хизмат қиламан! деб ёзди Пермь ўзбеклар диаспораси бошлиғи.
Пермдаги ўзбеклар “Амир Темур” номидаги батальон ташкил қилиб, Украинага қарши урушмоқчи экани тўғрисида Vetta телеканали видео эълон қилган эди.
Латвия Сейми Россияни террорчилик ҳомийси дея эътироф этди
Жорий йилнинг 11 август куни Латвия парламенти Россияни террорчилик ҳомийси бўлган давлат деб топиш бўйича резолюцияни қабул қилди.
Латвиялик депутатларга кўра, Россия Украина ҳудудидаги тинч аҳоли вакилларини қасддан нишонга олмоқда.
Delfi нашри хабарига кўра, мазкур резолюцияни ёқлаб 67 нафар депутат овоз берган, 16 киши эса овоз берган эмас.
Украина Россияда ўз манфаатларини ҳимоя қилиш бўйича Швейцария билан келишувга эришди
Украина билан Швейцария Киевнинг Россиядаги дипломатик манфаатларини ҳимоя қилиш юзасидан келишувга эришганлар. Уруш туфайли Москва ва Киев ўртасида дипломатик алоқалар узилган.
Швейцария Ташқи ишлар вазирлиги вакили 10 август куни ўз мамлакати ва Украина ўртасида “дипломатик ҳимоя” юзасидан музокаралар муваффақиятли якунланганини тасдиқлаган.
Швейцария, агар Киев ва Москва ўртасидаги музокараларни тиклаш бўйича қарор қабул қилингудек бўлса, Россия билан Украина ўртасида воситачилик қилишга ҳозирлигини ҳам билдирган.
Бироқ Швейцария Украинанинг дипломатик манфаатларини ҳимоя қила олиши учун бунга учинчи томон, яъни Россия ҳам рози бўлиши лозим. Россия эса бунга рози бўлишга тайёр эмас.
“Россия ташқи ишлар вазири Сергей Лавров томонидан аввалроқ қайд этилганидек, Россия ўзига қарши санкцияларга қўшилган мамлакатлар томонидан Украина билан музокараларда воситачилик қилиш таклифини кўриб чиқишга ҳозир эмас”, дейилган ТИВ баёнотида.
Байден Финляндия ва Швециянинг НАТОга қўшилишини ратификация қилди
АҚШ Президенти Жо Байден сешанба куни Финляндия ва Швециянинг НАТО иттифоқига киришини расман олқишлади. У Россиянинг Украинага бостириб кириши ортидан Европа хавфсизлиги масаласини қайта кўриб чиқиш доирасида Скандинавия давлатларининг ўзаро мудофаа шартномасини тузишда АҚШ расмий қўллаб-қувватлашини тасдиқловчи ратификация ҳужжатларини имзолади.
"НАТОга аъзо бўлишга интилаётган Финляндия ва Швеция гуруҳ аъзосига қилинган ҳужум барчага қилинган ҳужум дея баҳоланадиган муқаддас мажбуриятни ўз зиммасига юкламоқда. Бу Вашингтон шартномасининг 5-моддаси. Бу мажбурият ҳар қачонгидан ҳам кучлироқ. Тарихда бешинчи моддага мурожаат қилинган ягона вақт 11 сентябрь куни АҚШ ҳужумга учраганида ва барча иттифоқчиларимиз биз томонда тўпланган пайтда эди. Қўшма Штатлар буни ҳеч қачон унутмайди ва биз НАТОнинг ҳар бир қаричини ҳимоя қилиш ҳақидаги ваъдамиздан қайтмаймиз", - деди Жо Байден.
Ўтган ҳафта Сенат икки давлатни 95-1 овоз билан алянсга қўшилишини маъқуллади. Жорий йил бошида Россия президенти Владимир Путиннинг Украинага ҳужуми ортидан давлатлар ўз хавфсизлигини кафолатлаш учун НАТОга аъзо бўлишга интилди. Шимолий Атлантика Шартномаси Ташкилотининг қоидалари Финляндия ва Швециянинг яқин ойларда кутилаётган алянсга расман қўшилишидан олдин унинг барча 30 аъзосининг розилигини талаб қилади.
АҚШ ва унинг Европадаги иттифоқчилари Путиннинг Украинага ҳарбий тажовузи, шунингдек, Россия раҳбарининг бу йилги НАТОни қораловчи кенг қамровли баёнотлари, Россиянинг ядровий қуроли билан таҳдид қилиши ва Россиянинг кўплаб давлатлар ҳудудига бўлган тарихий даъволари ортидан бирлашишга ундади.
Форум